Miruku 24:1-34
24 Muhaakhaleleke nrima atakhali,Nnakhala muheettanake,
2 Okhala wiira murima aya onniphavela itthu sootakhala,Nave iyano saya sinnilavula itthu soohiloka.
3 Etthoko ennitekiwa* arumeeliwaka ankhili,Nave ennilipihiwa arumeeliwaka ankhili awo.
4 Orumeeliwaka osuwela, isaala saya sinnisaryaItthu sootheene sa faita ni mihakhu sooreera.
5 Mulopwana orina ankhili ta ikuru,Nave orumeelaka osuwela, mulopwana onnincererya ikuru sawe.
6 Yakhala malakiheryo a mutthu a miruku, munoowerya owana ekhotto anyu,Nave yaatta anvaha miruku, onnikhala oxintta.*
7 Ankhili eekeekhai khaniphwanyiwa ni mutthu ohinuupuwela saana,Owo khorina etthu yoohimya vamukhora va epooma.
8 Khula mutthu onuupuwela etthu yootakhala,Onimwiihaniwaka mutthu orina muupuwelo wootakhala.
9 Miyuupuwelo sa mutthu ohinuupuwela saana, etampi,Nave atthu annimunyokha mulipa-ooveeha.
10 Mwakhulumuwa okathi wa mixankiho,Ikuru sanyu sinoovukuwa.
11 Nwoopole ale anroihiwa wookhwaani,Nave nwoopole ale ari mmaxakhani, anrowa wiiviwa.
12 Mwahimya wiira: “Masi khinaasuwela”,
Niireke ole onitokosa mirima khonrowa osuwela?
Aayo, Ole onoowehani onoosuwela,Nave onoomuliva khula mmosa moovarihana ni miteko sawe.
13 Mwanaka, mulyeeke oravo, okhala wiira ti wooreera,Oravo wa mmahepepeni ti woosiva para mwaano.
14 Mwa enamuna emosa-ru, musuweleke wiira ankhili tooloka para nyuwo,
Mwaaphwanya vale, mahiku anyu a ohoolo anrowa okhala ooloka,Nave nlipelelo nanyu khaninrowa omala-mala.
15 Muhiipithe ntoko mutthu ootakhala, waattamela etthoko ya naxariya,Muhipwetexe opuro awe woomumula.
16 Okhala wiira hata naxariya omoraka ikwaha 7, owo onoovenya-tho,Masi mutakhali onoomora mwaha wa mixankiho.
17 Nwanani anyu amora, muhihakalale,Nave akwattuliwa muhitteeliwe murima,
18 Mwiira siiso, Yehova onimoona ni khivanrowa omusivela,Nave Muluku onoohiya onanariwa nuuwo.*
19 Muhinyoonyiweke mwaha wa atthu ootakhala,Nave muhaakhaleleke nrima atthu ootakhala,
20 Okhala wiira atthu ootakhala khanlipelela etthu muhoolo,Nave muthuko wa atakhali onoottipihiwa.
21 Mwanaka, mmuttittimiheke vanceene* Yehova ni mwene.
Nave muheettaneke atthu aniphavela oturuka itthu,
22 Okhala wiira enimwaakhumelela ehasara vootutuxerya.
Khuuvo onisuwela ehasara atthu awo oowanli* anrowa aya waakumiherya atthu awo.
23 Moolumo ala ta atthu arina ankhili:
Okathi muniphuka anyu, khivanreerela waathanla atthu.
24 Ole onimuleela mutthu ootakhala wiira: “Nyuwo mwa naxariya”,
Onootakhalihiwa ni atthu, nave onoolamuliwa ni maloko.
25 Masi itthu sinooweettela saana ale animuttaruxa,Nave anooreelihiwa ni itthu sooreera.
26 Atthu anonvaha epeexo ole onilavula ekeekhai okathi onaakhula awe.*
27 Mpaceryeke olokiherya miteko sa vate ni itthu sootheene mmatta,Nuumala-vo, mutekeke empa anyu.*
28 Muhimukhalele onamoona mukhwiinyu, mwaahisuweleke itthu sootheene.
Nave muhirumeeleke eyano anyu wiira mwaawoke atthu akina.
29 Muhihimyeke wiira: “Kinoowiirela etthu emosa-ru akiirenle aya,Nave kinimwaattikiherya ekipakenle aya”.
30 Koovira ematta ya mutthu oonyoonyiwa,Nave koovira ematta ya ewuuva ya mutthu ohinuupuwela saana.*
31 Miyo kaahiweha ematta eyo ephimpe ene malaxi,Etthaya aya ekhuneeliwe ene ni oyele,Nave exiri ya maluku epwexakasiwe ene.
32 Kaahiweha eyo ni kaahihela vamurimani vaka;Kaahoona ni kaahiixutta etthu ela:
33 Mwarupa vakhaani, mwaphwanya ikhove vakhaani,Mwaikhuraana vakhaani mphavelaka omumula,
34 Ohaawa wanyu onimoorwa ntoko latarau,Nave othoiwa wanyu, onimoorwa ntoko mulopwana okunxe ikaruma sa ekhotto.
Inoota
^ Aahiiso, “Atthu a vatthokoni annitekiwa”.
^ Aahiiso, “woopowa”.
^ Eyo piiyo, nwanani owo.
^ Eheeperi, “mmooveke”.
^ Eyo piiyo, Yehova ni mwene.
^ Aahiiso, woonasa wene: “Waakhula vooluluwanya onlikana ni ovaha epeexo”.
^ Aahiiso, “mulipiheke etthoko anyu”.
^ Eheeperi, “ohirina murima”.
