IYAAKHA sinnivira—iyaakha 10, iyaakha 20, iyaakha 30, iyaakha 39! Nlelo anaIsarayeli arisa mothakoni. Masi iyaakha sotheene iya Yehova onnaakhapelela atthu awe. Owo onaalyiha ni emanaa. Othana onaahoolela ni neeku nto ohiyu ni mooro. Nto iyaakha sotheene iya ikuwo saya khisinthaala ni inawu saya khisiniipa.

Vano ola mweeri woopacerya a mwaakha wa 40 nuumala okhuma wEjiitu. AnaIsarayeli animaka vasyaa-tho oKadexi. Ola opuro yoole waakhanle aya vaavo vaarumihiwa aya anamahottela 12 orowa oweha elapo ya oKanani sihinatthi waattamela iyaakha 40. Miryamu murokorawe Moise onnookhwa oKadexi. Ntoko mukwaha ole, va, vaakhala muxankiho.

Atthu khaniphwanya hataa maasi. Siiso awo anninlaseya wa Moise ariki: ‘Fataari naakhwiiye. Xeeni munikumihaka wEjiitu khiniruuhaka nipuro nla nootakhala nihinimela etthu? Khivakhanle inukuu, ifiigu, uuva ni iromaa. Kakhanle-tho hataa maasi oowurya.’

Vaavo Moise ni Aroni vanrowa aya ovekela otabernaakulu, Yehova onimuleela Moise wira: ‘Mwaathukumanye poromosa atthu awo. Nuumala vo ohoolo wa otheene mulavulele mwala ole vale. Maasi oophiyerya anrowa okhumela wa atthu ni inamaa saya sotheene.’

Siiso Moise onaathukumanya atthu ni onahimya so: ‘Wiriyanani, nyuwo muhinimuroromela Muluku! Aroni ni miyo nookumiheryekeni maasi vamwala-va?’ Nuumala vo Moise onimana mwala vanli ni ttootto, nto maasi manceene annikhuma vamwala ntoko muroo. Aakhala maasi oophiyerya owurya atthu otheene ni inamaa.

Masi Yehova oonanariwa ni Moise ni Aroni. Nyuwo munnisuwela nthowa naya? Nthowa noowi Moise ni Aroni aahimya wira awo yaarowa okumiha maasi vamwala. Masi mwekeekhai, Yehova taakumihenrye. Nto okhala wira Moise ni Aroni khiyaalavunle ekeekhai voohimya sa ela, Yehova onihimya wira onrowa waahukhumu awosa. ‘Khimunrowasa waahoolela atthu aka okela muKanani,’ owo onnihimya.

Mowaakuveya anaIsarayeli annikhuma oKadexi. Vattuli va okathi vakhaani awo aniphiya Mwaako wa Hori. Va, vasuluu va mwaako, Aroni onnookhwa. Owo orina iyaakha 123 okathi onikhwa awe. AnaIsarayeli arii ooriipiwa murima vanceene, siiso mmahiku 30 atthu otheene annimunlela Aroni. Eleyazari mwanawe onnikhala muulupale aanamukuttho oottharelana a nloko na Isarayeli.

Mothakoni 20:1-13, 22-29; Nehemiya 9:21.