Yosafati, mwene a oYuda, aahaapwexa altari otheene ni ilatarato sotheene sa Bayali elapo ya oYuda. Yosafati aaphavela wira atthu otheene esuwele malamulo a Yehova. Nto aahaaruma makhulupale awe, ni aLevi orowa mittetthe sotheene sa oYuda, wira yawiixuttihe atthu malamulo a Yehova.

Maloko oowaattamela, yaahoova waatuphela aYuda maana yaahisuwela wira Yehova aanaakhaliherya atthu awe. Awo yaahimuroihela soovaha mwene Yosafati. Atthu a oMowabi ni atthu a wAmoni vamosa ni ale a muttetthe wa oSeyiri, yaaniphavela waatuphela aYuda. Yosafati aanisuwela wira aanitthuneya okhaliheriwa ni Yehova. Owo aahaathukumanya alopwana otheene, athiyana, ni anamwane oYerusalemu. Nto aaheemela ohoolo wa atthu otheene, khuvekela so: ‘Yehova, hiyo khaninwerya oxintta nihikhaliheriwaka ni nyuwo. Xontte munileele etthu yoopaka’.

Yehova aahaakhula nivekelo nle ohimyaka so: ‘Muhoove. Miyo kinimookhaliheryani. Mweemele paahi, mwaalitteke, munimoona moota miyo kinrowa aka owoopolani’. Yehova aawooponle sai?

Mmeeloni mwaya vaasiisu, Yosafati ahaathanla alipa-oowiipa ni aahaaruma weetta ohoolo wa anakhotto. Anakhotto ale yaahikhuma oYerusalemu khurowa opuro waawaniwa ekhotto wiitthaniwa oTekowa.

Okathi alipa-oowiipa yaapacenrye aya omwiipela Yehova ni nsu nowiiwanyeya, Yehova aahaatuphela awanani aya. Owo aahiwiiriha atthu a wAmoni ni atthu a oMowabi ohiiwanana nto khupacerya owana yaaworu, mpakha wiivana otheene. Yehova aahiwaakiha atthu a oYuda, anakhotto, ni anamukuttho. Atthu otheene a ilapo saattamenle yaahiiwa ele Yehova aapanke awe, nto yaahisuwela wira Yehova nlelo aaniwaakiha atthu awe. Yehova oniwoopola sai atthu awe? Onirumeela inamuna sinceene. Owo khonitthuneya nikhaliheryo na apinaatamu wira opake eyo.