Yehova * Muluku taakumihenrye ekasamento yoopacerya. Biibiliya oninleela wira owo aahimpaka muthiyana oopacerya nto “khumuroihela mulopwana”. Adamu aahihakalala vanceene, tivonto aahimyale awe so: “Tthiri ola nikhuva na makhuv’aka, erutthu y’erutthu aka”. (Maphattuwelo 2:22, 23) Nlelo Yehova oniphavela wira atthu oothelana ehakalaleke.

Okathi mutthu onithela awe wala otheliwa, woonasa wene onuupuwela wira khonrowa okhalana mixankiho. Masi, hata mulopwana ni muthiyana aniphentana mwekeekhai anookumana mixankiho. (1 aKorinto 7:28) Ebroxura ela yookhalana malakiheryo a Biibiliya oovareleya muteko yaawo aniiriha etthoko okhala yoohakalala.—Esalimo 19:9-12.

ELE BIIBILIYA ONIHIMYA AWE: Mulopwana ti muru wa mwaarawe.—aÉfeso 5:23.

Akhala wira nyuwo moothela, Yehova onilipelela wira mmukhapeleleke saana mwaarinyu. (1 Pedru 3:7) Owo ompaka muthiyana ntoko namakhaliherya. Nto Yehova oniphavela wira mmuthokoreryeke ni omphenta mwaarinyu. (Maphattuwelo 2:18) Mumphenteke mwaarinyu vanceene; ni mpweheke soophavela sawe ohoolo wa soophavela sanyu.—aÉfeso 5:25-29.

Akhala wira nyuwo mootheliwa, Yehova onilipelela wira mmuttittimiheke vanceene iyanyu ni omukhaliherya ovara muteko awe ntoko muru wa etthoko. (1 aKorinto 11:3; aÉfeso 5:33) Mukhaliheryeke soothanla sawe ni mmwiiweleleke ni murima wotheene. (aKolosi 3:18) Mwiira siiso, munookhala muthiyana ooreera ohoolo wa iyanyu ni ohoolo wa Yehova.—1 Pedru 3:1-6.

ELE EKHANLE ANYU OOPAKA:

• Mmukoheke ole othelanne anyu etthu enireerela anyu opaka, wira mukhale mulopwana wala muthiyana ooloka. Munwiriyaneke saana ni mwiimananihe olokiherya ele ehilonke

• Mpixeke murima. Onnitthuneya ovira okathi munceene wira otheene anyu mwiixutte moota woohakalalihana

ELE BIIBILIYA ONIHIMYA AWE: Mphaveleke omusiveliha ole othelanne anyu. (aFilipi 2:3, 4) Mmukhapeleleke ntoko etthu ya faita. Muupuweleke wira Yehova oniphavela wira arumeyi awe akhaleke ‘owarerela murima atthu othene’. (2 Timótheyo 2:24) Biibiliya oniira so: “Okakaruwa mwano tukuthi [ekatana] onvulaliha: nlumi na musuweli ninnivoliha makhwatta”. (Miruku 12:18) Nto muthanleleke saana masu anyu. Munepa wa Yehova onimookhaliheryani olavula mooreerela ni moophenta.—aGalasia 5:22, 23; aKolosi 4:6.

ELE EKHANLE ANYU OOPAKA:

• Munvekele Muluku wira mukhalane muupuwelo wooloka ni woomaaleleya vaavo muniphavela anyu olavula myaha suulupale nuule othelanne anyu

• Muupuweleke saana itthu munilavula anyu ni moota onilavula anyu

ELE BIIBILIYA ONIHIMYA AWE: Okathi nyuwo munithela anyu wala otheliwa, munnikhala “erutthu emosá” ni mwaarinyu. (Matheyo 19:5, Biblya Exirima) Masi nlelo muri atthu anli; nto nyuwosa pooti okhalana moonelo woovirikana. Nto muhaana wiixutta okhala oowiiwanana voohimya sa miyuupuwelo ni soophavela. (aFilipi 2:2) Wiiwanana ti wootthuneya okathi woopaka soothanla. Biibiliya oni: ‘Mwakohana miruku, ipalano sanyu sinookhumela saana’. (Miruku 20:18, Tradução do Novo Mundo) Vaavo munipaka anyu soothanla sootthuneya nuule othelanne anyu, mmuhiye Biibiliya wira ookhaliheryeni.—Miruku 8:32, 33.

ELE EKHANLE ANYU OOPAKA:

• Mmuleeleke ole othelanne anyu miyuupuwelo sanyu, ohiya paahi ele eniphavela anyu

• Muhinatthi opaka etthu, mmukoheke moonelo awe ole othelanne anyu