Wiisuupulula 15:1-8
15 Miyo kaahiweha-tho ethoonyeryo ekina wiirimu, yuulupale ni yootikiniha, nave kaahiweha malaikha 7, ekunxe ene ihasara 7. Iya ihasara sookiserya, okhala wira savira seiya, onanariwa wa Muluku onoomala.
2 Vano, kaahiweha etthu yaalikana ni ntthiya na eviituru, nootakaaheriwa mooro. Nave ale yaaxinttale enama yoowali, ni elatarato aya, ni nummuru ninthoonyerya nsina naya, yaaheemela ohoolo wa ntthiya nle na eviituru, yaavarenle ene aviola* a Muluku.
3 Awo yaaniipa nsipo na Moise, murumeyi a Muluku, ni nsipo na Mwaapwittipwitthi, yiiraka:
“Yehova, Muluku Oowerya Sotheene, miteko sanyu ti suulupale ni sootikiniha. Mwene a mahiku otheene, iphiro sanyu ti sa xariya ni seekeekhai.
4 Ti pani tthiri ohinrowa owoovani, nyuwo Yehova, ni ovuwiha nsina nanyu, okhala wira nyuwo paahi ti muri Muluku oororomeleya? Mweekeekhai, atthu a maloko otheene animoorwa wookokhorelani ohoolo wanyu, maana awo annoona wira munniphukela mwa xariya”.
5 Nuumala-vo, kaahiweha nipuro noowaarya* na eheema ya nivarihano,* nihuleiye ene wiirimu.
6 Nave-tho, kaahiweha malaikha 7 ekunxe ene ihasara 7, akhumaka nipuro nlo noowaarya,* ewanre ene malaya ooreera ni oowaarya, etthunkwe ene vapeeto* vaya ni ekuwo ya eweero.
7 Vano, mmosa a soopattuxiwa sikumi ixexe, aahivahererya malaikha ale 7 mihasa 7 sa eweero, seiyo saasareiye onanariwa wa Muluku, yoowo onikhala mahiku otheene ni voohimala.
8 Nave nipuro nlo noowaarya* naahisareya mwiixi mwaha wa ovuwa wa Muluku, ni mwaha wa owerya wawe. Nto khuuvo aawerya okela nipuro nlo noowaarya,* mpakha ovira ihasara 7 sa malaikha 7.
Inoota
^ Ekaruma ya isipo ya khalai, yeeyo enivirikana ni aviola a mihiku ala.
^ Eyo piiyo, Nipuro Noowaaryexa na etemplo.
^ Aahiiso, “eheema yooniherya wira Muluku aari naawo”.
^ Eyo piiyo, Nipuro Noowaaryexa na etemplo.
^ Aahiiso, “vatthirima”.
^ Eyo piiyo, Nipuro Noowaaryexa na etemplo.
^ Eyo piiyo, Nipuro Noowaaryexa na etemplo.
