Yesu orwaaka valaponi aarwenle olaleya ihapari sooreera sa Omwene wa Muluku. Wira Yehova ooniherye itthu Yesu onrowa awe opaka ntoko Mwene, aahinvaha owerya woopaka miiriirya. Yesu aaniloola khula aretta. Khula opuro aarowa awe, atthu yaawereiwa yaanimurweela wira aakhaliherye, ni aanaapenuxa otheene aya. Atthu yahaawerya woona, yanoona, atthu yahaalavula, yaanilavula, atthu oorakala yaaniwerya weetta, atthu yaavariwe ni malaikha ootakhala yaanitaphuliwa. Hata atthu yaale yaavara paahi ikuwo sawe, oretta aya waanimala. Muttitthi wa atthu waanimutthara Yesu khula opuro aarowa awe. Hata okathi Yesu aaphavela awe okhala mekhawe, khaawoomola atthu.

Nihiku nimosa, atthu yaahimukuxa mulopwana mmosa oorakala amurowana empa aari awe Yesu. Vano empa ele yaahikhala atthu anceene, ni atthu ale yaamuruuhale mulopwana ole khiyaawerya okela muhina. Nto yaahikwanyula empa ele vasulu ni yaahimukuruxela mulopwana ole opuro aari awe Yesu. Nuumala-vo Yesu aahimuhimeerya wira: ‘Nvenye, mweetteke’. Mulopwana ole aahivenya nto atthu ootheene yaahitikinihiwa.

Okathi mukina, vaavo Yesu aaphiyale awe muttetthe mmosa, anamakuttula 10 yaahikhuwela so: ‘Yesu munikhaliherye!’ Okathi ole, anamakuttula khiyeemereriwa owaattamela atthu akina. Yesu aahaaleela anamakuttula ale wira erowe otemplo, sintoko Nlamulo na Yehova naaruma aya atthu nuumala ovonihiwa. Erowaka siiso, maretta aya yaahimala. Vaavo mmosa a yaawo aawenhe awe wira aahikhala saana, aahitthika ni aahimuxukhurela Yesu ni aahimuttottopela Muluku. Mooriipiha murima, mwa  aalopwana ale 10, aatthikenle omuxukhurela Yesu ti yoola mmosa paahi.

Aahikhala muthiyana mmosa aavirinhe iyaakha 12 owereiwaka, nto uupuwela wira oretta awe khiwaarowa omala. Owo aahimwaattamela Yesu ni aahivara ikuwo sawe. Okathi ene yoowo, aahikhala saana. Nto Yesu aahikoha so: ‘Ti pani okivanre?’ Muthiyana ole aahoova, masi aahikokhora ohoolo wa Yesu khumuhimeerya etthu yiiraneyale. Yesu aahimwiirela wira: ‘Mwanaka, murooke ni murettele!’

Mukhulupale mmosa a musinagoga aitthaniwa Jairo aahinvekela Yesu oriki: ‘Murwe owannyaka, okhala wira mwanaka mmoseene mwaamuthiyana onoowereiwa’. Masi ohinatthi Yesu ophiya owannyawe Jairo, mwaana ole aahikhwa. Okathi Yesu aaphiyale awe, aahaaweha atthu anceene yinlaka ni emusi ele. Vano Yesu aahiwiirela so: ‘Muhinle, ola onoorupa paahi’. Nuumala ohimya siiso, Yesu aahinvarela ntata mwaana ole ni aahimwiirela so: ‘Mwanamwane, nvenye!’ Naananoru mwaana ole aahivenya, nto Yesu aahaaruma axipapawe onvaha eyoolya. Nkuupuwelani moota axipapawe yaahakalanle aya!