Biibiliya onihimya wira Satana ‘onniwototha atthu othene’. (Wisupulula 12:9) Satana ni axetwani awe khamphavela wira hiyo nimukupaliki Biibiliya, Nuulumo na Muluku. Awo anneererya owiiriha atthu okupali wira alipa-ookhwa akumi, ni anikhala mmapuro ahinooneya. Nrowee noone moota anipaka aya eyo.

Itiini sinceene siniixuttiha wira khuta mutthu ookhalana etthu enivikaniha okhalana okumi nuumala mutthu akhwa. Iyo sinihimya wira vaavo mutthu vanikhw’awe, etthu ekina enivikaniha okhalana okumi ennikhuma nuumala okhwa mutthu, erowaka mapuro anikhala alipa-ookhwa.

Masi Nuulumo na Muluku khinniixuttiha siiso. Mwa ntakiheryo, olavulaka sa opattuxiwa wa Adamu, Biibiliya onihimya wira: “Vano Apwiya Muluku yahihavula etthaya vakhani ya vathí, yahimùpa mutthu, khumwiselela mphulani n’iphumu s’ekumi: siso mutthu khukhala mukumi”. (Maphattuwelo 2:7) Mwekeekhai, Muluku khaahenle etthu mwerutthuni ya Adamu yeeyo yaarowa ovikaniha okhalana okumi nuumala okhwa.

 Biibiliya onihimya wira vaavo mutthu vanikhw’awe khiivo etthu enikhuma nuumala okhwa. Mwaha woowi mutthu owo mpurukuma ohookhwa, owo hataa khonwerya waareeriha aahiiso waatakhaliha atthu akumi. Soolempwa sinihimya wira: “Iphumu sàmalela, anotthikela vatthayani: nihiku nenlo sowupuwela saya sothene sinomala”.—Esalimo 146:4.

“Ayo! Atthu akumi annisuwela wira anrowa okhwa, masi alipa-òkhwa khansuwela-tho etthu. Awo khanwerya olipelela etthu: àliyaliwa paahi. Sothene sinweryanyu wira ni matat’anyu, mwireke vorera n’ikuru sanyu sothene, okhala wira elapo y’alipa-òkhwa khuvovo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”.—Musuweli 9:5, 10..

Soolempwa sikina sinooniherya wira makhwelo aatthu anlikana ni makhwelo a inamaa. (Musuweli 3:19, 20) Atthu akhwiiye khansuwela etthu moomalela. Mwekeekhai vaavo mutthu vanikhw’awe khiivo enivikaniha okhalana okumi.

Akhala wira munimusoma Biibiliya otheene, nyuwo khimunkhala-khala  mphwanyaka nipuro nnihimya wira alipa-ookhwa akumi, mapuro makina. Yoowiixuttiha enihimya wira aakhala mapuro onirowa minepa sa alipa-ookhwa kekhanle mBiibiliyani. Yowiixuttiha ela ti ya Satana ni axetwani awe. Yehova onninyokha itiini sotheene soowoka.—Miruku 6:16-19; 1 Timótheyo 4:1, 2.

Satana onnaawoka atthu mmoota mukina, onipaka eyo aarumeelaka anahako. Nahako mutthu yoole oniwerya waakhela mitthaka sinikhuma mapuro anikhala minepa. Atthu anceene, waahela muhina anahako awo, anikupali wira mitthaka iyo sinikhuma wa minepa sa alipa-ookhwa. Masi ntoko noonaly’ahu mBiibiliya, ela kheniweryaneya.—Musuweli 9:5, 6, 10.

Nto mitthaka iya sinikhuma wuuwi? Sinikhuma wa axetwani! Axetwani anniwerya omusuwela mutthu oryeene mukumi; awo annisuwela mmoota mutthu owo saalavula awe, makhalelo awe, ele yaavara awe, ni ele aasuwela awe. Siiso-nto vannaakhweela waalattiherya atthu akhwiiye.—1 Samuweli 28:3-19.

Voohimya sa alipa-ookhwa, Satana onnaawoka atthu moota mukina, onipaka eyo orumeelaka soohimmwa soohikhala sekeekhai. Ikwaha sinceene, soohimmwa iyo sinnaahuluxa atthu mu ekeekhai ya mBiibiliya.—2 Timótheyo 4:4.

WÁfrica sookhala soohimmwa sinceene sa atthu yaaniwe ari akumi masi akhwiiye ene. Ikwaha sinceene, itthu iyo siniiraneya otteiwene ni mapuro yaakhala awe ole okhwiiye. Masi mwiikoheke: ‘Vaakhanleke wira mutthu ole onniwerya otthika mwa alipa-ookhwa, ti vookhalela wira owo aarowa otthikelaka mapuro oorakamelana ni emusi awe ni apatthani awe?’

Nto, mutthu ole ooniwe khahiyo wira onoolattana paahi ni mutthu ole okhwiiye? Mwa ntakiheryo, arumeyi anli eeKristau yaawo yaalaleerya mmawaani yaahimoona mulopwana mmosaa oowunnuwela aattharaka mu okathi munceene. Nto vaavo awo vaamukonha aya, yaahisuwela wira mulopwana ole uupuwela wira mmosaa a arumeyi ale, aari munna awe yoowo aakhwiiye mu iyaakha soovira. Masi, ela khahiyo yaari ekeekhai, masi mulopwana ole aahikhootta waakhulela wira ela khahiyo ekeekhai. Nkuupuwelani ele mulopwana ole yaaronwa awe ohimya wa apatthani ni wa oowaattamanana awe!

Mwekeekhai nyuwo moosuwela itthu soohilimaleleya seiyo atthu anoon’aya, aniiw’aya aahiiso anilohery’aya. Sookumanana iyo soohikhala seephattu ikwaha sinceene sinniwoopopiha ale aniloherya. Marein yoowo onikhala wÁfrica Onikela Nsuwa, ikwaha sinceene aaniiwa masuu a piipi awe amwiihanaka ohiyu. Mwaha wowoova, Marein aahikhuwela moonyakula ovenxaka emusi awe yotheene. Waakelela mahiku, owo aahikhwa onepa.

Vanonto, akhala wira alipa-ookhwa akumi tthiri, ti vooreerela wira awo yaamoorwa ni waahaaxa ale anaaphenta aya? Nnaari. Axetwani takhanle axineene masuu ala oohaaxa.

Masi sai voohimya sa masuu yaawo ankhala ntoko tookhaliherya ni oomaaliha? Mwa ntakiheryo, Gbassay onikhala oSerra Leoa, anwereiwa. Owo aahaaloherya apapawe yaakhwiiye arwiiye ene okumana n’uwo. Paapa awe aahimuthoonyiherya mwirii, omwiirela orowa okohola makukhu, ni otakaaherya maasi wira owurye. Owo aaleeliwe wira ohimuleele mutthu ohinatthi opaka ela. Gbassay aahipaka ela khuvona.

Muthiyana mukina aahimmye wira iyawe aahirwa ohiyu nuumala okhwa. Muthiyana owo aahimmye wira iyawe owo aari oophwaneliwa ni aawanre ikuwo sooloka.

 Soohimmwa iya ni sowoonihiwa sinkhala ntoko ti sooloka ni sookhaliherya. Niireke wira soohimmwa iya sinikhuma wa Muluku? Nnaari. Yehova orii Muluku ‘òroromeleya’. (Esalimo 31:6) Owo khonkhala-khala onootothaka aahiiso oniwoka. Anoototha ni owoka axetwani paahi.

Niireke wira aakhala axetwani ooloka? Nnaari. Hataa ikwaha sikina akhalaka ntoko tookhaliherya, otheene aya tootakhala. Vaavo Diabo vaalavunle awe ni Eva, owo aakhala ntoko mpatthani. (Maphattuwelo 3:1) Masi exeeni yaamwiiranenle Eva nuumala onwiriyana ni opaka yeele Diabo yaahimmye awe? Owo aahikhwa.

Nyuwo munnisuwela wira khahiyo etthu yeeletto mutthu ootakhala okhalaka ntoko mpatthani wa yaale oniphavela awe waawoka aahiiso owoototha. “Maino ootteela masi murima ooriipa”, onihimya siiso muhapo mmosaa a wÁfrica. Nto Nuulumo na Muluku nnihimya wira: “Satana onnìtatuxa wira òneye ntoko nlaikha nowarya”.—2 aKorinto 11:14.

Muluku khonlavula-tho ni atthu a valaponi orumeelaka sooloha, sowoonihiwa, aahiiso masuu anikhuma mapuro anikhala minepa. Owo onnaalakiherya ni owiixuttiha atthu omurumeelaka Biibiliya, wira mutthu owerye ‘olipiheriwa ovara miteko sothene sorera’.—2 Timótheyo 3:17.

Mwekeekhai, vaavo Yehova vannilopola awe sa owoka wa Diabo, owo onnipaka eyo okhala wira onniniphenta. Owo oosuwela wira axetwani awanani ootakhala.