Yakobo 5:1-20
5 Mukiiwe vano, nyuwo athaaciri: munleke ni mukhuweleke mwaha wa itthu sootakhala sinrowa wookhumelelani.
2 Mihakhu sanyu sihintta, nave ikuwo sanyu sokhuuriwa ni axikokho.*
3 Eweero anyu ni eparatha anyu soolyiwa mukwitha.* Mukwitha owo onrowa okhala namoona onoovirikanyani, ni onrowa okhuura erutthu anyu. Itthu mwiithukumanyenrye anyu sinrowa olikanaka ni mooro mahiku ookiserya.
4 Moone! Anamuteko ahemphe mmatta mwanyu khanimaala wunla okhala wira khimwaalinve musurukhu aya. Nto, wunlela waya okhaliheriwa woophiya wa Yehova, yoowo onaahoolela anakhotto a wiirimu.
5 Nyuwo munnikhala saana vathi-va, mpuhaka ni ophavela wiihakalaliha. Munnoolya mpakha oneneva, ntoko inama sinlipelela nihiku ninrowa aya ohitiwa.
6 Nyuwo momphukela ni omwiiva naxariya. Muluku khonisiveliwa ni nyuwo.
7 Annaka, mpixeke murima mpakha okathi Apwiya anitthika* aya. Moone! Mulimi onnilipelela ipyo sooreera sa mmatta, opixaka murima mpakha orupa epula yoopacerya* ni yookiserya.
8 Nyuwo-tho mpixeke murima, mulipiheke mirima sanyu, okhala wira ohanle ophiya okathi Apwiya anitthika* aya.
9 Annaka, muhikhupanyaneke,* wira muhiphukeliwe. Moone! Mulipa-oophuka oheemela vamukhora.
10 Annaka, mwaatakiheke maprofeta, yaawo yaalavula mwa nsina na Yehova. Awo yaanivilela ohaawa ni yaanipixa murima.
11 Moone! Hiyo ninnaahimya atthu anivilela, okhala ootteeliwa murima.* Nyuwo muhiiwa ohimmwaka ovilela wa Yobi, nave moosuwela sooreera Yehova anvahale awe wookiseryani. Tthiri, Yehova toophenta vanceene ni toomoriwa ikharari.
12 Tivonto, annaka, muhilapheke muromolaka itthu siri wiirimu aahiiso vathi-va, nnakhala etthu ekina. Masi moolumo anyu oowi “aayo”, akhaleke aayo, nave moolumo anyu oowi “nnaari”, akhaleke nnaari, wira muhiphukeliwe.
13 Niireke ookhala mutthu onihaawa eriyari anyu? Othipeleleke ovekela. Niireke ookhala mutthu otteeliwe murima? Owo iipeke isipo sininvuwiha Muluku.
14 Niireke ookhala mutthu oniwereiwa? Owiitthane axitokweene a mmulokoni. Awo anonvekelela, anoomuttikitthela makhura mwa nsina na Yehova.
15 Nto mavekelo awo anipakiwa ni waamini, anoomwiiriha muretta* owo okhala saana, nave Yehova onompenuxa. Vakhala wira mutthu owo oopaka itampi, onooleveleliwa.
16 Tivonto, muhimyeke itampi sanyu, nvekelelaneke wira mpenuxiwe. Mavekelo ooxonttela a naxariya, aakhalana owerya wuulupale.*
17 Eliya aari mutthu ntoko hiyo, owo aahivekela, avaraka metto, wira epula ehirupeke. Nto epula khiyaarumpe mpakha iyaakha tthaaru ni miyeeri mithanu namosa.
18 Nuumala-vo, aahivekela-tho, nto epula yaahirupa, etthaya yaahiimiha mihokorokho.
19 Annaka, akhala mmosa a nyuwo ohapuxiwe ephiro ya ekeekhai, vano mukhwaawe onamuttikiherya ephiro eyo,
20 musuweleke wira ole onimwiiriha namattheka otthika ephiro yootakhala, onoomoopola* mookhwaani ni onookhuneela itampi sinceene.
Inoota
^ Aahiiso, “axiitthu”.
^ Aahiiso, “murawa”.
^ Nwehe Moolumo Ootthokiheriwa.
^ Aahiiso, “Muluku otthula”.
^ Nwehe Moolumo Ootthokiheriwa.
^ Aahiiso, “muhuupuleleke; muhinlaseyeke”. Ekereku, “wiittha iphumu”.
^ Aahiiso, “ooreelihiwa”.
^ Aahiiso, woonasa wene: “mutthu okhulumunwe”.
^ Ekereku, “aakhalana ikuru sinceene okathi anivara aya muteko”.
^ Aahiiso, “onimoopola okumi awe”.
