1, 2. Muteko xeeni wooteka oniheliwa anyu muhina, ni nthowa xeeni varyaaya vootthuneya muteko anyu okhumela saana?

NILIKANYIHE so, nyuwo muniteka empa yuulupalexa. Mpacenrye khalai oteka empa eyo, masi munnivikaniha oteka. Nnaamwi mpakha va muteko owo ohireere orika, nlelo nyuwo munnivara moohakalala. Voohicikha etthu sa mixankiho sinikhumelela, nyuwo khamunihiya oteka empa eyo, okhala wira yakhumela saana munoottottela mureerelo, masi yaahikhumele saana enimookumiheryani maxakha. Nthowa xeeni? Nthowa noowi empa eyo entekiwa ti nyuwo!

² Mwiixutti Yuda onittittimiherya wira ntepeke wunnuwa. Okathi aatumererya awe maKristau wira ‘akhaleke mophentani mwa Muluku’, aahihimya-tho etthu enrowa onikhaliherya opaka eyo, oriki: “Mutepeke wunnuwa mowaminini mwanyu mowaryexa”. (Yuda 20, 21) Moota xeeni munrowa anyu otepaka wunnuwa mowaamini, wira mulipihe nroromelo nanyu mphavelaka okhala moophentani mwa Muluku? Nrowe nthokorerye inamuna tthaaru sa muteko wooteka sinrowa olipiha waamini wanyu.

3-5. (a) Satana oniphavela wira mooneleke sai sooruma sa Yehova? (b) Nooneleke sai sooruma iyo sa Muluku, nto moonelo owo onnihela sai muhina? Nvahe nlikanyiho.

³ Wanipacerya, nohaana olipiha waamini wahu neettelaka nlamulo na Muluku. Vaavo vanisoma anyu eliivuru ela, moohaaniherya nyuwo moothokorerya sooruma sinceene sa xariya sa Yehova, voohimya sa mweettelo. Nto munoonela sai sooruma  iyo? Yoophavela ya Satana ti owiirihani wuupuwelaka wira malamulo, malakiheryo, ni sooruma sa Yehova toohaaxa aahiiso anookhoottiheryani itthu sooloka. Okhuma okathi yoole aakhumenle awe saana wEedeni, Satana onnirumeela enamuna eyo ya olavilavi. (Maphattuwelo 3:1-6) Niireke olavilavi owo wa Satana onimoowoka-ni? Waakhuliwa wa nikoho nna onlipa ni mukhalelo wa murima anyu.

⁴ Nlikanyiherye so: Vaavo vaneetta anyu mujardim yooreera, nyuwo munniweha mpantta mukina wa ejardim eyo, otekeleliwe ene ekintaali ya oraami yoolipa ni yoorakama. Mpantta owo otekeleliwe aakhala mapuro ooreera vanceene. Nto, nyuwo pooti woonaka wira ekintaali ele enookhoottiheryani ophiya opuro ole wooreera. Masi, okathi oniweha anyu oratteene mukintaali mme, munnimoona kharamu oowoopiha iitelaka enama! Vano munnoona wira opuro ole woovirihiwa ekintaali mwaha wa inama sowoopiha. Niireke wira ookhala namalupattha oniwiitelani toko? Aayo. Biibiliya onihimya so: “Mwisumalihe, mwipasopeke. Nwanan’inyu, Satana, onorukureryani ntoko kharamu onòpa murukulu, amphavelaka òmukhura”.​—1 Pedru 5:8.

⁵ Satana ti namalupattha ootakhala. Ophavelaka onaakiherya miteko sinceene ‘s’olavilavi sa Satana’, Yehova oonivaha malamulo wira nihivariwe ni Satana. (aÉfeso 6:11) Nto, khuta okathi onuupuwelela ahu malamulo a Muluku, nohaana othokoreryaka ntoko ethoonyeryo ya ophenta wa Tiithi ihu ori wiirimu. Vaavo vanithokorerya ahu siiso, malamulo awo a Muluku anninisuka ni onihakalaliha. Mwiixutti Yakobo olempe so: “Masi ale antthokelela ikano somalela so wòpoliwa, enettela orattene, . . . atthu awo anophwanya oreriwa mwaha w’otthara ikano seiyo”.​—Yakobo 1:25.

6. Sooruma ni malakiheryo a Muluku annilipiha sai nroromelo nahu? Nvahe ntakiheryo.

⁶ Wira nlipihe nroromelo nahu wa Muluku yoowo ori Mulipa-onipaka Malamulo, nohaana weettela sooruma sawe, okhala wira eyo tekhanle ephiro ya miruku. Mwa ntakiheryo, “ikano sa Kristu” sinihela muhina yooruma ya Yesu ya owiixuttiha atthu itthu ‘sothene sirumalyawe’. (aGalasia 6:2; Matheyo 28:19, 20) Nave-tho, maKristau anniiwelela ni murima  wotheene yooruma ya ohicompela mithukumano, aphavelaka omukokhorela Muluku ni olipihana mukina ni mukhwaawe. (aHéberi 10:24, 25) Yooruma ya Muluku enihela-tho muhina, yootumererya ya onvekela Yehova voohihiyererya, imaara sinceene, ni murima wotheene. (Matheyo 6:5-8; 1 aTesalonika 5:17) Vaavo vaneettela ahu sooruma iyo, ninnoona oreera waya wiiwelela malakiheryo awo oophenta. Niiwelela sooruma iyo, nnoophwanya ohakalala ohikhanle-tho elapo ela yooxankiha. Vaavo vanuupuwelela anyu mireerelo sinikhumelela mwaha wa weettela malamulo a Muluku, niireke wira nroromelo nanyu khinintepa olipa?

7, 8. Moota xeeni Biibiliya onaalipiha awe atthu yaale anuupuwela wira khino khanrowa owerya weettela sooruma sa Muluku okathi wotheene?

⁷ Ikwaha sikina, atthu annixanka yuupuwelaka wira khanrowa owerya weettela malamulo a Yehova okathi wotheene. Pooti wira atthu awo anoova ovonya. Akhala wira munoona siiso, muupuweleke moolumo ala: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara. Nyuwo mwaiwelelá soruma saka, oreriwa wanyu wamulikana ni màsi anririha ematta, owerya wanyu wamunnuwa ntoko mawimpi a mphareya”. (Yesaya 48:17, 18) Niireke wira mootoko wuupuwelela moolumo ala, khoona wira toolipiha?

 ⁸ Yehova onnooniherya wira wiiwelela sooruma iyo onniniphwanyiha mireerelo sinceene. Akhala wira nniiwelela sooruma iyo, Muluku onnileiherya wira nnoophwanya mareeliho manli. Noopacerya, murettele ahu onrowa olikanaka ni muro, eyo piiyo, onrowa okhala woomaaleleya, munceene, ni woohimala. Na nenli, exariya ahu enrowa olikanaka ni mawimpi a mphareya. Akhala wira munneemela muxerexere mwa ephareya munaweha mawimpi arwaaka, munnoona wira mawimpi awo khanimala. Munnisuwela wira mawimpi awo anootepaka orwa, amanaka mukerekhere mahiku otheene. Yehova onihimya wira exariya ya mutthu yoole onimwiiwelela khenimala. Tthiri, vaavo vaniimananiha anyu okhala oororomeleya wa Yehova, owo khonrowa woohiyani mmoraka! (Musome Esalimo 55:23.) Niireke wira anatiri awo oolipiha khaniwiirihani omwaamini Yehova ni sooruma sawe sa xariya?

9, 10. (a) Nthowa xeeni oryaaya vootthuneya muKristau orowa vahoolo mmukhalelo womunepani? (b) Moota xeeni orowa vahoolo iwo onihakalaliha aya vanceene?

⁹ Enamuna ya nenli enrowa olipiha waamini wahu, tiile enihimmwa mmoolumo ala oowuupuxeriwa ani: “Netteke nrowaka oholo”. (aHéberi 6:1) Orowa vahoolo mmukhalelo womunepani eri yoolukama yuulupalexa ya muKristau. Nnaamwi apinaatamu ahiweryaka okhala atthu oomalela, masi awo pooti orowa vahoolo mmukhalelo womunepani. Ohiya vo, orowa vahoolo mmukhalelo womunepani onniwiiriha maKristau omurumeela Yehova moohakalala. Moota xeeni?

¹⁰ MuKristau oolipa mmukhalelo womunepani, onnithokorerya itthu ottharihelaka moonelo wa Yehova. (Yohani 4:23) Paulo olempe so: “Ale antthara makhalelo aya òtakhala anniphavela itthu iye sotakhala: vano ale antthara eroho anniphavela itthu sintthunaya eroho”. (aRoma 8:5) Othokorerya itthu mmukhalelo wa werutthuni, onikumiherya ohakalala vakhaani, okhala wira onnimwiiriha mutthu okhala nanrima, ohiweha itthu ottharihelaka moonelo wa Muluku, ni owehexexa itthu sa werutthuni paahi. Othokorerya itthu mmukhalelo  womunepani onnihakalaliha vanceene, okhala wira mutthu owo oninwehexexa paahi Yehova yoowo ori ‘Muluku oohakalala’. (1 Timótheyo 1:11, NM) Mutthu oolipa mmukhalelo womunepani onniphavela vanceene omuhakalaliha Yehova, ni onnihakalala hata eehereriwaka. Nthowa xeeni? Nthowa noowi, yooweeha enninvaha mutthu owo okathi wooreerela wira ooniherye wira Satana nawoothe, ni ennilipiha nroromelo nawe, nto khiyamuhakalaliha Tiithi ihu a wiirimu.​—Miruku 27:11; mmusome Yakobo 1:2, 3.

11, 12. (a) Exeeni Paulo aalavunle awe voohimya sa “ankhili” a muKristau, ni nintaphulela exeeni nuulumo noowi ‘walimaleliha’? (b) Wira erutthu ahu ekhomaale ni eweryeke opaka etthu ehaana wiirihiwa exeeni?

¹¹ Wiixutta oratteene, tonimwiiriha mutthu okhala oolipa mmukhalelo womunepani. Nwehe eversiikulu ela eni: “Yolya yolipa ti y’atthu atokwene, mana yawo ahalimaleliha ankhili aya osuwela n’uthanla sorera ni sotakhala”. (aHéberi 5:14) Vaavo Paulo aahimmye awe wira ankhili ahaana ‘olimalelihiwa’, owo aarumenle nuulumo na eGriki naasuweliwa vanceene mapuro yiinihiwa nikuruta erutthu, eseekulu yoopacerya muttetthe wa oGrecia. Nto pooti otaphulelaka ‘wiiniha nikuruta ntoko siniira awe mulipa-oniiniha nikuruta erutthu awe’. Nkahaya muupuwelele ele enivekela aya nikuruta nno.

¹² Okathi oniyariwa ahu erutthu ahu eniira ehilimalenle opaka etthu. Mwa ntakiheryo, mwaha wooyeva, mwaana khoniwerya weettiha saana metto sawe ni miyoono sawe. Tivonto, ikwaha sikina mwaana owo onniiwarakhula owiitho wawe, ni khiyatuthuwasa. Vaavo vakhaani-vakhaani vanilimaleliha awe orumeela mipantta sa erutthu awe, owo onniixutta. Vano, onnipacerya waapasa, moottharelana khiyeetta, nto wanikisa waya khiyatthimakasa. * Akhala wira ti siiso, exeeni enipaka awe mulipa-oniiniha nikuruta erutthu awe? Vaavo vaninweha anyu mutthu opakaka itthu sootikiniha, ntoko ottukhulela  musulu metto soomiili, masi ovarelenle ene vathi, moohaaniherya nyuwo munnihimya wira erutthu enlikana ni maakina oolokihereya saana. Etthu enimukhaliherya opaka itthu iyo sootikiniha, mwaha woovirihaka iwoora sinceene iinihaka nikuruta erutthu awe. Masi, Biibiliya onihimya wira wiiniha nikuruta erutthu ‘onikhaliherya vakhani’. Tthiri, etthu yootthuneya vanceene ti owiixuttiha ankhili ahu wira nisuweleke itthu somunepani!​—1 Timótheyo 4:8.

13. Ninrowa owiixuttiha sai ankhili ahu?

¹³ Muliivuruni-mu, noothokorerya itthu sinceene sinrowa wookhaliheryani owiixuttiha ankhili anyu, wira mukhale oororomeleya wa Yehova ntoko mutthu oolipa mmukhalelo womunepani. Vaavo khuta nihiku vanipaka anyu soothanla sanyu, muhaana ovekela muthokoreryaka ele malakiheryo ni malamulo a Muluku anihimya aya mmwaha owo. Khuta yoothanla enipaka anyu, mwiikoheke so: ‘Malamulo xeeni aahiiso malakiheryo a Biibiliya anivarihana ni mwaha ola? Kinrowa ovarihela sai muteko malamulo awo? Mweettelo xeeni onrowa omuhakalaliha Tiithi aka ori wiirimu?’ (Musome Miruku 3:5, 6; Yakobo 1:5.) Vaavo vanittharihela anyu malamulo wala malakiheryo a Biibiliya okathi onipaka anyu yoothanla, nyuwo munnaalimaleliha aahiiso owiixuttiha ankhili anyu. Mwaalimaleliha ankhili anyu, munrowa okhala mutthu oolipa momunepani.

14. Nnaamwi niphavelaka osuwela itthu sinceene wira nrowe vahoolo momunepani, nsyakeke opaka exeeni?

¹⁴ Nnaamwi mutthu okisaka okhoomala mmukhalelo wa werutthuni, masi wunnuwa mmukhalelo womunepani khonikisa. Yoolya tenimwiiriha mutthu wunnuwa. Tivonto, Paulo aahimmye so: “Yolya yolipa ti y’atthu atokwene”. Olya yoolya yoolipa yomunepani ti etthu enrowa olipiha waamini wanyu. Weettela  ele eniixutta anyu ontaphulela ankhili, nto Biibiliya onihimya so: “Mana osuwela ti wophaveleya ovikana maluku òwarya”. Tivonto, hiyo nohaana ophavelaka ni murima wotheene ikeekhai seiye Tiithi ihu onniixuttiha awe. (Miruku 8:11; 1 Pedru 2:2) Tthiri, osuwela itthu sinceene ni okhalana ankhili, ohiniiriheke wiixoona okhala atthu oolokexa waavikana akina. Nohaana wiitokosa wira wiixinnuuha aahiiso mikhalelo sikina soohiloka sihikhale vamurimani vahu. Paulo olempe so: “Mukoheke murim’anyu: mòneke mwari ni wamini”.​—2 aKorinto 13:5.

15. Xeeni ophenta oryaaya wootthuneya wira nrowe vahoolo momunepani?

¹⁵ Muteko wooteka empa pooti omala, masi muteko woorattela empa eyo khonimala. Vannitthuneya olokiherya ni orattela empa eyo, nave-tho ikwaha sikina pooti ovekelaka wuncererya empa eyo. Exeeni enireerela ahu opaka wira nlipe ni nivikaniheke orowa vahoolo momunepani? Nohaana okhala atthu oophenta. Hiyo nohaana omphentaka vanceene Yehova ni annihu. Akhala wira khanrina ophenta, osuwela ni miteko sahu sotheene khasintekeleya etthu, eyo piiyo, ethiru ntoko elaata ennyakula. (1 aKorinto 13:1-3) Nakhalana ophenta, nnoolipa ni nnoovikanihaka orowa vahoolo mmukhalelo womunepani.

16. Muupuwelo xeeni onitumererya awe Satana, ni exeeni Yehova onnivaha awe wira nsyakeke muupuwelo owo?

¹⁶ Nrowe nthokorerye etthu ekina eniiraneya mmuteko wooteka. Wira mukhale oolipa ntoko mutthareli ekeekhai a Kristu, muhaana okasoopa muupuwelo anyu. Satana, yoowo onilamulela olumwenku ola, onnisuwela saana moota woowiiriha atthu wuupuwela itthu soohiloka. (aÉfeso 2:2) Wuupuwela itthu soohiloka eri etthu yootakhala wa muKristau, okhala wira onlikana ni mwaamukokho ontthupa matera anitekeliwa empa. Eri etthu yoohakalaliha osuwela wira Yehova oonivaha etthu yooloka, eyo piiyo, nlipelelo, wira onikhaliherye osyaka muupuwelo woohiloka.

17. Moota xeeni Biibiliya onooniherya awe efaita erina aya nlipelelo?

¹⁷ Biibiliya onniromola ikaruma soovirikana somunepani,  seiyo sinnikhaliherya owana ninvirikanyaka Satana ni olumwenku awe. Ekaruma yootthuneya vanceene mu ekhotto eyo ti ekapaseeti, eyo piiyo, “ororomela wopowa”. (1 aTesalonika 5:8) Nakhotto a okathi wa khalai, aanisuwela wira aahiware ekapaseeti aamookhwa okhottoni. Ekapaseeti, yeeyo ikwaha sinceene yaapakiwa ni eyuuma ni yaawariheliwa manri aahiiso esapala ya inama, yaanilipihiwa vanceene wira okathi ikartuxu sinimana aya ekapaseeti eyo, sihimphwanyeke ole owanre. Ntoko siisaale ekapaseeti enittiyelela aya muru, nto nlipelelo, nnoowerya waakiherya muupuwelo anyu.

18, 19. Ntakiheryo xeeni Yesu ovanhe awe na olipelela, nto ninrowa omutakiha sai?

¹⁸ Yesu oovaha ntakiheryo nuulupale na ovarexexa nlipelelo. Nkahaya muupuwelele ele aavilenle awe ohiyu wookiserya wa okumi awe valaponi. Mpatthani awe muulupale aahinvariha mwaha woophavela musurukhu. Mukina aahimukhootta. Akinaku yaahimutthyawa. Atthu a elapo awe yaahimukhootta, khokhuwela yaahimeeryaka atoropa ooRoma wira amuhaaxe mpakha okhwa. Tthiri khuuvo pinaatamu onrowa ophwanyiwa soweeha samphwannye Yesu. Exeeni yaamukhalihenrye ovilela? Eliivuru ya aHéberi 12:2, NM, enaakhula so: ‘Mwaha wa otteeliwa murima aalipelela awe, nto aahivilela wiiviwa vamwirini va nihaaxeryo ohithokoreryaka wuuliwa muru iwo: tivonto okilanthe awe moono woolopwana wa ehice ya Muluku’. Yesu khonaliyale ‘otteeliwa murima aalipelela awe’.

¹⁹ Etthu xeeni yotteeliha murima Yesu aalipelela awe? Yesu aanisuwela wira avikaniha ovilela nnaamwi aahaawa, aarowa okhaliherya otteelihiwa nsina na Yehova. Aarowa ovaha onamoona wuulupalexa wira Satana nawoothe. Tthiri, khiivo etthu ekina yaarowa omuhakalaliha Yesu ovikana nlipelelo nno! Nave-tho, aahisuwela wira Yehova aarowa omutthuvela mwaha wa ororomeleya wawe, ni moohipisa aarowa otthikela okhala ni Tiithi awe, wiirimu. Hata okathi yoole samphwanya awe mixankiho suulupalexa, Yesu aahivikaniha wuupuwelela nlipelelo nne nootteeliha murima. Nohaana otthara ntakiheryo nawe. Nave-tho, sookhala itthu sootteeliha murima ninlipelela ahu. Yehova oonivaha eparakha yuulupalexa, eyo piiyo, okhaliherya  wira ntteelihiwe nsina nawe nuulupale. Hiyo nnoowerya wooniherya wira Satana nawoothe, akhala wira nnoomuthanla Yehova okhala Mwene ahu ni ovikaniha okhala moophentani mwa Tiithi ahu, moohicikha etthu sa weehereriwa khino onrowa onikhumelela.

20. Exeeni enrowa wookhaliherya wuupuwelaka itthu sooloka ni okhalana nlipelelo?

²⁰ Yehova khahiyo paahi oniphavela waatthuvela arumeyi awe oororomeleya, masi-tho onnisiveliwa vanceenexa opaka eyo. (Yesaya 30:18; mmusome Malakhiya 3:10.) Onnisiveliwa waavaha arumeyi awe itthu sotheene sooloka simphavela aya. (Esalimo 37:4) Tivonto, nvikaniheke olipelela okathi onrowa aya wiiraneya anatiri a Muluku. Muhikhala-khale mweemereryaka miyuupuwelo soohiloka, soopahuwa, ni soowuntta sa elapo ya Satana, sihononaka murima anyu. Akhala wira munepa wa olumwenku ola onimoohapuwelani, mooluttuweliwa munvekele Yehova wira oovaheeni ‘murettele onvikana osuwela wa mutthu’. Murettele owo wa Muluku, onoosuka murima anyu ni muupuwelo anyu.​—aFilipi 4:6, 7.

21, 22. (a) Nlipelelo xeeni noolokexa nniwehererya aya “muttitthi mulupalexa”? (b) Voohimya sa itthu sinilipelela aya maKristau, tiivixa enoohakalalihani vanceene, nto wiimananiha xeeni onrowa anyu opaka?

²¹ Tthiri, nna nlipelelo nootteeliha murima ninreerela ahu wuupuwelela! Akhala wira muniirela mpantta “muttitthi mulupalexa”  yoowo onrowa woopowa “maxakha malupale” anrwa, muhaana wuupuwela moota munrowa anyu okhalaka nuuvira okathi owo. (Wisupulula 7:9; Matheyo 24:21) Vaavo Satana ni malaikha awe ootakhala ahinrowa aya waawokaka apinaatamu, nyuwo munrowa ohakalalaka vanceenexa mmukhalelo ohinwerya anyu wuupuwela olelo-va. Niireke wira ookhala pinaatamu ohitonko ohaawa mwaha wa itthu sootakhala sa elapo ela ya Satana? Tthiri, nuuvira itthu iya sootakhala sa Satana, vanrowa okhala voohakalaliha vanceene otatuxa elapo ela okhala eparayiisu, nihooleliwaka ni Yesu ni 144.000 anamalamulela akhwaawe! Nto, ninnitteeliwa murima vanceene osuwela wira ninnilipelela elapo ehinrowa okhala iretta ni ikwerere, ni ninrowa ahu owaakhelaka paahi ale anaaphenta ahu anrowa ohihimuwaka, wira akhaleke ntoko Muluku saaphavela awe! Vaavo vanrowa ahu waattamelaka wanikisa wa yoottheka, enrowa okhuveelaka etthuvo yuulupale elempwale eliivuru ya aRoma 8:21, eyo piiyo, “otaphuwa n’uvuwa w’àna a Muluku”.

²² Yehova oniphavela wira mphwanye otaphuwa iwo wuulupalexa, weiwo ohiniwerya anyu wuupuwela moota sinrowa ya okhala. Wiiwelela tonrowa woophwanyihani otaphuwa iwo. Niireke wira vaavo vanuupuwelela anyu otaphuwa iwo, khoniwiirihani wiimananiha olelo-va wira mmwiiweleleke Yehova khuta nihiku? Tthiri, mutepeke wunnuwa mowaaminini mwanyu mowaaryexa, wira mukhale moophentani mwa Muluku okathi wotheene!