Mwaha 111: Mmiravo Yoowo Aarumpe
OH! EXEENI eniiraneya va? Niireke wira mmiravo owo ommaathale vathii-vo oovulala vanceene? Nkawehani! Mmosaa a alopwana awo onikhuma mpaani mmo ti Paulo! Nyuwo munniwerya omoona-tho vale Timooteyo? Toko mmiravo ole aamonre vaxanelani?
Aayo, eyo tiyiiranen’ye tthiri. Paulo aalavula mwaha wa awiixutti muTrowade mu. Owo aahisuwela wira khaarowa owoona-tho mu okathi woorakamela okhala wira owo aahaana weetta mukwaha ni ekalawa mmeeloni mwaya. Siiso owo onnivikaniha olavula mpakha ohiyu eriyari.
Saana, mmiravo ola oniihaniwa Eutiko aakilaathale vaxanelani, nto owo aahipacerya orupa. Owo aahimorela vathii, okhumaka vaxanelani, mu andaari a neeraru! Siiso nyuwo munoowerya woona nthowa naya atthu awo arisa aya ooxenkereyexa. Vaavo alopwana awo vanimukuxa aya mmiravo owo, orii siisaale ntoko woova waya. Owo ohookhwa!
Vaavo Paulo vanoona awe wira mmiravo owo ohookhwa, onnimmaathi vasuluu vawe ni onamukhupaarela. Nuumala vo onihimya so: ‘Muhixankee. Ola mukumi!’ Nto mukumi tthiri! Ola mutikiniho! Paulo oomuttikiherya okumi! Ohakalala onnimwaramwareya mmuttitthi wotheene.
Otheene aya anniwela-tho ni analya. Paulo onnivikaniha olavula mpakha oxaa. Masi nyuwo munoowerya ottittimiherya wira Eutiko khaarumpe-tho! Nuumala vo, Paulo, Timooteyo ni otheene arina aya mmukwahani hoothe anniwela mukalawani. Nyuwo munnisuwela weiwo onirowa aya?
Paulo ohanle omaliha mukwaha awe wa neeraru wa olaleerya, nto owo orii mu ephiro yoorowa owaani. Mmukwaha ola Paulo aahikhala mekhawe iyaakha tthaaru mmuttetthe wa Eefeso. Siiso ola mukwaha woorakamexa ovikana mukwaha awe wa nenli.
Vattuli va okhuma oTrowade, ekalawa eneemela oMileto mu okathi wa vakhaani. Okhala wira Eefeso orii erakamelo ikiloomo vakhaani paahi, Paulo onniwiihaniha axitokweene a mmulokoni wira arwe oMileto siiso owo onoowerya olavula n’awo mmukwaha wookiserya. Vattuli vaya, vaavo vaniphiya aya okathi wira ekalawa ekhume, moota arisa aya ooriipiwa murima onweha Paulo orowaka!
Wanikisa waya ekalawa enitthikela oKesareya. Nlelo Paulo oryeene va owannyawe mwiixutti Filipe, mprofeta Haagabo onnimulopola Paulo. Owo onihimya wira Paulo onrowa opakiwa okhala namutthukiwa vaavo vaniphiya awe oYerusalemu. Ni siiso tthiri, ela ti etthu eniiraneya. Nuumala vo, vattuli va okhala mukhatteya miyaakha miili oKesareya, Paulo aahiroihiwa oRoma wira aphukeliwe ohoolo wa Ceesari namalamulela muRoma. Nrowee niwehee eniiraneya mmukwaha wa oRoma.
Miteko miru 19 mpakha 26.
Makoho
- Valataratoni va, mmiravo ommaathale vathii tanii, ni exeeni emwiiranenle?
- Paulo onipaka exeeni vaavo vaniweha awe wira mmiravo owo ohookhwa?
- Paulo, Timooteyo, ni atthu arina awe vamukwahani anirowasa woowi, ni exeeni eniiraneya vaavo vaneemela aya oMileto?
- Yoolopola xeeni mprofeta Haagabo eninvaha awe Paulo, nto moota xeeni sinaakhwanela aya ntoko siisaale mprofeta sinilavula awe?
Makoho oowuncererya
- Mmusome Miteko 20:7-38.
Moota xeeni siniwerya ahu ohikhalana ‘mulattu wa ephomee ya atthu otheene,’ moovarihana ni masuu a Paulo ahimmwale mMiteko 20:26, 27? (Ezek 33:8; Mit 18:6, 7)
Nthowa xeeni axitokweene yaatthuneya aya okhala ‘ootthara ni nthiti Ehapari y’Ekeekhai’ vaavo vaniixuttiha aya? (Mit 20:17, 29, 30; Tito 1:7-9; 2 Tim 1:13)
- Mmusome Miteko 26:24-32.
Moota xeeni Paulo aarumenlya awe ehakhi awe ya okhala ntoko muRoma wira aakhwaniherye muteko woolaleerya yoowo aakhenlya awe wa Yesu? (Mit 9:15; 16:37, 38; 25:11, 12; 26:32; Luk 21:12, 13)
