Matheyo 4:1-25
4 Nto, munepa woowaarya waahimuroiha Yesu moothakoni. Vano Diabo aahirwa omweehererya Yesu.
2 Nuumala oviriha mahiku 40 ohilyaaka etthu* othana ni ohiyu, Yesu aahivoliwa etala.
3 Vano, Diabo aahimwaattamela onamweehererya,* omuhimeeryaka wira: “Nyuwo mwaari mwaana a Muluku, murume maluku ala wira athatuwe ephaawu”.
4 Masi Yesu aahaakhula wira: “Voolempwa wira: ‘Mutthu khonikhala mukumi mwaha wa ephaawu paahi, masi onnikhala mukumi ni khula nuulumo ninkhuma wa* Yehova’”.
5 Nto Diabo aahimuroiha oYerusalemu,* aahinweliha nipuro noorakamexa na etemplo,
6 khumwiirela: “Nyuwo mwaari mwaana a Muluku, mutuphele vathi vale, maana voolempwa wira: ‘Muluku onooruma malaikha awe’, nto ‘Awo animookaphulani mmatatani mwaya, wira inawu sanyu sihimane nluku’”.
7 Yesu aahimwaakhula oriki: “Voolempwa-tho wira: ‘Muhimweehererye Yehova, Muluku anyu’”.
8 Vano-tho, Diabo aahimuroiha Yesu vasulu va mwaako woorakamexa, khimooniherya omwene wotheene wa mulaponi ni ovuwa waya.
9 Nave aahimuleela wira: “Kinimoovahani itthu iye sotheene, mwakikokhorela ekwaha emosa paahi”.
10 Nto Yesu aahimwaakhula oriki: “Khuma-va, Satana! Maana voolempwa wira: ‘Mmukokhoreleke Yehova Muluku anyu, ni mmurumeeleke yoowo* paahi’”.
11 Vano Diabo aahimuhiya. Niinaano-ru, malaikha yaahirwa anamukhaliherya.
12 Nuumala wiiwa wira Yohani aahivariwa, Yesu aahikhuma orowaka oGalileya.
13 Nto aahikhuma oNazarethi onarowa okhala oKafarnawu, waattamela ephareya, mittetthe sa oZabuloni ni sa oNefetali,
14 wira yiiraneye ele yaalavuliwe ni profeta Yesaya, oriki:
15 “Nyuwo atthu a elapo ya oZabuloni ni ya oNefetali, munikhala waattamela estaraata enrowa ophareya, ekhopela ekina ya muro Yordani, oGalileya onikhala atthu a ilapo sikina!
16 Atthu yaari mweepiphini yaahoona waarya wuulupale, nto ale yaari vamuuttutthini woowiiva, ohaakhumelela waarya”.
17 Okhuma okathi ole, Yesu aahipacerya olaleerya oriki: “Murukunuxe mirima sanyu, okhala wira Omwene wa wiirimu ori vakhiviru”.
18 Yesu eettaka okerekhere wa ephareya ya oGalileya, aahaaweha anna anli, Simoni aihaniwa-tho Pedru ni muhima awe, aihaniwa Andreya, arihelaka ntthavi mphareya, okhala wira yaari atothi a ihopa.
19 Nave aahaahimeerya wira: “Mukitthareke, miyo kinimookhalihani atothi a atthu”.
20 Okathi ene yoowo, awo yaahihiya matthavi aya, anamutthara Yesu.
21 Avikanaka vakhaani, aahaaweha-tho alopwana anli yaari anna, Yakobo ni muhima awe, aihaniwa Yohani, yaawo yaari anamwane a Zebedeyo. Awo yaari mukalawani ni paapa aya Zebedeyo, alokihaka matthavi aya. Nto Yesu aahiwiitthana.
22 Okathi ene yoowo, yaahihiya ekalawa ni yaahimuhiya paapa aya, anamutthara Yesu.
23 Yesu aaheetteetta muttetthe wotheene wa oGalileya, owiixuttihaka atthu musinagoga* mwaya, aalaleeryaka ihapari sooreera sa Omwene, ni aapenuxaka iretta saya sotheene.
24 Ihapari sa Yesu saahimwareela elapo yotheene ya oSiiria. Tivo, aaniruuheliwa atthu otheene yaawereiwa iretta soovirikana, naale yaavariwe ni malaikha ootakhala, ale yaawereiwa ecili,* ni ale oorakala. Nto Yesu aanaapenuxa otheene aya.
25 Tivonto, mittitthi sa atthu saakhuma oGalileya, oDekaapoli,* oYerusalemu, oYudeya ni ilapo sa ekhopela ekina ya muro Yordani, saanimutthara Yesu.
Inoota
^ Aahiiso, “otthukwaka”.
^ Aahiiso, “onamutteha-tteha”.
^ Ekereku, “mwaano mwa”.
^ Ekereku, “muttetthe woowaarya”.
^ Aahiiso, “munvareleke muteko Muluku”.
^ Nwehe Moolumo Ootthokiheriwa.
^ Aahiiso, “ecile-cile”.
^ Aahiiso, “muttetthe wa Ipooma 10”.
