Wiisuupulula 18:1-24
18 Nuumala-vo, kaahiweha nlaikha nikina naarina owerya wuulupale nikhuruwaka wiirimu. Nave, waarya waya waahimwaleela elapo ya vathi.
2 Nlaikha nlo naahikhuwela ni nsu noorunya, niiraka: “Oomora! Babilonia Muulupale oomora, nave oothatuwa nipuro ninkhala malaikha ootakhala, nenno malaikha otheene ootakhala* ni axipalame otheene oonanara ni oothanyeya anikhala aya!
3 Mweekeekhai, oowiiriha atthu a maloko otheene ohapaliwa ni eviinyu ya ophavela wawe vanceene orupihana woohiloka.* Nave, mamwene a mulaponi aarupihana voohiloka nuuwo, ni alipa a nakoso* a mulaponi aathaaciri mwaha wa itthu sinceene sa efaita, seiyo ohinuuleliwa awe muru wiithukumanyerya”.
4 Kaahiiwa nsu nikina nikhumaka wiirimu, niiraka: “Nyuwo atthu aka, mukhume-mmo, mwaahiphaveleke okhalana nthowa na itampi sawe, nave mwaahiphaveleke ohaawa ehasara emosa-ru nuuwo.
5 Itampi sawe khasinkontareya, nave Muluku onrowa omphukela mwaha wa itthu sootakhala opanke awe.
6 Mmwiirihe etthu ewiirinhe awe akina. Mmwiirihe vanli etthu iirale awe. Ekaalisi olokihenrye awe yoowurya, mmulokiherye ikwaha piili.
7 Okhala wira owo onniittottopa vanceene ni onniithukumanyerya mihakhu ohuuliwaka muru, weeso ohaana ohaawa ni wunla. Owo onnithipelela ohimya vamurimani vawe wira: ‘Miyo kinnilamulela ntoko pwiyamwene, nkihiyo naamukhweli, nave nkinikhala-khala kinlaka’.
8 Tivo, mwa nihiku nimosa, sinimoorwa ihasara sawe: okhwa, wunla ni etala. Nave, Muluku onompaha ni mooro, okhala wira Yehova Muluku, yoowo omphukenle, ta ikuru.
9 “Nave mamwene a mulaponi, yaawo yaarupihana voohiloka* nuuwo, ni yaakawana nuuwo itthu sa efaita aithukumanyerya awe ohuuliwaka muru, anrowa wunla ni wiimana vapeeto* yooniheryaka oriipiwa murima mwaha wa yoowo, okathi anrowa aya woonaka mwiixi wa opahiwa wawe.
10 Awo anrowa weemela ottaiwene, yoovaka ohaaxiwa wawe, ni anrowa ohimyaka wira: ‘Mai, mai nyuwo Babilonia, epooma yuulupale ni yoolipa, okhala wira ophukeliwa wanyu ohoorwa niinaano-ru!’
11 “Nave-tho, alipa a nakoso* a mulaponi, anninla ni wiikhupanyerya mwaha wa yoowo, okhala wira khuuvo-tho onrowa othuma marotta aya otheene.
12 Marotta otheene a eweero, eparatha, maluku oowaarya, ipeerola,* eliinyu yooreera, ikuwo sooripelela,* ikuwo soothererya, ni ikuwo sooxeerya. Nave-tho, itthu sotheene saapakiwa ni matera oowunkhela, ni itthu sotheene saapakiwa ni maino a etthepo, ni matera a efaita yuulupale, ni ekoopiri, ni eyuuma, ni nluku nniihaniwa maarmore.
13 Nave-tho marotta a ekanela,* ni itthu sa wIndia sininkheliha eyoolya, erupani, makhura oowunkhela, erupani yootteela, eviinyu, makhura a olivera, otthu wooreera,* etiriku, inyompe, ipwittipwitthi, ikhavalo, ikaaro sinipuruliwa ni ikhavalo, ipottha, ni atthu.
14 Tthiri, itthu sotheene sooreera sihoohiyani, nave soolya soosivexa ni itthu soolokexa sotheene sihoorimeelani, khamunrowa-tho ophwanya.
15 “Alipa a nakoso* yaatumiha itthu iya, yaawo yaathaacinri mwaha wa Babilonia owo, anrowa weemela ottaiwene, yoovaka ohaaxiwa wawe, ni anrowa wunlaka ni wiikhupanyerya,
16 ehimyaka wira: ‘Mai, mai nyuwo epooma yuulupale, nwanre ikuwo sa eliinyu yooreera, ni sooripelela* ni sooxeerya, ni mwiireerinhe vanceene ni eweero, ni maluku oowaarya, ni ipeerola,*
17 okhala wira mihakhu iyo sinceene soohononiwa niinaano-ru!’
“Khula kapitau onimweettiha pakiti ni khula mutthu onikuxiwa mpakitini-mmo, ni ale aneettiha ikalawa, ni otheene ale anivara muteko mphareya, animweemela ottaiwene,
18 awehaka mwiixi wa opahiwa wawe ni ekhuweleke, ahimyaka wira: ‘Khiivo epooma enlikana ni epooma ele yuulupale!’
19 Awo anrowa oyiiherya ntthupi mmuruni mwaya, ni anookhuwela yinlaka ni wiikhupanyerya, ariki: ‘Mai, mai nyuwo epooma yuulupale, yeeyo otheene ale yaarina apakiti mphareya yaaphwanya aya muhakhu mwaha wa yeeyo, okhala wira yoopwetexiwa niinaano-ru!’
20 “Nto mutteeliweke murima nyuwo munikhala wiirimu vamosa ni ale oororomeleya,* ni arummwa ni maprofeta, maana Muluku omphukela yoowo, mwaha wa itthu owiirenlyaaweni!”
21 Vano, nlaikha na ikuru naahikuxa nluku nuulupale ntoko nxilo nuulupale khurihela mphareya, niiraka: “Siisa, Babilonia muttetthe muulupale, onooriheliwa vathi mowaakuveya, nave khunrowa-tho ophwanyiwa.
22 Nave mwa nyuwo Babilonia, khuuvo onrowa omwiiwa mutthu iipaka ni omoopaka viola,* aahiiso omwiiwa mutthu orumihaka muusika wala oopaka ephivi,* nnakhala nlope. Khuuvo mutthu onisuwela ovara khula etthu onrowa-tho ophwanyaneyaka mwa nyuwo, nnakhala khivanrowa-tho wiiwanyeya mwa nyuwo oruma wa nxilo.
23 Mwa nyuwo, khonrowa-tho wooneya waarya wa muthuko. Mwa nyuwo, khaninrowa-tho wiiwanyeya nsu na mulopwana onithela,* ni nsu na muthiyana onitheliwa.* Tthiri, alipa a nakoso* anyu, yaari akhulupale a mulaponi. Nave-tho, muhoototha maloko otheene ni okhwiri anyu.
24 Mweekeekhai, mwa nyuwo, yoophwanyiwa ephome ya maprofeta, ni ale oororomeleya,* ni otheene ale yiiviwe mulaponi”.
Inoota
^ Aahiiso, woonasa wene: “iphumu; epheyo erina eveneno; moolumo anikhala ntoko anikhuma wa Muluku”.
^ Ekereku, porneía. Nwehe Moolumo Ootthokiheriwa.
^ Aahiiso, “alipa a nakoso yaawo aneetta opuro ti opuro amweettaka nakoso”.
^ Nwehe Moolumo Ootthokiheriwa.
^ Aahiiso, “vatthirima”.
^ Aahiiso, “alipa a nakoso yaawo aneetta opuro ti opuro amweettaka nakoso”.
^ Nluku na efaita yuulupale.
^ Aahiiso, “ekoore violeeta”.
^ Aahiiso, “ephepa yootteela”.
^ Onihimmwa mwiri, yoowo nikula naya nimpakiwa makhura oowunkhela.
^ Aahiiso, “alipa a nakoso yaawo aneetta opuro ti opuro amweettaka nakoso”.
^ Aahiiso, “ekoore violeeta”.
^ Nluku na efaita yuulupale.
^ Ekereku, “ale oowaarya”.
^ Ekaruma ya isipo ya khalai, yeeyo enivirikana ni aviola a mihiku ala.
^ Aahiiso, “eflauta”.
^ Aahiiso, “noivo”.
^ Aahiiso, “noiva”.
^ Aahiiso, “alipa a nakoso yaawo aneetta opuro ti opuro amweettaka nakoso”.
^ Ekereku, “ale oowaarya”.
