Mwaha 4: Nthowa Naya Ayelenlya Aya Etthoko Aya
NKAWEHANI yeeyo eniiraneya vano. Adamu ni Eva animoomoliwa mujardim mooreera mwa Eedeni. Nyuwo munnisuwela nthowa naya?
Nthowa noowi awo apanke etthu yoonanara vanceene. Tivonto Yehova onnaahukhumu awosa. Nyuwo munnisuwela etthu ene yoonanara yaapanka aya Adamu ni Eva?
Awo yaapanke etthu emosa yeeyo Muluku yaaleelalya awe wira ahipake. Muluku aahaahimeerya awo wira alyeeke mihokorokho sa mirii sa mujardim. Masi sa mwiri mmosa Muluku aahimmye wira ahilyee, yalyaru yaamookhwa. Owo aahisuka mwiri owo ntoko awawe. Ni hiyo ninnisuwela wira ti voonanara okuxa etthu ya mutthu mukina, khahiyo siiso? Saana, exeeni yiiranen’ye?
Nihiku nimosaa vaavo Eva aarya awe mekhawe mujardim, enowa yaahilavula n’uwo. Nkaapuwelani eyo! Eyo yaahiwiirela Eva wira alye muhokorokho wa mwiri yoole Muluku aahimmya awe wira ahilyee. Vano, vaavo Yehova vaapanka awe inowa khaapanke wira iyo silavuleke. Siiso ela pooti otaphulela wi mutthu mukina paahi tiirinhe wi enowa elavuleke. Owo aari aani?
Owo khahiyo aari Adamu. Siiso aari mmosa aatthu yaale Yehova aapanka awe khalai ohinatthi opattuxa elapo ya vathi. Atthu ale arii malaikha, ni hiyo khinniwerya owoona awosa. Nlaikha nna nimosaa naahikhala nowiixiinnuuha vanceene. Nno naahipacerya wuupuwelela wira nahaana okhala namalamulela ntoko Muluku. Nto naaphavela wi atthu yiiweleleke nno mmapuro mwa omwiiwelela Yehova. Nno naari nlaikha niirinhe wira enowa elavuleke.
Nlaikha nna naahiwerya waawoka Eva. Vaavo naalavunlya aya ni Eva wi awo yaarowa okhala ntoko Muluku akhala wi yaamoolya muhokorokho, awo yaahikupali eyo. Siiso yaahilya, ni Adamu yaahiira siiso-tho. Adamu ni Eva khiyaamwiiwelenle Muluku, ti nthowa naya awo vaayelenlya aya etthoko aya, ejardim yooreera.
Masi nihiku nikina Muluku onrowa ottittimiherya wi elapo yotheene ya vathi ekhalee yooreera ntoko ejardim ya wEedeni. Muhoolo ninrowa wiixutta moota nyuwo sinrowa anyu wiirela mpantta mu opaka eyo mmukhalelo ola. Masi vano, nrowee noone yeele ewiiranenle Adamu ni Eva.
Maphattuwelo 2:16, 17; 3:1-13, 24; Wisupulula 12:9.
Makoho
- Valataratoni vo, exeeni eniwiiraneela Adamu ni Eva?
- Nthowa xeeni Yehova aahukhummye awe awo?
- Enowa yaamuhimenrye exeeni Eva?
- Tani iirinhe enowa olavula ni Eva?
- Nthowa xeeni Adamu ni Eva vaayelenle aya etthoko aya eParayiisu?
Makoho oowuncererya
- Musome Maphattuwelo 2:16, 17 ni 3:1-13, 24.
Moota xeeni nikoho na enowa wa Eva nanvaanyinha aya Yehova? (Maph 3:1-5; 1 Yoh 5:3)
Moota xeeni Eva vanirumeela aya ntoko ntakiheryo noolopola wa hiyo? (aFil 4:8; Yak 1:14, 15; 1 Yoh 2:16)
Mmukhalelo xeeni Adamu ni Eva yaavonnya aya mwa waakhulela muritti mwaha wa sowiira saya? (Maph 3:12, 13)
Moota xeeni makherubi yaakuhiwe mpantta wa onikhuma nsuwa wa ejardim ya Eedeni yaakiha aya olamulelo wa Yehova? (Maph 3:24)
- Mmusome Wisupulula 12:9.
Satana okhumenle saana mpakha vaavi mwa waahapuxa atthu moovaanyihana ni olamulelo wa Muluku? (1 Yoh 5:19)
