YOOSOMA 07
Muncererye Omusuwela Wanyu Yehova
Munoonela sai? Yehova ori sai? Munoona wira owo tooweryexa ni ori ottaiwene ntoko itheneeri siri wiirimu? Wala munuupuwela wira owo khahiyo mutthu masi ikuru paahi ntoko etari? Yehova ori sai? Biibiliya, onnooniherya oratteene mikhalelo sa Yehova. Nave onihimya wira owo onninthokorerya.
1. Xeeni nihinwerya ahu onweha Muluku?
Eliivuru ya Yohani 4:24, Biibiliya onihimya wira “Muluku ti Munepa”. Nto eyo enooniherya wira owo khonooneya maana Yehova khorina erutthu ntoko erutthu ahu. Owo munepa ni onikhala wiirimu, opuro yoowo hiyo nihinwerya ahu woona.
2. Yehova orina mikhalelo xeeni?
Ekeekhai wira khaninwerya omoona Yehova, masi vaavo hiyo nimmusuwela ahu oratteene ninnoona wira owo mutthu eekeekhai orina mikhalelo sooloka. Biibiliya onihimya wira: “Muluku onnaphenta atthu òloka: khananyanyala apatthani awe”. (Esalimo 37:28) Nave Biibiliya onihimya wira “Yehova toophenta vanceene ni toomoriwa ikharari”. Eyo enooniherya wira Yehova onniwoonela othunku ale arina mixankiho. (Yakobo 5:11) Yehova onikhala ‘vakhiviru n’ale òtemwa: onniwòpola alipa-òwojeya’. (Esalimo 34:19) Mwaanisuwela wira itthu nimpaka ahu pooti omuhakalaliha wala omuriipiha murima Yehova? Moota xeeni? Akhala wira mutthu onnithanla opaka itthu soohiloka, eyo ennimunyoonya ni ennimuriipiha murima vanceene Yehova. (Esalimo 78:40, 41) Masi onnihakalala vanceene vaavo mutthu onipaka awe itthu sooloka.—Musome Miruku 27:11.
3. Yehova onooniherya sai wira onniniphenta?
Mukhalelo muulupale wa Yehova ti ophenta. Tthiri Biibiliya onihimya wira, “Muluku ti ophenta”. (1 Yohani 4:8) Ninniwerya woona ophenta wa Yehova ohiya paahi ni itthu ninsoma ahu mBiibiliyani, masi-tho ni itthu opattunxe awe. (Musome Miteko 14:17.) Mwa ntakiheryo, nkahaya muupuwele moota Yehova onipattunxe awe. Owo oonivaha owerya woosiveliwa woona ikoore sooreera, owiriyana muusika wooreera ni olya yoolya yoosiva. Tthiri vannooneya oratteene wira oniphavela wira nihakalaleke.
MWIIXUTTE ITTHU SIKINA
Nwehe etthu Yehova onirumeela awe wira opake itthu sootikiniha. Nave nwehe moota Yehova onnooniherya awe mikhalelo sawe sooloka.
4. Munepa woowaarya ti ikuru sa Muluku
Okathi ninvara ahu muteko, hiyo ninrumeela matata ahu. Ankhi Yehova onirumeela exeeni? Owo onirumeela munepa awe woowaarya. Atthu akina anuupuwela wira munepa woowaarya, mutthu. Masi Biibiliya onnooniherya wira munepa woowaarya, ikuru Yehova onirumeela awe wira opake ele oniphavela awe. Mmusome Luka 11:13, Miteko 2:17 nuumala-vo mwaakhule makoho anittharelana:
-
Muluku ‘onimwaamwarexela munepa’ awe ale aninvekela. Nto nyuwo munoona wira munepa woowaarya mutthu wala ikuru sa Muluku? Exeeni eniwiirihani ohimya siiso?
Yehova onirumeela munepa awe woowaarya wira opake itthu sootikiniha. Musome Esalimo 33:6 ni 2 Pedru 1:20, 21, nuumala-vo mwaakhule nikoho ninttharelana:
-
Mwa inamuna xeeni Yehova orumeelale awe munepa awe woowaarya?
5. Yehova ookhalana mikhalelo sooloka
Moise aari murumeyi oororomeleya a Muluku. Hata vaari siiso, owo aaniphavela omusuwela saana Mpattuxa awe. Eyo ti etthu yaamwiirinhe Moise onvekela Yehova wira: “Mukòniherye ekhove anyu, wira kosuweleni, kosiveliheni tthirí”. (Okhuma 33:13) Nto Yehova aahimuleela Moise mikhalelo orina awe. Mmusome Okhuma 34:4-6, nuumala-vo mwaakhule makoho anittharelana:
-
Mikhalelo xeeni Yehova orina awe aamoonihenrye awe Moise?
-
Mukhalelo xeeni wa Yehova ontepa woosivelani?
6. Yehova onnaakhapelela atthu
Khalai aHeeberi yaari nloko noothanliwa na Muluku, masi awo yaahikhala ipottha wExiitu. Yehova oonela sai vaavo aaweha awe atthu awe ahaawaka? Munwiriyane AUDIO ni mutthareke vaavo onisommwa awe Okhuma 3:1-10. Nuumala-vo mwaakhule makoho anittharelana.
-
Yehova onoonela sai vaavo onaaweha awe atthu ahaawaka?—Nwehe eversiikulu 7 ni 8.
-
Munoona wira Yehova onniphavela tthiri waakhaliherya atthu? Munoona wira ookhalana owerya wowaakhaliherya atthu? Etthu xeeni eniwiirihani wuupuwela siiso?
7. Soopattuxiwa sinnooniherya mikhalelo sa Yehova
Nnoowerya wiixutta ni osuwela mikhalelo sinceene sa Yehova, niwehaka itthu opattunxe awe. Nwehe EVIIDIYU. Moottharelana mmusome aRoma 1:20, nuumala-vo mwaakhule nikoho ninttharelana.
-
Mikhalelo xeeni sa Yehova muniweha anyu ni itthu opattunxe awe?
ATTHU AKINA ANIHIMYA WIRA: “Muluku khahiyo mutthu, owo ikuru paahi siniphwanyaneya khula opuro”.
-
Niireke nyuwo munuupuwela siiso?
-
Etthu xeeni eniwiirihani wuupuwela siiso?
IPONTO SUULUPALE
Khaninwerya onweha Yehova mwaha woowi owo munepa. Hata vari siiso, owo ookhalana mikhalelo sinceene, masi mukhalelo muulupale orina awe ti ophenta.
Wuuluula
-
Xeeni nihinwerya ahu onweha Yehova?
-
Munepa woowaarya exeeni?
-
Mikhalelo xeeni Yehova orina awe?
NWEHE ITTHU SIKINA
Yehova okhalana mikhalelo mixexe suulupale. Nto mwiixutte mikhalelo sikina Yehova orina awe mwaha ola.
Nwehe itthu sinooniherya wira Yehova khonikhala mapuro otheene.
“Niireke Muluku Onikhala Mapuro Otheene?” (Mwaha ori va jw.org)
Biibiliya onnilikanyiha munepa woowaarya ni matata a Muluku. Nwehe etthu enooniherya eyo.
Julio khonoona, nto vaaninvila okupali wira Muluku onnimukhapelela. Nwehe ele yaamukhalihenrye Julio oturuka muupuwelo awe.
“Vano Kinoona Wira Kinoowerya Waakhaliherya Atthu Akina” (Owehaweha, 1 a Outubro, 2015)
