Miruku 20:1-30
20 Ole oniwurya eviinyu yinceene, onnikhala mutthu ooveeha, ni oopaca.Mutthu onipaka itthu soohiloka mwaha woowurya eviinyu, mulolo.
2 Woopiha wa mwene, onlikana ni kharamu onoopa mirukulu,Ole onimwiiriha mwene onanariwa, onnitthekela* okumi awe.
3 Atthu annimuttittimiha mutthu onisyaka onyakulihana,Masi alolo ootheene waasivela onyakulihana.
4 Mutthu oonyoonyiwa khonlima mwaha wooriirya,Owo onrowa ovekelaka okathi woohepha ohirina etthu.*
5 Miyuupuwelo sa murima wa mutthu, sinlikana ni maasi oowiixerya,Mutthu orina ankhili, onnikumiherya ota.
6 Atthu anceene annilaleya ophenta waya woororomeleya,Masi ti pani oniwerya omphwanya mulopwana oororomeleya?
7 Naxariya onneetta voororomeleya.
Anaawe anrowa okhumelela nuumala yena, anrowa ohakalalaka.
8 Okathi mwene onikilaathi awe veehiceni vawe wiira ophukeleke,Onnimala-maliha itthu sootheene sootakhala ohoolo wawe.
9 Ti pani oniwerya ohimya wiira: “Kooreeriha murima aka;Nkirina-tho etampi”?
10 Ipalansa soowiiya ni miphimo sihikhanle seekeekhai,Sinnimunanara vanceene Yehova.
11 Hata mwaana* onnisuwanyeya ni miteko sawe,Akhala wiira mweettelo awe ti wooloka ni wa xariya.
12 Maaru aniiwa ni maitho anoona,Ootheene aya apattuxiwe ni Yehova.
13 Muhiphenteke ikhove, mwiira siiso munoohaawa.
Mutthukule maitho, nto munookhalana yoolya yinceene.
14 Mulipa-oothuma onnihimya wiira: “Marotta ala khalonke, khalonke!”Masi okathi onirowa awe, owo onniittottopa mwaha wa nakoso omweettale awe.
15 Mutthu pooti okhalana eweero ni maluku oowaarya a mphareya,*Masi moolumo a mutthu orina ankhili, tootepa okhalana efaita.
16 Mukuxe nlaya na mutthu aaleihenrye wiira aamuliva itthu saakomphwale ni mutthu muhinimusuwela anyu, vakhala wiira mutthu owo kholinve.Mmukhanyererihe woovahani neemexeryo vakhala wiira owo omukophenle muthiyana a elapo ekina.
17 Ephaawu eniphwanyiwa ni wootha ennimusivela mutthu,Masi nuumala-vo, eyano awe ennisareya mihaava.
18 Sakohiwa miruku, apalano anneetta saana,Murumeelaka malakiheryo a mutthu a miruku, munoowerya owana ekhotto anyu.
19 Nawoothe onnimwara-mwarya isiiri;Muheetteke ni atthu oowaasivela waapa.
20 Ole onimutakhaliha paapa awe ni maama awe,Muthuko awe onoottipihiwa okathi enrowa aya okhumelela epiphi.
21 Mutthu onipacerya ophwanya mihakhu ni nrima,Wookiseryani waya khonreelihiwa.
22 Muhihimyeke wiira: “Kinooliva yootakhala ni yootakhala!”
Mmulipeleleke Yehova, owo onoowoopolani.
23 Yehova sinnimunanara vanceene miphimo sihikhanle seekeekhai,Nave epalansa yoowootha ti yoohiloka.
24 Mavalo a mutthu aneettihiwa ni Yehova;Mutthu oniwerya sai osuwela ephiro onrowa awe?
25 Muraakho muulupale, mutthu olavula ohuupuwenle oriki: “Kommanela natiri Muluku”,
Variki ohuupuwenle etthu onileiherya awe.
26 Siisaale nthakathaka ninvalaanyiwa aya ni ipyo,Mwa enamuna emosa-ru, atakhali annivalaanyiwa ni annikumihiwa ni mwene orina ankhili.
27 Moolumo a* mutthu anlikana ni muthuko wa Yehova,Annooniherya itthu siipithihiwe mweerutthuni mwawe.
28 Ophenta ni ororomeleya onnimukhapelela mwene,Mwaha wa ophenta woororomeleya onnilipiha ehice awe.
29 Ovuwa wa amiravo ti ikuru saya,Nave oreera wa atthu oowuuluvala, ipwi saya.
30 Ohukhummwa onninikhaliherya ohiya opaka itthu sootakhala,Ottaruxiwa onlikana ni etthu enreeriha itthu sootakhala vamurimani vahu.
Inoota
^ Aahiiso, “onnaariskari”.
^ Aahiiso, woonasa wene: “onrowa ophavelaka okathi woohepha, masi khonrowa ophwanya etthu”.
^ Aahiiso, “mmiravo”.
^ Nwehe Moolumo Ootthokiheriwa.
^ Eheeperi, “Iphumu sa”.
