Miruku 29:1-27
29 Mutthu onthipelela opaka itthu soohiloka nuumala ottaruxiwa ikwaha sinceene,Onoopwetexiwa mootutuxerya ni khivankhala murette.
2 Anaxariya yakhala anceene, atthu annitteeliwa murima,Masi okathi atakhali anilamulela aya, atthu anniriipiwa murima.
3 Mutthu onimusivela ankhili, onnimutteeliha murima paapa awe,Masi ole oneetta ni athiyana anamararuwa, onnihonona muhakhu awe.
4 Mwaha wa exariya, mwene onnilipiha elapo awe,Masi mutthu oniphavela okunyariwa, onnipwetexa elapo eyo.
5 Mulopwana oninveeha mukhwaawe,Onnireya muraakho para inawu sa mukhwaawe.
6 Etampi ya mutthu ootakhala, tekhanle muraakho awe,Masi naxariya, onnikhuwela otteeliwe ene murima ni otthapa.
7 Naxariya onnithokorerya itireitu sa alipa-oohaawa,Masi mutakhali khonithokorerya.
8 Atthu oowiittottopa annipattiha epooma,Masi ale arina ankhili, annimaliha onanariwa.
9 Okathi mutthu orina ankhili oninyakulihana awe ni mutthu ohirina ankhili,Onnikhala-vo onyakulihana ni otheya, masi khiivo enikhumelela.
10 Anawiive annimunyokha mutthu ohitthenke etthu,Nave anniphavela omwiiva naxariya.
11 Mulolo onnooniherya onanariwa wawe wootheene,Masi mutthu a ankhili onnimaala okathi wootheene.
12 Okathi namalamulela oniwiriyana awe itthu soowoothiwa,Arumeyi awe ootheene anookhala atakhali.
13 Mulipa-oohaawa ni mulipa-oohaaxa yookhala etthu anilikana aya:
Yehova onnaavaha okumi oowanli aya.
14 Okathi mwene onaaphukela awe alipa-oohaawa voororomeleya,Ehice awe enrowa okhalaka yoolipa okathi wootheene.
15 Ekopo* ni ottaruxiwa sinnivaha ankhili,Masi mwaana onihiyereriwa opakaka khula etthu, onnimuulihiha muru maama awe.
16 Okathi atakhali anincerereya aya, itampi sinnincerereya,Masi anaxariya animwaaweha atakhali epwetexiwaka.
17 Mmuttaruxe mwaninyu, nto owo onimoovahani murettele,Nave onimoosivelihani vanceene.
18 Saahikhale itthu sinooniheriwa ni Muluku,* atthu khanitthokiheya,Masi oohakalala taale aniiwelela malamulo.
19 Murumeyi khoneemererya ottaruxiwa ni moolumo paahi,Okhala wiira nnaamwi iiwexexaka, khoniiwelela.
20 Niireke mootoko onweha mutthu oowaakuva olavula?
Mulolo onnilipelela etthu ohoolo onvikana mutthu owo.
21 Akhala wiira murumeyi onoolemeihiwa okhuma omiravo awe,Owo onrowa okhala mutthu oohixukhuru.
22 Mutthu oowaakuva onanariwa, onnikumiherya ohiiwanana,Nave mutthu oowaakuva oviruwa, onnipaka itampi sinceene.
23 Mutthu oowiisoona onooyevihiwa,Masi mutthu oowiiyeviha onoovuwihiwa.
24 Ole ori mpatthani a latarau, onniinyokha mmansawe.
Owo onniihaniwa wiira okhale namoona, masi khonihimya etthu.
25 Owoova atthu muraakho,*Masi mutthu onimuroromela Yehova, onookhapeleliwa.
26 Atthu anceene anniphavela olavula ni* namalamulela,Masi exariya enikhuma wa Yehova.
27 Mutthu ohirina exariya onnithanyiwa ni anaxariya,Nave ole oneettela ephiro yooloka, onnithanyiwa ni mutthu ootakhala.
Inoota
^ Aahiiso, “Wiixuttihiwa”.
^ Aahiiso, “Yaahikhale malakiheryo a Muluku”.
^ Aahiiso, “ntapha”.
^ Aahiiso, woonasa wene: “anniphavela okhaliheriwa ni”. Eheeperi, “anniphavela omoona”.
