Wiisuupulula 7:1-17
7 Nuumala-vo, kaahiweha malaikha maxexe yeemenle ene ipantte ixexe sa elapo, evarenle ene oratteene ipheyo ixexe sa elapo, wira ehikhale epheyo yaarowa woopela elapo, ephareya aahiiso mwiri.
2 Kaahiweha-tho nlaikha nikina nikhumaka onikhuma nsuwa, nivarenle ene etthu yaakhenle aya wa Muluku wira yaaheleke ekanyeryo atthu. Vano, nlaikha nlo naahikhuwelela malaikha ale maxexe ni nsu noorunya, yaawo yeemereriwe ohonona elapo ni ephareya,
3 niiraka: “Muhihonone elapo, nnakhala ephareya nnakhala miri, mpakha hiyo omaliha waahela ekanyeryo arumeyi a Muluku vayuuci vaya”.
4 Nave, kaahiiwa nummuru naya ale yaaheliwe ekanyeryo, yaari 144.000, yaakumihiwe eriyari ya mahimo a Isarayeli:
5 Nihimo na Yuda, yaahiheliwa ekanyeryo atthu 12.000;
nihimo na Rubeni, 12.000;nihimo na Gadi, 12.000;
6 nihimo na Axeri, 12.000;nihimo na Nefetali, 12.000;nihimo na Manase, 12.000;
7 nihimo na Simeyoni, 12.000;nihimo na Levi, 12.000;nihimo na Isakari, 12.000;
8 nihimo na Zabuloni, 12.000;nihimo na Yosefe, 12.000;nihimo na Beniyamini, yaahiheliwa ekanyeryo atthu 12.000.
9 Nuumala-vo, kaahiweha muttitthi muulupale wa atthu, yaawo ahaakhanle mutthu aawerya waakontari, yaakhuma maloko otheene, mahimo otheene, makhuli otheene ni mattaava otheene, yeemenle ene ohoolo wa ehice ni ohoolo wa Mwaapwittipwitthi, ewanre ene malaya ootteela, ni ekunxe ene mmatatani mwaya makukhu a mikole.
10 Awo yaanithipelela okhuwela ni nsu noorunya, yiiraka: “Woopowa onikhuma wa Muluku ahu, yoowo okilanthi veehiceni, ni onikhuma wa Mwaapwittipwitthi”.
11 Nto, malaikha otheene yaarukurenrye ehice, ni axitokweene, ni soopattuxiwa sikumi ixexe, yaahikhoroma ohoolo wa ehice, enamukokhorela Muluku,
12 ahimyaka wira: “Amen! Muluku ahu a ankhili ni oowerya ni a ikuru, ottottopeliwe, ovuwihiwe, ottittimihiwe, ni oxukhureliwe mahiku otheene ni voohimala. Amen”.
13 Vano, mutokweene mmosa aahikikoha wira: “Tani ala awanre malaya ootteela, nave anikhuma woowi?”
14 Miyo kaahaakhula moohipisa, kiiraka: “Pwiya aka, ti nyuwo munisuwela”. Nto aahikihimeerya wira: “Ala ti yaale anikhuma mmaxakhani maalupale. Nave, aarapiha malaya aya ni aatteeliha mphomeni mwa Mwaapwittipwitthi.
15 Tivonto awo yeemenle aya ohoolo wa ehice ya Muluku, ni aninvarela aya muteko othana ni ohiyu mutemplo mwawe. Nto, Ole okilanthi veehiceni onrowa waakhapelela.*
16 Khanrowa-tho ovoliwa etala nnakhala ntthona, hata nsuwa khaninrowa waapaha, aahiiso khanrowa woona oviha,
17 okhala wira Mwaapwittipwitthi, yoowo ori eriyari ya ehice, onrowa waakukhula ni waaroiha mapuro aniphattuwa maasi a okumi. Nave, Muluku onrowa opuputtha maithori aya otheene”.
Inoota
^ Aahiiso, “owookolela eheema awe”.
