Miteko 12:1-25
12 Okathi ole, mwene Herodi aahipacerya waahaaxa atthu akina mmulokoni.
2 Owo aahaaruma atoropa awe omukuxa xoowa* wira amwiive Yakobo, munnawe Yohani.
3 Voonale awe wira eyo yaahaasivela ayuda, aahaaruma-tho atoropa awe onvara Pedru. (Eyo yiiraneyale mahiku a Iphaawu Soohiheliwa Eferemento.)
4 Nto, atoropa awo, yaahinvara Pedru, amurihela mukhatteya. Vano ikrupu xexe sa atoropa, saaniranttelana, sinwehawehaka Pedru. Khula ekrupu, yaarina atoropa axexe. Herodi aaphavela omphukela ohoolo wa atthu, nuuvira Paasikha.
5 Pedru otthukweliwe ene mukhatteya, muloko waaninvekelela voohihiyererya.
6 Ohiyu, wiiriwaka wira mmeeloni mwaya Herodi aarowa omphukela Pedru, Pedru owo, iira orupaka, otthukiwe ene matata awe ni ikwirinti piili, eriyari ya atoropa anli. Nave, yaahikhala makwarta yaawehaweha mukhora wa ekhatteya.
7 Niinaano-ru, naahikhumelela nlaikha na Yehova, vano opuro Pedru aatthukweliwe awe waahisareya waarya. Nlaikha naahimukwata mpararini, nnanvenxa, niiraka: “Nvenye, mwaakuveke!” Okathi ene yoowo, ikwirinti saatthukwaniwe awe matata awe, saahimora.
8 Nlaikha naahimuhimeerya wira: “Nware ikuwo sanyu ni isantaalya sanyu”. Pedru aahiira siiso. Nuumala-vo, nlaikha naahimuleela-tho wira: “Nware nlaya nanyu na ota, mukitthareke”.
9 Pedru aahikhuma mukhatteya, onatthara nlaikha nne. Masi owo khaasuwela wira itthu iye saapaka aya nlaikha saari seekeekhai. Owo oona wira aamuloha.
10 Nlaikha nle ni Pedru, yaahivira opuro aakhala awe kwarta oopacerya ni a nenli. Okathi yaaphiyale aya mukhora wa eyuuma, yoowo waaroiha opooma, mukhora owo waahihuleya mekhaya-ru. Vaakhumenle aya ota, awo yaahitthara ephiro. Niinaano-ru, nlaikha naahimuhiya Pedru.
11 Vano Pedru, aahisuwela etthu yiiraneya, onahimya wira: “Veekeekhai koosuwela wira Yehova ooruma nlaikha nawe, ni ookoopola mmatatani mwa Herodi, ni itthu sotheene sootakhala ayuda yuupuwela aya wira saamukiiraneela”.
12 Nuumala Pedru osuwela eyo, aahirowa owannyawe Maria, maama awe Yohani, yoowo-tho iireliwa Marko. Weiwo, yaahithukumana awiixutti anceene, anavekela.
13 Okathi Pedru aamanne awe mukhora, murumeyi muthiyana, yoowo aihaniwa Roda, aahirowa onweha ole aamana mukhora.
14 Murumeyi owo vaasuwenle awe wira naari nsu na Pedru, aahitteeliwa murima vanceene. Nto ohiya ohula mukhora, aahitthimakela mpaani onahimya wira Pedru eemenle vamukhora.
15 Awo yaahimuhimeerya wira: “Nyuwo muroovahuwa”. Masi murumeyi ole, aanithipelela ohimyaka wira Pedru aahirwa tthiri. Vano awo, yaahihimya wira: “Ti nlaikha nawe”.
16 Masi Pedru iira nlelo omanaka mukhora. Okathi yaahunle aya mukhora, khimoona Pedru, yaahitikinihiwa vanceene.
17 Pedru aahaavaha esinaale ni ntata wira amaale, ni aahaatthokiherya saana moota aakumihiwe awe mukhatteya ni Yehova. Nave-tho, aahihimya wira: “Mwamuleele Yakobo ni axinna akina itthu iya”. Nto, Pedru aahivenya, onarowa opuro mukina.
18 Nuumala oxa, atoropa yaahixanka mwaha woohisuwela etthu yaamukhumelenle Pedru.
19 Herodi aahimwaavya oratteene, khuhimphwanya. Nto, owo aahaakoha-koha makwarta ni aahiruma ohukhummwa. Siiso, Herodi aahikhuma oYudeya, onarowa okhala mahiku vakhaani oKesareya.
20 Vano Herodi aahinanariwa vanceene* ni atthu a oTiro ni a oSidoni. Atthu a ilapo iyo, yaanithuma yoolya mittetthe saalamuleliwa ni Herodi. Tivo yaahiiwanana, amuxonttela Blasto, yoowo aaweherya etthoko ya mwene Herodi, wira aakhaliherye. Siiso, yaahilavulana mwene, aphavelaka murettele.
21 Nihiku nimosa atthu yaathukumanne aya, Herodi aahiwara ikuwo sa omwene, ni aahikilaathi opuro waaphukiwa milattu, onapacerya olavula mwaha ohoolo wa atthu.
22 Vano atthu awo yaathukumanne, yaahikhuwela, yiiraka: “Ola olavunle muluku, khahiyo pinaatamu!”
23 Okathi ene yoole, nlaikha na Yehova naahimukumiherya eretta Herodi, okhala wira khanvuwinhe Muluku. Herodi owo, aahikhuuriwa ni miyunku,* khukhwa.
24 Vano nuulumo na Yehova naanitepa omwara-mwareya, nave atthu anceene yaanaamini.
25 Baarnaba ni Saulo, vaamalihale aya muteko wowaakhaliherya anna oYerusalemu, yaahitthikela wAntiyokiya amukunxe ene Yohani, yoowo-tho aihaniwa Marko.
