Miteko 25:1-27
25 Nuuvira mahiku mararu, okhuma vaavale Festo aapacenrye awe olamulela eprovinsia ya oYudeya, aahikhuma oKesareya orowaka oYerusalemu.
2 Vano makhulupale a anamukuttho ni alopwana oottittimiheya a ayuda, yaahirowa omuleela Festo, mulattu wa Paulo. Nto yaahipacerya omuxonttela Festo,
3 wira aawiriyane ni omuroihe Paulo oYerusalemu. Masi awo yampaka palano wira amwiipithele Paulo ni amwiive mustaraatani.
4 Festo aahiwaakhula wira Paulo aahaana otthukweliwa oKesareya, ni wira Festo owo aamutthikela weiwo voohipisa.
5 Festo aahihimya wira: “Mwaathanle alopwana akina anoohoolelani wira arowe ni miyo, yahimye mulattu orina awe, vakhala wira tthiri oopaka etthu yootakhala”.
6 Nuuvira mahiku 8 aahiiso 10 Festo ori ene naawo, aahikhuruwela oKesareya. Mmeeloni mwaya, aahikilaathi opuro waaphukiwa milattu, omwiihaniha Paulo.
7 Vaakenle awe Paulo, ayuda ale yaakhumme oYerusalemu yaaheemela, amurukurerya. Nto yaahimuhimyana itthu sinceene sootakhala, seiyo yahaawerya aya wooniherya wira saari seekeekhai.
8 Paulo aahiixaakiha ohimyaka wira: “Miyo nkitthekenle nnakhala Nlamulo na ayuda, nnakhala etemplo, hata nkimutthekenle Seesari”.
9 Festo ophavelaka waasiveliha ayuda, aahimukoha Paulo oriki: “Niireke munniphavela orowa oYerusalemu wira mwaphukeliwe ohoolo waka mwaha wa itthu iya?”
10 Paulo aahaakhula wira: “Miyo keemenle ohoolo wa opuro Seesari onikilaathi awe aaphukaka milattu, nto kihaana ophukeliwa vaava. Khiivo etthu yoohiloka kiwiirenle aka ayuda, ntoko nyuwo munisuwela anyu oratteene.
11 Akhala wira miyo ka mutthu ootakhala, nave akhala wira kihaana wiiviwa mwaha wa etthu etthenke aka, weeso kiiviweke, nkinrowa oxonttela wira kihiiviwe. Masi akhala wira itthu anikihimyana aya atthu ala, khahiyo seekeekhai, khuuvo okhanle ookivahererya mmatatani mwaya wira aasivelihe. Miyo kiniphavela orowa wa Seesari!”
12 Nuumala Festo olavula ni anamiruku, aahaakhula oriki: “Okhala wira muniphavela ophukeliwa ni Seesari, nto munrowa ophukeliwa ni Seesari”.
13 Vaavirale aya mahiku vakhaani, mwene Agripa ni mwaarawe aihaniwa Berenisi, yaahiphiya oKesareya wira amukhomase Festo.
14 Nto okhala wira yaahiviriha weiwo mahiku manceene, Festo aahimuleela mwene owo mulattu wa Paulo, oriki: “Ookhala-va mulopwana mmosa, yoowo Feelexi omuhiyale awe ootthukiwe ene.
15 Nto okathi kaaronwe aka oYerusalemu, makhulupale a anamukuttho ni makhulupale a ayuda, yaahimuhimyana itthu, ni yaahikivekela wira kimuhukhumu.
16 Masi miyo kaahiwaakhula wira nlamulo na aroma khanneemererya onvahererya mutthu ohinatthi okumana ni atthu animuhimyana mulattu, wira mutthu owo iixaakihe.
17 Nto okathi yaaphiyale aya ale yaamuhimyana mulattu, mmeeloni mwaya, kaahaakuvela okilaathi opuro oniphukiwa milattu, kiruma wira oruuhiwe mulopwana owo.
18 Atthu awo yaaheemela, anapacerya omuhimyana itthu sinceene, masi khiyaahimmye etthu yootakhala kuupuwela aka wira aahipaka.
19 Koonale wira awo yaavaanyihana mwaha wa etiini aya, ni mwaha wa mulopwana mmosa oniihaniwa Yesu, yoowo aakhwiiye, masi Paulo aathipelela awe ohimya wira aari mukumi.
20 Okhala wira nkaasuwela moota woophuka myaha iyo, kaahimukoha Paulo vakhala wira aaniphavela orowa oYerusalemu, wira aphukeliwe mwaha wa itthu iyo.
21 Masi okathi Paulo aavekenle awe wira osukiwe olipelelaka yoolakela ya Augustu,* kaahiruma wira osukiwe mpakha miyo omuroiha wa Seesari”.
22 Agripa aahimuhimeerya Festo wira: “Miyo kiniphavela onwiriyana mulopwana owo mmansaka”. Vano Festo aahiira: “Munonwiriyana meelo”.
23 Siiso, mmeeloni mwaya, nuumala orwa Agripa ni Berenisi yiivuwihaka vaalupale, yaahikela opuro waaphukiwa milattu, vamosa ni makumantanti a atoropa ni alopwana oottittimiheya a epooma ele. Vano Festo aahaaruma anakhotto wira amuruuhe Paulo opuro ole.
24 Festo aahiira: “Mwene Agripa ni nyuwo otheene muri ni hiyo, mmooneke mulopwana ola, yoowo ayuda otheene akivekenle aya oYerusalemu ni nno, akhuwelaka wira ola khoniphwanela-tho okhala mukumi.
25 Masi kaahoona wira mulopwana ola khopanke etthu enimwiiriha ophwanela wiiviwa. Nto okathi aavekenle awe wira aaphavela ophukeliwa ni Augustu, miyo kaahilakela omuroiha.
26 Masi nkirina etthu yoosuwanyeya wira kimulepele Pwiya aka, enimuhimya mulopwana ola. Tivo kimuruuhale aka ohoolo wa atthu ala otheene, vanceenexa ohoolo wanyu nyuwo mwene Agripa, wira mwamukoha vale, kikhalane etthu yoolepa.
27 Miyo kinoona wira, okathi mutthu mmosa otthukiwe oniroihiwa awe oRoma, vannireerela-tho ohimya mulattu ene otthukweliwe awe”.
Inoota
^ Ola mwiihaneliwo waavahiwa namalamulela a oRoma, khahiyo nsina na mutthu.
