Masaalimu 89:1-52
-
Wiipa isipo olavulaka sa oreera murima woororomeleya wa Yehova
Maskiili a Etani, muzerahi.
89 Mahiku ootheene, kinrowa wiipaka kilavulaka sa oreera murima woororomeleya wa Yehova.
Kinoosuweliha maloko ootheene ororomeleya wanyu.
2 Miyo koohimya wiira: “Ophenta woororomeleya onookhalaka mahiku ootheene,Nave ororomeleya wanyu, onookhalaka mahiku ootheene”.
3 Muluku oohimya wiira: “Koopaka nivarihano ni mutthu kimuthanlale aka;Koomulaphela murumeyi aka Davidi, kiiraka:
4 ‘Wiira olamulela* wanyu okhaleke mahiku ootheene,Miyo kinoolipiha osuulu anyu wiira olamuleleke’”. (Selahi)
5 Yehova, erimu ennoottottopelani mwaha wa itthu sootikiniha munipaka anyu,Aayo, ennoottottopelani mmulokoni mwa ale oowaarya* mwaha wa ororomeleya wanyu.
6 Niireke wiira wiirimu ookhala onlikana ni Yehova?
Eriyari ya anamwane a Muluku, ti pani onlikana ni Yehova?
7 Muluku onnooviwa ni ottittimihiwa eriyari ya ale oowaarya;Owo ti muulupale ni toowoopiha, para ootheene ale amurukurenrye.
8 Khoo Yehova, Muluku a anakhotto,Khoo Yah, ti pani ori oowerya ntoko nyuwo?
Ororomeleya wanyu onnoorukureryani.
9 Nyuwo munneettiha ephareya yootupa;Okathi mawimpi aya anrowa aya musulu, nyuwo munnimaaliha.
10 Nyuwo moomuxintta Rahabi ni moomwiiva.
Ni moono anyu woowerya, muhaamwara-mwarya awanani anyu.
11 Erimu ti yawinyu, nave elapo ti yawinyu;Ti nyuwo mpattunxe elapo ni itthu sootheene siri memmo.
12 Ti nyuwo mpanke onorti ni osuuli;Miyaako Tabori ni Hermoni, sinnittottopela nsina nanyu voohakalala.
13 Moono anyu ti wa ikuru;Ntata nanyu ti noowerya;Ntata nanyu noolopwana ti noottittimiheya.
14 Oreera murima ni exariya, ti sinlipiha ehice anyu;Ophenta ni ororomeleya, sinneemela ohoolo wanyu.
15 Oohakalala ti yaale anoottottopelani atteeliwe ene murima.
Awo anneetta amwaleeliwaka ni owiitho wanyu, nyuwo Yehova.
16 Nihiku nootheene, annitteeliwa murima mwaha wa nsina nanyu,Nave annittittimiheya mwaha wa exariya anyu.
17 Nyuwo ti muri ovuwa waya ni ikuru saya,Okhala wiira moonireeliha, ikuru sahu sinnincerereya.
18 Yehova tonivanhe nikula nahu na wiixaakihana,*Vamosa ni mwene ahu.
19 Okathi ole, nyuwo mwaahilavula moolohani ni ale oororomeleya, mwiiraka:
“Konvaha ikuru mutthu mmosa ootupa;Koomwiiriha okhala muulupale, ole kimuthanlale aka eriyari ya atthu.
20 Komphwanya Davidi, murumeyi aka;Koomwiitthela makhura aka oowaarya.
21 Kinoomukhaliherya ni ntata naka,Kinoomulipiha ni moono aka.
22 Khuuvo nwanani onrowa omukhanyererya oliva mpoosito,Nnakhala khuuvo mutakhali onrowa omuhaaxa.
23 Kinoowiikitthasa awanani awe ohoolo wawe,Nave kinoowiiva ale animunyokha.
24 Ororomeleya waka ni ophenta waka, ori nuuwo,Owerya* wawe onimuncerereya mwaha wa nsina naka.
25 Kinoopweha ntata nawe* vasulu va ephareya,Nave ntata nawe noolopwana, vasulu va miro.
26 Owo onookiihana, iiraka: ‘Nyuwo mwa Tiithi aka,Mwa Muluku aka ni mwa Mwala aka onikoopola’.
27 Kinoomwiiriha okhala mwanaka oopacerya oyariwa,Kinoomwiiriha okhala muulupalexa, waavikana mamwene ootheene a mulaponi.
28 Mahiku ootheene, kinrowa omooniheryaka ophenta waka woororomeleya,Nave nivarihano kipanke aka nuuwo, khaninrowa omala.
29 Kinimwiiriha osuulu awe, okhalaka mahiku ootheene,Nave, kinimwiiriha ehice awe okhalaka mahiku ootheene, ntoko erimu.
30 Vakhala wiira anaawe anoohiya weettela nlamulo naka,Ni khanrowa wiiraka etthu kinaahimeerya aka,
31 Yahiya weettela itthu kithanlale aka,Ahinaiwelela sooruma saka,
32 Kinimwaahukhumu ni ekopo, mwaha wa ohiiwelela waya,Nave kinimwaawaxula mwaha wa etampi aya.
33 Masi nkinikhala-khala kihiyaka omooniherya ophenta waka woororomeleya,Nave nkinrowa ohiya omutaphula natiri aka.
34 Nkirowa ohonona etthu kivarihanne aka nuuwo,Nnakhala oturuka etthu kilavunle aka.
35 Ntoko Muluku oowaarya, miyo koolapha;Mweekeekhai, nkinrowa onwoka Davidi.
36 Osuulu awe onrowa okhalaka mahiku ootheene;Siisaale nsuwa ninkhala aya mahiku ootheene,
Siiso-tho, ehice awe enookhalaka ohoolo waka.
37 Ehice eyo enookhalaka mahiku ootheene,Siisaale mweeri onikhumelela aya* musulu mahiku ootheene”. (Selahi)
38 Masi nyuwo moomunyanyala ni moomukhootta;Moonanariwa vanceene nuule mmuthanlale anyu.
39 Moohiya nivarihano mpanke anyu ni murumeyi anyu;Moonanariha ekhara awe, murihelaka vathi.
40 Moopwexakasa ixiri sawe sootheene sa maluku;Ipooma sawe soolipihiwa, mookhaliha milepe.*
41 Atthu ootheene anivira, annimwiiyerya;Ale amwaattamenle, anninveeha.
42 Nyuwo moowiiriha awanani awe oxintta;*Moowiiriha awanani awe ootheene otteeliwa murima.
43 Nave-tho, muhiiriha espaata* awe ohivareleya muteko,Moomwiiriha ohixintta okhottoni.
44 Nyuwo moomaliha ovuwa wawe,Nave moohonona ehice awe mulaponi.
45 Moovukula mahiku a omiravo awe;Monwariha ehaaya. (Selahi)
46 Khoo Yehova, munrowa wiipitha mpakha silini? Munrowa wiipithaka mahiku ootheene?
Niireke onanariwa wanyu onoothipelelaka opatta ntoko mooro?
47 Muupuweleke wiira okumi aka ti wookhuveya!
Niireke mwaapattunxe apinaatamu ootheene mahala ene?
48 Niireke ookhala mutthu onikhala voohimala, ohilipelelaka okhwa?
Niireke ookhala mutthu oniwerya wiixoopola wiira ohikhwe?* (Selahi)
49 Khoo Yehova, ori woowi ophenta* moonihenrye anyu khalai?Weiwo mwaamulaphenle anyu Davidi voororomeleya?
50 Yehova, muupuweleke oveehiwa wa arumeyi anyu;Muupuweleke moota kinvilela aka oveehiwa ni atthu ootheene.
51 Khoo Yehova, muupuweleke moota awanani anyu yaaruwana aya;Moota oniruwaniwa awe ole mmuthanlale anyu, khula opuro onirowa awe.
52 Yehova ottottopeliweke mahiku ootheene. Amen, Amen.
Inoota
^ Eheeperi, “ehice”.
^ Aahiiso, “malaikha”.
^ Aahiiso, “eskuutu ahu”.
^ Eheeperi, “nnyaka”.
^ Aahiiso, “okhulupale awe”.
^ Eheeperi, “ntoko namoona oororomeleya”.
^ Aahiiso, “opuro ohinikhaliwa”.
^ Eheeperi, “Moovenxa ntata noolopwana na awanani awe”.
^ Aahiiso, “moomwiiriha xoowa”.
^ Eheeperi, “wiixoopola owerya wa Mahiye”. Nwehe Moolumo Ootthokiheriwa.
^ Aahiiso, “ophenta weiwo ori woororomeleya”.
