Matheyo 10:1-42
10 Yesu aahiwiihana awiixutti awe 12, aavaha owerya wa woomola malaikha ootakhala, ni waapenuxa atthu yaarina iretta sa khula enamuna.
2 Masina a arummwa 12, taala: Oopacerya, ti Simoni, aihaniwa Pedru, ni munnawe, aihaniwa Andreya; Yakobo mwaana a Zebedeyo ni munnawe, aihaniwa Yohani;
3 Filipe ni Bartolomeyo; Tome ni Matheyo, mulipa-ooliviha mpoosito; Yakobo mwaana a Alfeyo; ni Tadeyo;
4 Simoni muKanaani;* ni Yuda Isikaryoti, yoowo muhoolo mwaya anvarinhe Yesu.
5 Okathi Yesu aarumme awe arummwa ale 12, aahaavaha malakiheryo ala: “Muhirowe istaraata sa atthu a maloko makina, nnakhala muhikele epooma ya asamariya.
6 Ohiya-vo, mwaaphaveleke atthu a Isarayeli, yaawo ari ntoko ipwittipwitthi sirimenle.
7 Mwaarowaka, mulaleyeke wira: ‘Omwene wa wiirimu ori vakhiviru’.
8 Mwaapenuxeke aretta, mwaahihimuxeke alipa-ookhwa, mwaapenuxeke anamakokho,* moomoleke malaikha ootakhala. Nyuwo nvahiwe mahala, nto nvaheke mahala.
9 Muhikuxe eweero, aahiiso eparatha, nnakhala ekoopiri mmurupani oniheliwa musurukhu.
10 Nnakhala muhikuxe murupa wa yoolya ya mukwaha, aahiiso ikuwo sikina,* isantaalya sikina, nnakhala ttootto mukina, okhala wira namuteko onniphwanela ovahiwa yoolya.
11 “Khula epooma aahiiso muttetthe oniphiya anyu, mumphaveleke mutthu oniwaakhelani saana. Mukhaleke weiwo mpakha okathi munikhuma anyu.
12 Mwaphiya vatthokoni, mwaakhomaseke* atthu a etthoko eyo.
13 Nto yawaakhelani saana, murettele anyu okhale naawo, masi yaahiwaakheleni saana, murettele anyu wootthikeleni.
14 Atthu yaahiwaakheleni nnakhala woowiriyanani, mutatheke ntthupi na inawu sanyu, mwaavenyaka etthoko eyo aahiiso epooma eyo.
15 Kinooleelani ekeekhai wira, itthu sinrowa okhumelela epooma eyo Nihiku Noophukela, sinrowa okhala sootepa otakhala ovikana itthu sinrowa okhumelela elapo ya oSodoma ni ya oGomora.
16 “Mwiiwe! Miyo kinoorumani ntoko ipwittipwitthi, eriyari ya miici. Tivonto, mwiipasoopeke ntoko inowa, mmaaleke ntoko ipompa.*
17 Vano, mwiipasoopeke ni atthu, maana awo animooroihani otripunaale ni animoowaxulani musinagoga* mwaya.
18 Nave, munooroihiwa ohoolo wa makuvernatoro ni mamwene, mwaha wa miyo, wira mukhale anamoona aka vamaithoni vaya, ni vamaithoni va atthu a mulaponi.
19 Vano, yoovarani, muhixanke ni moota woolavula aahiiso etthu yoohimya, okhala wira ewoora ene yeeyo, munoosuwela etthu yoolavula.
20 Veekeekhai, khahiyo nyuwo munrowa olavula mekhinyu, masi munepa wa Tiithi inyu, tonrowa wookhaliheryani olavula.
21 Nave-tho, munna ononvahererya munnawe wira iiviwe, paapa ononvahererya mwanawe, hata anamwane animwaarukunuwela axipapaya ni aximamaya, wira yiiviwe.
22 Nyuwo munoonyokhiwa ni atthu otheene mwaha wa nsina naka, masi ole onivilela mpakha wookiseryani, tonrowa woopowa.
23 Mwaalupatthiwaka epooma emosa, mutthyaweleke epooma ekina. Kinooleelani ekeekhai wira, khamunimaliha weetta mittetthe sotheene sa wIsarayeli, Mwaana a mutthu ohiphiyale.
24 “Naxikola khoninvikana prusoore awe, nnakhala epottha kheninvikana pwiya aya.
25 Naxikola ahakalaleke aalikanyihiwaka ni prusoore awe, nave epottha yaalikanyihiwaka ni pwiya aya. Vakhala wira atthu annimuhimya mwaneene etthoko okhala Satana,* veekeekhai anrowa owiitthanaka siiso atthu akina a vatthokoni!
26 Tivonto, muhiwooveke atthu, okhala wira khiivo etthu yiipithihiwe ehinrowa wooniheriwa, nave, khiivo esiiri ehinrowa osuweliwa.
27 Sotheene kinooleelaakani wiiphiini, mulaleyeke ota; nave sotheene kinooleelaakani owaruni, mulaleyeke muri ene vampani.
28 Muhiwooveke ale aniwerya owiivani, masi ahinwerya wookhoottiheryani okhalana okumi muhoolo, ohiya-vo, mmooveke ole oniwerya woomala-malihani oGehena.*
29 Kiira iphera piili sinnitumihiwa musurukhu mmosa orina efaita vakhaani?* Hata emosa emorelaka vathi, Tiithi inyu onoosuwela.
30 Nave, ikharari sotheene sa mmuruni mwanyu, sookontariwa.
31 Tivonto, muhoove. Nyuwo mookhalana efaita yuulupale ovikana iphera sinceene.
32 “Ole onihimya ohoolo wa atthu wira mwiixutti aka, nave-tho miyo kinoohimya ohoolo wa Tiithi aka ori wiirimu, wira mwiixutti aka.
33 Masi ole onikikhootta ohoolo wa atthu, nave-tho miyo kinoomukhootta ohoolo wa Tiithi aka, ori wiirimu.
34 Muhuupuweleke wira kiruuhale murettele vathi-va. Miyo kiruuhale ohiiwanana,* ohiya murettele.
35 Mweekeekhai, kiruuhale ohiiwanana mulopwana ni paapa awe, mwaana mwaamuthiyana ni maama awe, muthiyana ootheliwa ni amaathi awe.
36 Nto, awanani a mutthu, anrowa okhala atthu a vatthokoni vawe.
37 Ole onimphentexa paapa awe aahiiso maama awe okivikana miyo, mutthu owo khoniphwanela okhala mwiixutti aka. Nave, ole onimphentexa mwanawe mwaamulopwana aahiiso mwaamuthiyana okivikana miyo, mutthu owo khoniphwanela okhala mwiixutti aka.
38 Ole ohinikuxa mwiri awe wa nihaaxeryo* onakitthara, mutthu owo khoniphwanela okhala mwiixutti aka.
39 Ole oneererya woopola okumi* awe, onoomurimeela. Masi, ole onimurimeela okumi* awe mwaha wa miyo, onoophwanya.
40 “Ole oniwaakhelani nyuwo, onikaakhela-tho miyo. Vano, ole onikaakhela miyo, onimwaakhela-tho Ole okirumme.
41 Ole onimwaakhela profeta mwaha wookhala profeta, onimwaakhela etthuvo enivahiwa profeta. Nave ole onimwaakhela naxariya mwaha wookhala naxariya, onimwaakhela etthuvo enivahiwa naxariya.
42 Nave ole oninvaha mmosa a awiixutti* ala maasi ooriirya wira owurye, mwaha wookhala mwiixutti aka, kinooleelani ekeekhai wira onimwaakhela tthiri etthuvo awe”.
Inoota
^ Aahiiso, “nanthiti”.
^ Aahiiso, “anamakuttula; anamaretta”.
^ Ekereku, “piili”.
^ Ayuda yaakohana ihaali so: “murettele okhale ni nyuwo”.
^ Aahiiso, “ikhuntta”.
^ Nwehe Moolumo Ootthokiheriwa.
^ Ekereku, “Belizebuli”. Onihimmwa muhooleli, aahiiso namalamulela a malaikha ootakhala.
^ Nwehe Moolumo Ootthokiheriwa.
^ Ekereku, “musurukhu mmosa wa asaario”.
^ Ekereku, “xoowa”.
^ Nwehe Moolumo Ootthokiheriwa.
^ Nwehe Moolumo Ootthokiheriwa ani: “Okumi”.
^ Nwehe Moolumo Ootthokiheriwa ani: “Okumi”.
^ Ekereku, “acikhaani”.
