Yesu tori Muhooleli a muloko. (aEefeso 5:23) Olelo-va, Yesu onikhala wiirimu. Ori ene wiirimu, owo onnaavaha malakiheryo atthareli awe a olumwenku wootheene omurumeelaka “murumeyi oororomeleya ni a ankhili”. (Mmusome Matheyo 24:45.) Yesu tomuthanlale “murumeyi” owo ni onvaha okhulupale. Hata murumeyi owo orina ene okhulupale, owo onimurumeela Kristu ni axinnawe. Ti pani ori murumeyi oororomeleya ni a ankhili? Murumeyi owo onnikhapelela sai otheene ahu?

1. Ti pani ori “murumeyi oororomeleya ni a ankhili?”

Yehova onnimuruma mutthu wala ekrupu ya alopwana wira yaavaheke malakiheryo arumeyi awe. (Malakhiya 2:7; aHeeberi 1:1) Nuumala Yesu wiiviwa, arummwa ni axitokweene a oYerusalemu, yaanaavaha malakiheryo atthu a Muluku a okathi ole. (Miteko 15:2) Etthu emosaru enniiraneya olelo-va. Yehova onniruma ekrupu yaamukhaani ya axitokweene wira anivaheke iliivuru ni iviidiyu sinnikhaliherya olipiha ompatthani ahu ni Muluku ni ovaha malakiheryo a muteko woolaleerya. Ekrupu eyo eniihaniwa Nikhuuru Noolamulela na Anamoona a Yehova. Nave owo tori “murumeyi oororomeleya ni a ankhili, yoowo othanliwe ni [Yesu]” wira eettiheke miteko sootheene sa mutthenkeso. (Matheyo 24:45a) Anna ootheene aniirela mpantta Nikhuuru Noolamulela, makristau oothanliwa ni munepa woowaarya wa Muluku. Nuumala okhwa ni ohihimuxiwa, awo anrowa olamulelaka ni Kristu wiirimu.

2. Murumeyi oororomeleya onaavaha sai iliivuru sinimutthokiherya Biibiliya arumeyi a Yehova?

Yesu aahimmye wira murumeyi oororomeleya aarowa ‘waakawelaka yoolya [atthareli a Kristu] okathi wooreerela’. (Matheyo 24:45b) Ntoko siisaale yoolya ya weerutthuni ennilipiha aya ni ennikhaliherya aya okhalana ekumi yooloka, yoolya ya omunepani, eyo piiyo, Nuulumo na Muluku, ninninivaha ikuru wira nihihiye ororomeleya wa Yehova ni ovara muteko Yesu onivanhe awe. (1 Timootheyo 4:6) Hiyo ninnaakhela yoolya eyo okathi wa mithukumano, asembeleya, akonkresu, iliivuru ni iviidiyu sinimutthokiherya Biibiliya. Yoolya eyo yootheene, enninikhaliherya osuwela ele Muluku oniphavela awe ni olipiha ompatthani ahu ni yena.

 MWIIXUTTE ITTHU SIKINA

3. Arumeyi a Yehova ahaana okhala ootthokiheya

Attharaka malakiheryo a Yesu, anna a Nikhuuru Noolamulela annitthokiha muteko wa Anamoona a Yehova. Etthu emosaru, yaaniiraneya ni makristau a khalai. Nwehe EVIIDIYU.

Mmusome 1 aKorinto 14:33, 40, nuumala-vo mwaakhule nikoho ninttharelana:

• Iversiikulu iya, sinooniherya sai wira Yehova oniphavela wira arumeyi awe akhaleke ootthokiheya?

4. Murumeyi oororomeleya onnitthokiha muteko woolaleerya

Muteko muulupale yaavara aya makristau a okathi wa arummwa, waari olaleerya. Musome Miteko 8:14, 25, nuumala-vo mwaakhule makoho anittharelana:

• Okathi wa makristau a khalai, ti pani yaavaha malakiheryo a muteko woolaleerya?

• Niireke Pedru ni Yohani yaaheemererya malakiheryo yaavahiwa aya ni arummwa akina?

Muteko muulupale wa Nikhuuru Noolamulela, ti ovaha malakiheryo a muteko woolaleerya. Nwehe EVIIDIYU.

 Yesu aahittittimiherya efaita orina aya muteko woolaleerya. Mmusome Marko 13:10, nuumala-vo mwaakhule makoho anittharelana:

• Xeeni Nikhuuru Noolamulela ninvaha aya efaita muteko woolaleerya?

• Xeeni vanireerela aya “murumeyi oororomeleya ni a ankhili” otthokiha muteko ahu woolaleerya olumwenku wootheene?

5. Murumeyi oororomeleya onninivaha malakiheryo

Nikhuuru Noolamulela, ninnaavaha malakiheryo makristau eekeekhai a olumwenku wootheene. Masi anisuwela sai malakiheryo anireerela aya ovaha? Nwehe moota Nikhuuru Noolamulela na okathi wa arummwa naavaha aya malakiheryo makristau a okathi ole. Musome Miteko 15:1, 2, nuumala-vo mwaakhule makoho anittharelana:

• Muxankiho xeeni makristau a okathi wa arummwa yaarina aya?

• Paulo ni Baarnaba yanvekenle ani malakiheryo wira aphuke muxankiho ole?

Musome Miteko 15:12-18, 23-29, nuumala-vo mwaakhule makoho anittharelana:

• Nihinatthi opaka yoothanla, Nikhuuru Noolamulela na okathi wa arummwa naaniphavela malakiheryo a Muluku voohimya sa mwaha owo. Yaapaka sai eyo?—Nwehe iversiikulu 12, 15 ni 28.

Musome Miteko 15:30, 31 ni 16:4, 5, nuumala-vo mwaakhule makoho anittharelana:

• Niireke makristau a okathi wa arummwa yaaniiwelela malakiheryo yaavahiwa aya ni Nikhuuru Noolamulela?

• Yehova aareelinhe sai wiiwelela waya?

Mmusome 2 Timootheyo 3:16 ni Yakobo 1:5, nuumala-vo mwaakhule nikoho ninttharelana:

• Olelo-va, Nikhuuru Noolamulela nimpaka sai soothanla?

 IPONTO SUULUPALE

Nikhuuru Noolamulela ti “murumeyi oororomeleya ni a ankhili” yoowo othanliwe ni Yesu Kristu. Anna awo annaavaha malakiheryo ni iliivuru sinimutthokiherya Biibiliya makristau ootheene eekeekhai a olumwenku wootheene.

Wuuluula

• Ti pani omuthanlale “murumeyi oororomeleya ni a ankhili”?

• Olelo-va, Nikhuuru Noolamulela ninnikhapelela sai?

• Niireke nyuwo munnikupali wira Nikhuuru Noolamulela ti “murumeyi oororomeleya ni a ankhili”?