Matheyo 18:1-35
18 Okathi ene yoole, awiixutti yaahimwaattamela Yesu, anamukoha ariki: “Ti pani ori muulupalexa Moomweneni wa wiirimu?”
2 Nto Yesu aahimwiihana mwanamwane mmosa, omweemexa eriyari aya,
3 onahimya so: “Kinooleelani ekeekhai wira, mwaahirukunuxe-ru voomalela moonelo anyu, munalikana ni anamwane acikhaani, khamunikela Moomweneni wa wiirimu.
4 Tivonto, ole oniiyeviha, onakhala ntoko mwanamwane ola, tori muulupalexa Moomweneni wa wiirimu.
5 Nave, ole onimwaakhela mwanamwane ntoko ola, mwaha wa nsina naka, onikaakhela miyo.
6 Masi, ole onimwiiriha mmosa a acikhaani ala anikaamini, ohiya waamini, fataari aatthukweleliwe muxikoni nluku nuulupale, khuriheliwa eriyari ya ephareya.
7 “Aatakhaliwa atthu a mulaponi, okhala wira anniwiiriha akina ohiya waamini! Ekeekhai wira anookhala ale aniwiiriha akhwaaya ohiya waamini, masi atthu awo aatakhaliwa!
8 Akhala wira ntata nanyu aahiiso nnawu nanyu ninnootthekihani,* mwiikitthe, murihele ottaiwene. Fataari ophwanya okumi mututhunyaka aahiiso murakanle ene, ohikhanle opwetexiwa voomalela ni mooro, murina ene matata oomanli ni inawu soopiili.
9 Nave-tho, akhala wira niitho nanyu ninnootthekihani,* musyoole,* murihele ottaiwene. Fataari ophwanya okumi murina ene niitho nimosa, ohikhanle oriheliwa oGehena* onipatta mooro, murina ene maitho oomanli.
10 Mwiipasoope wira muhimuthanye mmosa a acikhaani ala. Tthiri miyo kinoohimeeryani wira malaikha aya wiirimu, okathi wotheene ari vamaithoni va Tiithi aka ori wiirimu.
11 *——
12 “Nyuwo munoonela sai? Mutthu akhalana ipwittipwitthi 100, vano emosa erimeela, niireke khonrowa ohiya iye 99 omwaako, onarowa ophavelasa ele emosa erimenle?
13 Kinoohimeeryani ekeekhai wira: Aphwanya vale, onnitteeliwa murima vanceene mwaha wa emosa yeeyo, ovikana iye 99 sahaarimenle.
14 Siiso-tho, Tiithi aka* ori wiirimu, khoniphavela wira hata mmosa a acikhaani ala, orimeele.
15 “Nave, akhala wira munninyu ohootthekelani, murowe mwakumane nyuwo nuuwo paahi, mmooniherye etthu etthenke awe. Awiiwani, moomuttikiherya munninyu ephiro yooreera.
16 Masi aahiphavele owiiwani, murowe ni mutthu mmosa aahiiso atthu anli, wira khula mwaha ophukiweke yakhumelela anamoona anli aahiiso araru ahimyaka etthu emosa-ru.
17 Vano, aahiphavele owiiwa atthu awo, muhimye mmulokoni. Akhala wira khoniphavela wiiwa hata muloko, mmuthokoreryeke ntoko mutthu ohinaamini* ni mulipa-ooliviha mpoosito.
18 “Kinooleelani ekeekhai wira: Khula etthu enrowa anyu otthukwa vathi-va, enrowa okhala yootthukiwe ene wiirimu, nave khula etthu enrowa anyu otaphula vathi-va, enrowa okhala yootaphuliwe ene wiirimu.
19 Miyo kinooleelani-tho ekeekhai wira: Yakhala atthu anli a nyuwo anivarihana ovekela etthu ya faita, Tiithi aka ori wiirimu onoowiirela.
20 Tthiri, nipuro ninthukumana aya atthu anli aahiiso araru mwa nsina naka, miyo kiri eriyari aya”.
21 Vano, Pedru aahimwaattamela Yesu khumukoha wira: “Pwiya, munnaka akitthekela, kimuleveleleke ikwaha ikavi? Kiireke mpakha ikwaha 7?”
22 Yesu aamwaakhunle so: “Miyo nkinooleelani wira mpakha ikwaha 7, masi kinooleelani wira mpakha ikwaha 77.
23 “Tivo, Omwene wa wiirimu, pooti olikanyihiwaka ni mwene aaphavela waalokiha arumeyi awe yaamukophenle.
24 Okathi aapacenrye awe waalokiha, aahiruuhiwa mulopwana mmosa aamukophenle italento 10.000.*
25 Masi okhala wira khaarina musurukhu woolivana, mwene owo aahiruma wira mulopwana owo atumihiwe, vamosa ni amwaarawe, anaawe ni itthu sotheene saarina awe, wira olive musurukhu aakomphe awe.
26 Nto murumeyi owo aahikhoroma* ohoolo wa mwene, onahimya so: ‘Mukipixerye murima. Miyo kinimoolivani itthu sotheene’.
27 Mwene owo aahimmorela ikharari, khumuhiya orowaka, ni aahimulevelela aakomphe awe.
28 Nuumala murumeyi ole okhuma opuro ole, aahimphwanya murumeyi mukhwaawe, yoowo aamukophenle itenaario* 100. Nto, aahinvara exiko, onamphinyaka mmilo, ohimyaka wira: ‘Mukilive itthu sotheene mukikophenle anyu’.
29 Vano, murumeyi owo aahikhoroma,* onamuxonttela oriki: ‘Mukipixerye murima. Miyo kinimoolivani’.
30 Masi, khaaphavenle ompixerya murima, nto aahiruma owaleliwa mukhatteya, mpakha ophiya okathi aarowa awe oliva musurukhu aakomphe awe.
31 Okathi arumeyi akhwaawe voonale aya etthu ele yiiraneyale, yaahiriipiwa murima vanceene, khurowa omuleela mwene aya itthu sotheene saakhumelenle.
32 Nto mwene aahimwiihaniha murumeyi owo, omuhimeerya wira: ‘Nyuwo murumeyi ootakhala, miyo kihoolevelelani musurukhu wotheene okomphe anyu, maana mookivarela metto.
33 Nyuwo khimwaawerya ommorela ikharari murumeyi mukhwiinyu, ntoko miyo koomorenlyaakani ikharari?’
34 Nto, mwene owo aahinviruwela vanceene, onvahererya makwarta a mukhatteya wira amutthukwele, mpakha oliva musurukhu wotheene aakomphe awe.
35 Ti siiso Tiithi aka a wiirimu, onrowa awe owiirihani, vakhala wira khamunimulevelela munninyu ni murima wotheene”.
Inoota
^ Ekereku, “ninnookwattulihani”.
^ Ekereku, “ninnookwattulihani”.
^ Aahiiso, “mukumihe”.
^ Nwehe Moolumo Ootthokiheriwa.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Aahiiso, woonasa wene: “inyu”.
^ Ekereku, “mutthu a mulaponi”.
^ Italento 10.000 sa eparatha sirina esisapo ya idenaario 60.000.000.
^ Aahiiso, “aahikokhora”.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Aahiiso, “aahikokhora”.
