YOOSOMA 03
Niireke Nyuwo Munnimuroromela Biibiliya?
Biibiliya onnilavula itthu sinceene sooloka sinrowa wiiraneya muhoolo. Nave onnivaha miruku sooloka. Woonasa wene, nyuwo munniphavela osuwela ele onihimya awe. Masi pooti wira sookhala itthu munaanyiherya anyu. Nto niireke nyuwo pooti ororomela sooleiherya ni miruku sa eliivuru ya khalai? Niireke ti vooloka okupali ele Biibiliya onihimya awe wira muhoolo nnookhalana okumi woohakalaliha? Atthu anceene annikupali wira nnookhalana okumi woohakalaliha. Niireke nyuwo nave pooti okupali eyo? Nrowe niwehe.
1. Niireke itthu sinilavuliwa mBiibiliyani saahiiraneya tthiri?
Sowiiraneya sotheene silempwale mBiibiliyani “ti s’ekekhai”. (Musuweli 12:10) Nave Biibiliya onnilavula sowiiraneya sekeekhai ni atthu eekeekhai. (Mmusome Luka 1:3; 3:1,2.) Alipa-anilepa myaha sa mulaponi ni mapuro yaakhaliwa khalai anihimya wira ele Biibiliya onihimya awe, voohimya sa itaata, atthu, mapuro ni sowiiraneya ti sekeekhai.
2. Xeeni ninhimya ahu wira Biibiliya toororomeleya nnaamwi eri ene eliivuru ya khalai?
Mwa inamuna sinceene, Biibiliya eliivuru enivareleya muteko okathi wotheene. Mwa ntakiheryo, Biibiliya onnilavula myaha sa siensia. Okathi Biibiliya aalempwa awe, atthu anceene khiyeemererya ele aahimya awe voohimya sa myaha iyo sa siensia. Masi olelo-va, siensia onnooniherya wira ele Biibiliya onihimya awe, ti yekeekhai. Tthiri okathi wotheene itthu Biibiliya onihimya awe “ti s’ekekhai ni sa xariya”.—Esalimo 111:8.
3. Xeeni ninreerela ahu okupali itthu Biibiliya onihimya awe sinrowa wiiraneya muhoolo?
Biibiliya ookhalana iprofesia * sinlavula itthu “sinrowa wiraneya” muhoolo. (Yesaya 46:10) Mwa ntakiheryo, sookhala itthu sinceene siiraneyale seiyo Biibiliya aahimmye awe vahinatthi wira saamwiiraneya. Nave Biibiliya aahihimya vahinatthi makhalelo a olumwenku mahiku ahu ala. Nto yoosoma ela, ninrowa oweha iprofesia vakhaani Biibiliya onilavula awe. Etthu yoohakalaliha oweha wira itthu Biibiliya aahimmye awe vahinatthi sinniiraneya!
MWIIXUTTE ITTHU SIKINA
Nwehe moota olelo-va siensia onivarihana awe ni Biibiliya ni mutokose iprofesia sikina Biibiliya onilavula awe.
4. Siensia onnivarihana ni Biibiliya
Khalai atthu yuupuwela wira yookhala etthu evarelenle elapo wala elapo eri vasulu va etthu ekina. Nwehe EVIIDIYU.
Nwehe ele eliivuru ya Yobi yaahimmye aya iyaakha 3.500 sivinre. Mmusome Yobi 26:7, nuumala-vo mwaakhule nikoho ninttharelana:
-
Xeeni vari aya vootikiniha woona wira Biibiliya aahihimya wira elapo ‘kherina yovarelela’ aya?
Iyaakha 200 sivinre, atthu tiyaawenrye aya osuwelexa moota maasi aneetta aya. Masi nwehe ele Biibiliya aahimmye awe iyaakha sinceene sivinre. Mmusome Yobi 36:27, 28, nuumala-vo mwaakhule makoho anittharelana:
-
Xeeni vari aya vootikiniha woona moota maasi aneetta aya?
-
Niireke iversiikulu iya musomme anyu sihincererya omuroromela wanyu Biibiliya?
5. Biibiliya aahihimya vahinatthi itthu saarowa wiiraneya
Mmusome Yesaya 44:27–45:2, nuumala-vo mwaakhule nikoho ninttharelana:
-
Itthu xeeni Biibiliya aahimmye awe sa moota yaarowa aya opwetexiwa epooma ya oBabilonia, seiyo siiraneyale nuuvira iyaakha 200?
Sowiiraneya sinnooniherya wira Kiro, Mwene a oPersia ni anakhotto awe, yaahipwetexa epooma ya oBabilonia mwaakha 539 ohinatthi Kristu orwa. Awo yaapacenrye ohapuxa maasi a muro waakhapelela epooma ele. Nuumala-vo, yaahikela epooma ele yeeyo mikhora sahaawaliwe. Awo yaahiwerya opwetexa epooma ele ahiwanne ekhotto. Olelo-va, soovira iyaakha sinivikana 2.500, nto oBabilonia siri milepe paahi. Nwehe ele Biibiliya aahimmye awe vahinatthi.
Mmusome Yesaya 13:19, 20, nuumala-vo mwaakhule nikoho ninttharelana:
-
Yiiraneyale sai eprofesia ela?
Milepe sa oBabilonia olelo-va
6. Itthu siniiraneya olelo-va, Biibiliya aahihimya vahinatthi
Biibiliya onihimya wira hiyo ninkhala “mahiku ookiserya”. (2 Timootheyo 3:1) Nwehe ele Biibiliya aahimmye awe vahinatthi voohimya sa mahiku ookiserya.
Mmusome Matheyo 24:6, 7, nuumala-vo mwaakhule nikoho ninttharelana:
-
Itthu xeeni Biibiliya aahimmye awe saarowa wiiraneya mahiku ookiserya?
Mmusome 2 Timootheyo 3:1-5, nuumala-vo mwaakhule makoho anittharelana:
-
Mikhalelo xeeni atthu yaarowa aya okhalana mahiku ookiserya?
-
Niireke nyuwo munnaaweha atthu arina mikhalelo iya?
ATTHU AKINA ANIHIMYA WIRA: “Biibiliya eliivuru ya ihantisi ni itthu sowoothiwa”
-
Munoonela sai, etthu xeeni ennikupaliha wira nihaana omuroromela Biibiliya?
WUULUULA
Sowiiraneya sa mulaponi, siensia ni iprofesia sinnooniherya wira nyuwo pooti ororomela ele Biibiliya onihimya awe.
Iponto suulupale
-
Niireke itthu Biibiliya onihimya awe sihiiraneya?
-
Itthu xeeni sinooniherya wira Biibiliya onnivarihana ni siensia?
-
Niireke nyuwo munnikupali itthu Biibiliya onihimya awe sinrowa wiiraneya muhoolo? Etthu xeeni enookupalihani?
NWEHE ITTHU SIKINA
Niireke Biibiliya khonivarihana ni siensia?
“Niireke Siensia Onnivarihana ni Biibiliya?” (Mwaha ori va jw.org)
Itthu xeeni sinooniherya wira ninkhala “mahiku ookiserya”?
“Iprofesia 6 sa mBiibiliyani Siniiraneya Olelo-va” (Owehaweha, 1 a Maio, 2011)
Nwehe moota iprofesia sa mBiibiliyani voohimya sa Olamulelo wa oGresia siiraneyale aya.
Nwehe yowiiraneya ya Andreas, owo khaakupali wira Muluku ookhala. Nto moone moota iprofesia sa mBiibiliya saaturunke aya moonelo awe.
“Miyo Nkaakupali Wira Muluku Ookhala” (Owehaweha, No. 5, 2017)
^ etti. 9 Iprofesia sinihela muhina itthu Muluku onihimya awe sinrowa wiiraneya muhoolo.
B.C.E. means “Before the Common Era,” and C.E. means “Common Era.”
