Miruku 14:1-35
14 Tthiri, muthiyana orina ankhili onnilipiha etthoko awe,Masi mulolo onnipwetexa ni matata awe.
2 Ole oneettela ephiro ya xariya, onnimoova Yehova,Masi ole onitthara iphiro sa atthu oowootha, khonimuttittimiha Muluku.
3 Moolumo a mutthu ohirina ankhili anlikana ni ekopo ya ohukhumu,Masi eyano ya atthu a ankhili enimwaakhapelela.
4 Saahikhale ipooyi, opuro onilya inama khonnanara,Masi sirumeeliwaka ikuru sa ipooyi sinnihemphwa soolya soowaatta.
5 Namoona oororomeleya khonootha,Masi namoona oohiroromeleya onihimya itthu soowoothiwa.
6 Mulipa-oovaanyiha onniwaavya ankhili ohinaphwanya,Masi mutthu oosuwela, waakuva waaphwanya.
7 Muhimwaattamele mutthu ohirina ankhili,Okhala wiira khamunrowa omphwanyana osuwela akhala wiira munoomwaattamela.
8 Ankhili annimwiiriha mutthu osuwela ephiro onirowa awe,Masi alolo anniwokiwa ni* ololo aya.
9 Alolo annitheya itampi anipaka aya,Masi eriyari ya anaxariya, onnikhala-vo olevelela.
10 Murima onnisuwela oxanka wawe,Nave khuuvo oniwerya okhaliherya ohakalala wawe.
11 Empa ya mutakhali enoopwetexiwa,Masi etenta* ya anaxariya enoolipihiwa.
12 Yookhala ephiro mutthu onoona awe wiira ti yooloka,Masi wookiseryani waya eniroiha wookhwaani.
13 Hata mutthu otheyaka, woonasa wene, murima onnoona owereya,Nave otteeliwa murima pooti okumiherya oriipiwa murima.
14 Mutthu ohiniroromeleya vamurimani vawe, onoohepha ele enaala awe,Masi mutthu ooreera murima, onootthuveliwa mwaha wa miteko sawe.
15 Mutthu ohinsuwela etthu, onnikupali khula nuulumo,Masi mutthu orina ankhili, onipacerya wuupuwela ohinatthi opaka etthu.
16 Mutthu a ankhili toomaala ni onnikhootta sootakhala,Masi mulolo towaakuva onanariwa ni toowiiroromela.
17 Mutthu oowaakuva onanariwa onnipaka itthu seelolo,Masi mutthu onuupuwelela, onninyokhiwa.
18 Atthu ahinsuwela etthu, anookhala alolo,Masi arina ankhili anootthuveliwa ni osuwela.
19 Atthu ootakhala animuurama ohoolo wa atthu ooloka,Nave atthu oohiloka anookokhora ohoolo wa mikhora sa anaxariya.
20 Mutthu oohaawa, onninyokhiwa hata ni akhwaawe,Masi thaaciri onnikhalana apatthani anceene.
21 Ole onimuthanya mukhwaawe onnipaka etampi,Masi ole onaamorela ikharari alipa-oohaawa, onnihakalala.
22 Niireke ale anipaka itthu sootakhala khanrowa omala-mala?
Masi ale aniphavela opaka itthu sooloka, anoophentiwa ni anoororomeliwa.
23 Khula muteko onivariwa mooluttuweliwa onniphwanyiha mureerelo,Masi olavulasa paahi onniruuha ohaawa.
24 Atthu a ankhili annireerihiwa ni mihakhu saya,Masi ololo wa atthu ahirina ankhili onniwiiriha otepa okhala alolo.
25 Namoona eekeekhai onnoopola ikumi,Masi namoona oowootha onilavula itthu soowoothiwa.
26 Mutthu onimuttittimiha vanceene* Yehova, onnimuroromela ni itthu sootheene,Nave anaawe mutthu owo, anoophwanya opuro wootthyawela.
27 Omoova Yehova ti maphattuwelo a okumi,Nave onnimoopola mutthu wookhwaani.
28 Mwene orina atthu anceene onaalamulela awe, onnittittimihiwa vaalupale,Masi namalamulela ohirina atthu onaalamulela awe, owerya wawe onoomala.
29 Mutthu ohinaakuva onanariwa ookhalana ankhili oowaatta,Masi ole ohinipixa murima, onnooniherya wiira mulolo.
30 Murima woomaala ti okumi wa erutthu,Masi nrima wuuttiha makhuva.
31 Ole onimwiiyerya mutthu oohaawa onninveha Ole ompanke,Masi ole onimmorela ikharari mulipa-oohaawa onninvuwiha Muluku.
32 Ole ori mutakhali onoomala-malihiwa mwaha wa otakhala wawe,Masi naxariya onookhapeleliwa mwaha wa ororomeleya wawe.
33 Mutthu oosuwela onnimaala ni ankhili awe,Masi mutthu ohirina ankhili, onimakela olaleya itthu onisuwela awe.
34 Nloko ninnivuwihiwa akhala wiira atthu a nloko nlo annipaka itthu sooloka,Masi okathi atthu a nloko nimosa anipaka aya etampi, nloko nlo niinnuulihihiwa muru.
35 Mwene onnisiveliwa ni murumeyi awe aapakaka itthu ni ankhili,Masi onninanariwa ni ale anipaka itthu soowuuliha muru.
Inoota
^ Aahiiso, woonasa wene: “annaawoka atthu akina ni”.
^ Aahiiso, “eheema”.
^ Eheeperi, “onimoova”.
