Matheyo 28:1-20
28 Vaavirale aya esaabadu, oxaka wa nihiku noopacerya na esumana,* Maria Madalena ni Maria mukina, yaahirowa oxukurya mahiye.
2 Niinaano-ru, yaahikhumelela etetere yuulupale, maana nlaikha na Yehova naahikhuruwa wiirimu, nipirikixa nluku naari vamukhora va mahiye, nikilaathela.
3 Nlaikha nlo naanaarya ntoko etari, nave ikuwo saya saari sootteelexa.
4 Makwarta, yaahoova vanceene, khupacerya othukumela, anakhala ntoko arimookhwa.
5 Masi, nlaikha naahaaleela athiyana ale wira: “Muhoove, maana koosuwela wira munimphavelasa Yesu, yoowo aiviwe vamwirini.
6 Owo khokhanle vaava, oohihimuxiwa, ntoko aahimmye awe. Murwe, moone opuro aavithiwe awe.
7 Nto mwaakuveke, mwaaleele awiixutti awe wira owo oohihimuxiwa mookhwaani. Nave-tho, onoohoola orowaka oGalileya. Weiwo tonrowa anyu onweha. Ela ti etthu kaarina aka wooleelani”.
8 Tivo, athiyana awo yaahivenya omahiye iwe, yoovaka ni atteeliwe ene murima vanceene, anatthimakela waaleela awiixutti a Yesu.
9 Nto, Yesu aahikumana naawo, onaahimeerya so: “Ihaali!” Awo yaahimwaattamela, anvara inawu sawe ni yuurama ohoolo wawe.
10 Vano, Yesu aahaahimeerya wira: “Muhoove! Murowe mwaaleele axinnaka wira aroweke oGalileya, weiwo tanrowa aya okiweha”.
11 Athiyana ale nlelo ari ene mphironi, makwarta makina yaahirowa opooma waaleela makhulupale a anamukuttho itthu sotheene siiraneyale.
12 Nuumala makhulupale a anamukuttho othukumana ni makhulupale a ayuda, yaahiiwanana waavaha atoropa ale yaari makwarta, musurukhu munceene wa eparatha,
13 yiiraka: “Muhimye wira: ‘Awiixutti awe yaahirwa ohiyu nirupaka, yiiya murutthu awe’.
14 Nto Pilato aiwa vale etthu ela, hiyo nnoomutthokiherya,* vano nyuwo muhixanke”.
15 Tivonto, makwarta ale yaahaakhela musurukhu owo, apaka ntoko yaatthokiheriwe aya. Siiso, wootha nno woosuweliwa ni ayuda otheene mpakha olelo-va.
16 Vano, awiixutti 11 yaahirowa oGalileya, omwaako Yesu aahimenrye awe wira yakumane.
17 Vaamoonale aya Yesu, awiixutti akina yaahuurama ohoolo wawe, masi akina yaanimuhoverya.
18 Yesu aahiwaattamela, onaahimeerya wira: “Muluku ookivaha okhulupale wotheene, wiirimu ni vathi-va.
19 Tivonto, murowe mwawiixuttiheke atthu a ilapo sotheene wira akhale awiixutti aka, mwaapatisaka mwa nsina na Tiithi, ni na Mwaana, ni na munepa woowaarya.
20 Mwawiixuttiheke weettela itthu sotheene koorumalyaakani. Vano, miyo kiri ni nyuwo mahiku otheene mpakha olumwenku* ola omala”.
Inoota
^ Nla ti nihiku nenno olelo-va ninsuweliwa okhala Ettiminku. Naari nihiku noopacerya na esumana ya ayuda.
^ Ekereku, “nnoomukupaliha”.
^ Nwehe Moolumo Ootthokiheriwa.
