Masaalimu 81:1-16
Para tiretoore a isipo. Nsipo ninlavula sa Kititi.* Nsipo na Asaafi.
81 Mmwiipeleke isipo Muluku mutteeliwe ene murima, yoowo ori ikuru sahu.
Mukhuweleke mutteeliwe ene murima, munvuwihaka Muluku a Yakobe.
2 Mpacerye orumiha muusika ni mukuxe nlapa naamukhaani,*Ni viola oniruma saana vamosa ni ekaruma ya isipo erina mikhoyi.
3 Moopeke nlope nihiku onooneya aya mweeri,Nihiku na mweeri woosareya, eyo piiyo, nihiku na efesta ahu.
4 Nna nlamulo ninvahiwa awe Isarayeli,Yooruma ya Muluku a Yakobe,
5 Yeeyo aavanhe awe wiira emuupuxeryeke Yosefe,Okathi aavinre awe elapo ya wExiitu.
Miyo kaahiiwa nsu, masi nkaamusuwenle mutthu ene aalavula.
6 “Kaahimurula muritti woolemela, mmakhatani mwawe;Kaahikuxa esestu yaari mmatatani mwawe.
7 Okathi mwaaxankale anyu, mwaahikiihana, nto miyo kaahiwoopolani;Kaahiwaakhulani eriyari ya meeku ooriipa.
Kaahiweehereryani waattamela maasi a oMeriba.* (Selahi)
8 Nyuwo atthu aka mukiwiriyane, nto miyo kinimoolopolani.
Nyuwo Isarayeli, vaakhanle wiira munniphavela okiwiriyana!
9 Eriyari anyu, khaarowa okhala muluku muhinimusuwela anyu,Nave khimwaarowa omukokhorelaka muluku a elapo ekina.
10 Miyo Yehova, ka Muluku anyu,Ti yoomi kookuminheni elapo ya wExiitu.
Muhule eyano anyu, kinimoolyihani mpakha ovona.
11 Masi, atthu aka khiyaakiwiriyanne;Isarayeli aahikhootta okiiwelela.
12 Tivonto, kaanaahiya wiira atthareke mirima saya soohiiwelela;Awo yaanipaka itthu yuupuwela aya okhala sooreera.*
13 Vaakhanle wiira atthu aka yaahikiwiriyana,Vaakhanle wiira aisarayeli yaahitthara iphiro saka,
14 Miyo kaamwaaxintta awanani aya voowaakuveya;Nave kaamwaavaha ehukhumu awanani aya.
15 Ale animunyokha Yehova, anoothukumela ohoolo wawe yoovaka,Nave ehukhumu aya khenrowa omala.
16 Masi owo onimoolyihani* ni etiriku yooreerexa,Nave onimoovonihani ni oravo* onikhuma vamwala”.
Inoota
^ Nwehe Moolumo Ootthokiheriwa.
^ Aahiiso, “mmukuxe cuucu”.
^ Nintaphulela “onyakulihana”.
^ Eheeperi, “awo yaanitthara miruku saya”.
^ Eheeperi, “omulyiha”, eyo piiyo, atthu a Muluku.
^ Aahiiso, “enuyi”.
