Tito 1:1-16
1 Miyo Paulo, ka murumeyi a Muluku ni ka murummwa a Yesu Kristu. Waamini waka ni muteko aka ntoko murummwa, onivarihana ni waamini wa ale Muluku aathanlale awe, nave onivarihana ni osuwela weekeekhai, weiwo onooniherya moota woomurumeela Muluku.
2 Itthu iya sookhala mwaha wa nlipelelo na okumi woohimala, yoowo Muluku ohinootha, oleihenrye awe khalai ene.
3 Vano, ophiyaka-ru okathi aya, owo oosuweliha moolumo awe orumeelaka muteko wa olaleiwa ihapari sooreera. Miyo koothanliwa wira kilaleye ihapari iyo, kirummwaka ni Moopoli ihu, Muluku.
4 Kinnimulepela epaphelo ela Tito, yoowo ori mwanaka eekeekhai, mwaha wa waamini omosa-ru orina ahu:
Oreera murima wuulupale ni murettele wa Muluku Tiithi, ni wa Kristu Yesu, Moopoli ihu, okhale ni nyuwo.
5 Kihoohiyani oKereta wira mulokiherye itthu sihilonke, ni wira khula epooma mwaathanleke axitokweene, muttharaka malakiheryo ala koovahalyaakani:
6 Mutokweene ohaana okhala mutthu* ohiniphwanyaniwa mulattu, okhaleke mulopwana orina muthiyana mmosa paahi, okhalaneke anamwane animwaamini Muluku ni ahinihimmwa okhalana mweettelo woohiloka aahiiso oohiiwelela.
7 Okhala wira mutokweene onihoolela, yoowo onikhapelela myaha sa Muluku, ohaana okhala mutthu ohinihimyaniwa mulattu, ohikhaleke oowiisoona, ohaakuveke onanariwa, ohikhaleke namuhapaliwa, oowali, ohiphaveleke ophwanya itthu voohiphiyeriwa.
8 Masi, okhaleke oowaakhela aletto, osiveliweke itthu sooreera, uupuweleke vookhalela,* okhaleke naxariya, oororomeleya, oowiihiiha,
9 otthareke oratteene moolumo oororomeleya a Muluku okathi oniixuttiha awe, wira oweryeke waalipiha* akina orumeelaka mwiixuttiho wooreera* ni owooniheryeke wira aattheka ale anivaanyiha.
10 Tthiri aakhala alopwana anceene ahiniiwelela, anilavula ithiru, anaawoka akhwaaya ni anihimya wira atthu ahaana winnuwihiwa.
11 Muhaana owala iyano sa atthu awo, okhala wira annithipelela ohonona itthoko, yiixuttihaka itthu soohiloka, yiirelaka ophwanya etthu.
12 Profeta aya mmosa, oohimya wira: “Atthu a oKereta annootha okathi wotheene, anlikana ni inama sa mutakhwani sootakhala, toolosowa ni waasivela olya vanceene”.
13 Owo onihimya ekeekhai. Tivo, mwaapwapweleke ni ikuru wira yeetteke oratteene moowaaminini,
14 ehitthareke ihantisi sa ayuda ni sooruma sa atthu anihiya ekeekhai.
15 Itthu sotheene ti sooreera wa ale ooreera. Vano, wa ale oonanara ni ahirina waamini, khiivo etthu yooreera, okhala wira miyuupuwelo saya ni mirima* saya ti soonanara.
16 Awo annihimya ohoolo wa atthu anceene wira annimusuwela Muluku, masi itthu sinipaka aya sinooniherya wira annimukhootta, okhala wira awo toothanyeya, toohiiwelela, nave khanreerela ovara miteko sooreera.
Inoota
^ Ekereku, “Akhala mutthu”.
^ Aahiiso, “orina ankhili”.
^ Aahiiso, “waatumererya”.
^ Aahiiso, “wooloka; oniphwanyiha mureerelo”.
^ Nwehe Moolumo Ootthokiheriwa.
