Miteko 21:1-40
21 Okhala wira nanvalaana naawo, naahiriipiwa murima vanceene. Nuumala-vo, naahinwela pakiti nnarowa oKoosi. Mmeeloni mwaya, naahirowa oRodi. Vano, naahikhuma weiwo nrowaka oPaatara.
2 Epooma ya oPaatara, naahimphwanya pakiti aarowa oFeniisia. Nto naahinwela, nnarowa.
3 Vano naahoona esisiro ya oKiipero, nihiya moono woothiyana. Naaheetta ni pakiti nrowaka oSiiria. Nto pakiti owo aaheemela oTiro, weiwo aarowa awe okuruxa miritti.
4 Naahiwaavya awiixutti, naaphwanya. Nto naahikhala naawo mahiku 7. Masi awiixutti awo, aleeliwaka ni munepa woowaarya, yaahimuhimeerya Paulo ikwaha sinceene wira ohirowe oYerusalemu.
5 Naamalinhe ahu oxukurya opuro ole, naahitthikela mukwaha ahu. Masi otheene aya, vamosa ni athiyana ni anamwane, yaahinihoola mpakha oporto.* Vano naahikokhora ophareya, nnavekela.
6 Nave, naahilaxeryana mukina ni mukhwaawe. Nuumala-vo, naahikela mpakitini, vano awo yaahitthikela mmawannyeya.
7 Vaamalihale ahu mukwaha ahu wa mphareya, naahikhuma oTiro nirowaka oTolemaida. Nto naahaakhomasa anna ni naahikhala ni yaawo nihiku nimosa.
8 Mmeeloni mwaya, naahivenya nnarowa oKesareya. Naahirowa owannyawe Filipe namalaleya, nikhala ni yoowo. Filipe owo, aari mmosa a alopwana ale 7 yaathanliwe ni arummwa oYerusalemu.
9 Mulopwana ola, aahikhalana anamwane axithiyana axexe yahaatheliwe.* Awo yaari maprofeta.
10 Nuumala okhala weiwo mahiku manceene, aahirwa profeta mmosa aihaniwa Aagabo, okhumaka oYudeya.
11 Profeta owo, aahirwa vaari ahu, aahikuxa esintu ya Paulo, aitthukwa inawu sawe ni matata awe, onahimya wira: “Munepa woowaarya onihimya wira: ‘Mwaneene esintu ela, onrowa otthukiwa siisa ni ayuda, oYerusalemu, nuumala-vo, anonvahererya mmatatani mwa amalapo’”.
12 Vaiwale ahu moolumo awo, hiyo ni anna a weiwo, naahimuxonttela Paulo wira ohirowe oYerusalemu.
13 Nto Paulo aahihimya wira: “Xeeni muninla anyu, ni munikiriipiha anyu murima?* Tthiri miyo, koolikanana otthukweliwa ni okhwa oYerusalemu mwaha wa nsina na Pwiya Yesu”.
14 Vaawehale ahu wira khinaawerya-tho omukhoottiherya, naahimaala, nnahimya wira: “Yiiraneye ele Yehova omphavela awe”.
15 Vaamanle aya mahiku awo, naahiilokiherya nnavenya nirowaka oYerusalemu.
16 Awiixutti akina a oKesareya, yaahinihoola mpakha oKiipero, owannyawe mulopwana mmosa aihaniwa Munasoni, yoowo aari mwiixutti okhuma woopaceryani. Hiyo naarowa omaka owannyawe.
17 Nuumala ophiya oYerusalemu, axinna yaahinaakhela voohakalala.
18 Mmeeloni mwaya, Paulo ni hiyo naahirowa wa Yakobo. Nave axitokweene otheene yaari weiwo.
19 Vano Paulo aahaakhomasa, aatthokiherya itthu sotheene Muluku aapanke awe eriyari ya ale yahaakhanle ayuda, mwaha wa muteko woolaleerya aavanre awe.
20 Okathi vaiwale aya moolumo ala, awo yaahinvuwiha Muluku, masi yaahimuleela Paulo wira: “Munna Paulo, moone wira wenno ahaavo ayuda oowaamini ikonto sinceene, nave otheene aya annikhalela nthiti weettela Nlamulo.
21 Awo ahiiwa vahimmwaka wira: ‘Paulo oniwiixuttiha ayuda otheene anikhala eriyari ya ale ahikhanle ayuda, wira avirikanyeke malamulo a Moise. Nave owo onihimya wira ahiwinnuwiheke anaaya, aahiiso aheetteleke soolema saya’.
22 Vano nipake exeeni? Tthiri awo animwiiwa wira muri wenno.
23 Tivo, mwiire ele ninhimya ahu: Aakhala-va, alopwana axexe ammanenle natiri Muluku.
24 Mwaakuxe alopwana awo, murowe mwaireerihe vamosa naawo. Nuumala-vo, muliverye itthu sotheene sinireerela wira ametthiwe ikharari. Siiso, atthu otheene anoosuwela wira itthu sinihimmwa mwaha wa nyuwo, sinimoothiwa, ohiya-vo, nyuwo mookhalana mweettelo wooloka ni munniiwelela Nlamulo.
25 Vano, ale oowaamini ahikhanle ayuda, nihaalepela epaphelo, naaleelaka suupuwenle ahu, wira akhootteke itthu sinivahiwa amuluku eethiru, ephome, inama soohihitiwa,* ni orupihana woohiloka”.*
26 Vano Paulo aahaakuxa alopwana awo, nto mmeeloni mwaya, aahipacerya wiireeriha vamosa naawo. Nuumala-vo, aahikela mutemplo wira ahimye okathi waarowa aya omala wiireeriha iwo, wira namukuttho, ovahe mukuttho wa khula mmosa a alopwana awo nihiku nenno.
27 Nto, ahalaka omala mahiku awo 7 a wiireeriha, ayuda a wAsia, yaahimoona Paulo mutemplo. Siiso, awo yaahiwiiriha atthu otheene onanariwa, nto yaahinvara Paulo,
28 anakhuwela yiiraka: “Nyuwo alopwana a wIsarayeli, munikhaliherye! Mulopwana ola ti yoole oniwiixuttiha atthu mapuro otheene, wira yaavirikanyeke atthu ahu, avirikanyeke Nlamulo nahu ni opuro ola woowaarya. Ohiya-vo, ohaakeliha mutemplo-mu akereku, nto aananariha opuro ola woowaarya”.
29 Awo yaahihimya siiso, okhala wira yaapacenrye omoona Paulo opooma ori ene ni Troofimo a wEefeso. Nto yuupuwela wira Paulo aahimukeliha mutemplo.
30 Atthu a epooma ele, yaaninyakula, nto otheene aya yaahitthimakela mutemplo, anvara Paulo, ampurulela ota wa etemplo. Niinaano-ru, mikhora saahiwaliwa.
31 Aphavelaka omwiiva Paulo, kumantanti a atoropa aahiiwa wira oYerusalemu waahikhumelela onyakulihana.
32 Niinaano-ru, owo aahaakuxa atoropa ni makhulupale a anakhotto, nto aahitthimakela opuro owo. Okathi atthu ale yanwenhe aya kumantanti a atoropa ni atoropa, yaahihiya ommana Paulo.
33 Nto kumantanti owo a atoropa, aahimwaattamela Paulo, aahinvara ni aahiruma otthukiwa ni ikwirinti piili. Nuumala-vo, aahaakoha atthu iiraka: “Mulopwana ola ti pani? Nave iirale-ni?”
34 Masi atthu akina a muttitthi ole, yaakhuwela etthu emosa, nave akina yaakhuwela etthu ekinaku. Nto onyakula iwo waamutepa mpakha kumantanti owo ohiwerya osuwela oratteene etthu yaakhumelenle. Tivo, aahaaruma atoropa omukuxa Paulo ni omuroiha okwartelo.
35 Okathi yaaphiyale aya opuro waaweliwa wira mutthu okele okwartelo, atoropa yaahaana omuteexa Paulo mwaha wa muttitthi ole wa atthu wahaareere owali,
36 okhala wira waanaatthara ottuli, okhuwelaka wira: “Mmwiive!”
37 Ohalaka vakhaani okela mukwartelo, Paulo aahimuleela kumantanti a atoropa wira: “Xontte, mukeemererye wooleelani etthu”. Kumantanti owo, aahimukoha wira: “Nyuwo munnisuwela olavula ekereku?
38 Nto nyuwo khamuhiyo mwExiitu yoole aawiirinhe atthu onvirikanya kuvernu, ni aaroihale moothakoni anawiive 4.000?”
39 Vano Paulo aahimwaakhula wira: “Mweekeekhai, miyo ka muyuda, kiyariwe oTarso wa oSilisia, epooma yoosuweliwa vanceene. Xontte, mukeemererye olavula ni atthu ale”.
40 Okathi kumantanti aamweemerenrye awe olavula, Paulo eemenle ene vaxikattani yaaroiha mukwartelo, aahaavaha atthu ale esinaale ni ntata. Awo yaahimaala, vano Paulo aahaalavuliha ni nttaava na eheeberi, oriki:
Inoota
^ Aahiiso, “opantari”.
^ Ekereku, “eharusi”.
^ Aahiiso, “munitteettheiha anyu murima aka”.
^ Aahiiso, “inama siniiviwa sihimwarexiwe ephome aya”.
^ Ekereku, porneía. Nwehe Moolumo Ootthokiheriwa.
