Yohani 14:1-31
14 Yesu aahincererya oriki: “Muhixanke. Mooniheryeke omwaamini Muluku, nave-tho mooniheryeke okaamini miyo.
2 Owannyawe Tiithi aka khareere mapuro ookhala. Vahaakhanle siiso, kaamoohimeeryani. Miyo kinrowa woolokiheryani opuro.
3 Nave-tho, karowa ni koolokiheryani opuro, miyo kinoohokolowa, kookuxeeni, wira opuro kinrowa aka okhalaka, nyuwo-tho mwakhaleke weiwo.
4 Nyuwo munnisuwela ephiro ya opuro kinrowa aka”.
5 Tome aahimuhimeerya wira: “Pwiya, hiyo khaninsuwela opuro munrowa anyu. Nto ninrowa osuwela sai ephiro ene?”
6 Yesu aahimuleela wira: “Miyo ka ephiro, ka ekeekhai ni ka okumi. Khuuvo onwerya orowa wa Tiithi, ohikhanle mwa miyo.
7 Vakhala wira nyuwo munnikisuwela, nave-tho munoomusuwela Tiithi aka. Okhuma okathi ola orowa ohoolo, nyuwo munnimusuwela. Mweekeekhai, nyuwo munninweha”.
8 Filipe aahimuhimeerya Yesu wira: “Pwiya, munooniherye Tiithi, eyo enooniphiyerya”.
9 Yesu aahimukoha wira: “Filipe, hata kikhanle ene ni nyuwosa okathi munceene, nlelo khamunikisuwela? Ole okiwenhe, nave-tho ohaaweha Atiithi. Vano, xeeni munihimya anyu wira: ‘Munooniherye Tiithi’?
10 Kiireke khamunikupali wira miyo kiri ni Atiithi, nave Atiithi ari ni miyo? Itthu kinoohimeeryaakani, nkinikumiha mmuruni mwaka, masi Atiithi, yaawo ari ni miyo, annivara miteko saya akirumeelaka miyo.
11 Mukupaliki ele enoohimeeryaakani wira miyo kiri ni Tiithi, nave Tiithi ori ni miyo. Aahiiso, mukupaliki mwaha wa miteko saka.
12 Tthiri, kinooleelani ekeekhai wira, ole onikaamini onoovara miteko sinivara aka, ni onoovara miteko suulupale ovikana iya, okhala wira miyo kinrowa wa Tiithi aka.
13 Nave-tho, khula etthu muniveka anyu mwa nsina naka, miyo kinoopaka, wira Atiithi avuwihiwe mwaha wa miteko Mwaana onivara awe.
14 Khula etthu muniveka anyu mwa nsina naka, miyo kinoopaka.
15 “Akhala wira munnikiphenta, munrowa weettelaka sooruma saka.
16 Miyo kinonvekela Tiithi aka wira oovaheeni namakhaliherya mukina, wira okhaleke ni nyuwo mahiku otheene.
17 Namakhaliherya owo ti munepa woowaarya, onisuweliha ekeekhai, yoowo olumwenku ohiniwerya aya waakhela, maana khoniwerya oweha, nnakhala khonisuwela. Nyuwo munnisuwela, okhala wira ori mwa nyuwo ni onikhala ni nyuwo.
18 Nkinrowa woohiyani ntoko ikwaasuni. Miyo kinimootthikelani.
19 Moohipisa, olumwenku khonrowa okiweha-tho, masi nyuwo munrowa okiweha, mwaha woowi miyo kinnikhala, nave nyuwo munrowa okhala.
20 Nihiku nlo, munoosuwela wira miyo kihiiraana ni Atiithi, ni wira nyuwo muhiiraana ni miyo, nave miyo kihiiraana ni nyuwo.
21 Ole oneemererya sooruma saka ni oniiwelela seiyo, ti yoowo onikiphenta. Ole onikiphenta, onoophentiwa ni Tiithi aka. Nave, miyo kinomphenta mutthu owo ni kinoomwiiriha okisuwela saana”.
22 Yuda mukina, ohiya Yuda Isikaryoti, aahimukoha Yesu oriki: “Pwiya, xeeni muniphavela anyu oniiriha woosuwelani saana, ohiya wiisuweliha wa atthu a moolumwenkuni?”
23 Yesu aahimwaakhula oriki: “Akhala mutthu onikiphenta, onimweettelaka moolumo aka. Vano Atiithi anomphenta owo, nto oowanli ahu nnimoorwa nikhaleke ni mutthu owo.
24 Ole ohinikiphenta, khoneettela moolumo aka. Moolumo muniiwa anyu khahiyo awaka, masi tawawe Tiithi okirumme.
25 “Miyo kinnilavula itthu iya, nlelo kiri ene ni nyuwo.
26 Masi namakhaliherya owo, eyo piiyo, munepa woowaarya, yoowo Atiithi anrowa aya oruuha mwa nsina naka, onoowiixuttihani itthu sotheene ni onoowuupuxeryani itthu sotheene koohimenryaakani.
27 Kinnoohiyeryani murettele. Kinnoovahani murettele aka. Murettele onoovahaakani, khonlikana ni murettele olumwenku onoovahaayani. Muhixanke aahiiso muhoove.
28 Mookiiwa kooleelakani wira: ‘Kinoorowa, nave kinimootthikelani’. Vakhala wira munnikiphenta tthiri, munootteeliwa murima mwaha woowi kinrowa wa Atiithi. Mweekeekhai, Atiithi taalupalexa okivikana miyo.
29 Niinaano-va, kihooleelani etthu ela ehinatthi okhumelela, wira mukupali okathi enrowa aya okhumelela.
30 Nkinrowa olavula-tho vanceene ni nyuwo, okhala wira namalamulela a olumwenku ola onnoorwa, masi owo khonikiwerya.*
31 Masi, wira olumwenku osuwele wira miyo kinnaaphenta Atiithi, kinniira siisaale Atiithi akirumme aya. Nvenye, nrowe nikhume opuro ola.
Inoota
^ Aahiiso, “khorina ikuru sinikivikana”.
