Tito 2:1-15
2 Masi nyuwo, mwiixuttiheke itthu sinivarihana ni mwiixuttiho wooreera.*
2 Alopwana oowuuluvala ahaana osuwela wiiphimela itthu sotheene, ekhaleke oororomeleya, yuupuweleke vookhalela, ekhalaneke waamini woolipa, aphenteke vanceene, ni evileleke vanceene.
3 Siiso-tho, athiyana oowuuluvala ahaana okhalana mweettelo onimuttittimiha Muluku, ehiwootheryeke atthu, ehikhaleke ipottha sa eviinyu, yiixuttiheke itthu sooreera,
4 wira aweryeke waavaha miruku* athiyana oohuuluvala, wira athiyana awo oohuuluvala yaaphenteke axiiyaya, yaaphenteke anaaya,
5 yuupuweleke vookhalela, ekhalaneke mweettelo wooloka, evareke miteko sa vatthokoni vaya,* ekhaleke ooreera murima, ewiiweleleke axiiyaya voohinlaseya, wira nuulumo na Muluku nihiveehiweke.
6 Nave-tho, muhihiyeke waatumererya amiravo wira yuupuweleke vookhalela,
7 mukhaleke ntakiheryo na miteko sooreera, mwa itthu sotheene. Mwiixuttiheke itthu sooreera,* mooniheryaka ororomeleya,
8 murumeelaka moolumo ooreera* atthu akina ahinwerya aya ovaanyiha, wira ale anivaanyiha yuuliwe muru, mwaha woohiphwanya etthu yootakhala wira enihimyane.
9 Ale ari ipottha, ewiiweleleke voohinlaseya mwa itthu sotheene ale anaavarela aya muteko, ephaveleke waahakalaliha, ehaavaanyiheke,
10 ehiwiiyeryeke, masi yooniheryeke okhala oororomeleya vanceene, wira mwa itthu sotheene, ereeriheke mwiixuttiho wa Moopoli ihu, Muluku.
11 Mweekeekhai, Muluku ohooniherya oreera wawe murima wuulupale, weiwo onaaphwanyiha woopowa atthu a mikhalelo sotheene.
12 Oreera murima iwo, onniniixuttiha okhootta itthu sotheene sinivirikana ni ele Muluku oniphavela awe, vamosa ni itthu sootakhala sa olumwenku ola. Nave-tho, onniniixuttiha okhala olumwenku ola,* nrina ene muupuwelo wookhalela, ni exariya ni omoova Muluku.
13 Nave ninniwehererya wiiraneya nlipelelo noohakalaliha, ni okhumelela woovuwa wa Muluku muulupale, ni wa Moopoli ihu Yesu Kristu.
14 Owo oovaha okumi awe mwaha wa hiyo, siiso oonoopola itthu sotheene sootakhala, ni oonireeriha wira nikhale atthu awe, aniwerya ovara miteko sooreera ni nthiti.
15 Muhihiye wiixuttiha itthu iya, ni waatumererya* atthu, ni owooniherya vatthenke aya, okhala wira mookhalana owerya woopaka itthu iyo. Muhimuhiye mutthu ooyeveihakani.*
Inoota
^ Aahiiso, “wooloka; oniphwanyiha mureerelo”.
^ Aahiiso, “owiixuttiha”.
^ Aahiiso, “ekhapeleleke itthoko saya”.
^ Aahiiso, woonasa wene: “Mwiixuttiheke vooloka”.
^ Aahiiso, “ooloka; aniphwanyiha mureerelo”.
^ Aahiiso, “okathi ola”. Nwehe Moolumo Ootthokiheriwa.
^ Aahiiso, “waalipiha”.
^ Aahiiso, “oothanyakani; ooramusakani”.
