Okhala wene, vannihakalaliha waakhela ihapari sooreera. Niireke mwaanisuwela wira sookhala ihapari sooreera wa nyuwo ni ale munaaphenta anyu?

Ihapari iyo siri mBiibiliyani, eyo piiyo, eliivuru Mpattuxa a olumwenku wotheene, Yehova Muluku, aarumme awe olempwa iyaakha sinceene sivinre. Eliivuru ela, ninrowa othokorerya iliivuru xexe sa mBiibiliyani sirina ihapari sooreera wa atthu otheene. Iliivuru iyo sinikuxa masina aalopwana Muluku aarumenle awe wira alepe, niire so, Matheyo, Marko, Luka ni Yohani.

Atthu anceene anniihana iliivuru iyo xexe okhala Ivangelyo. Iliivuru iyo, sinnilavula evangelyo aahiiso ihapari sooreera voohimya sa Yesu. Nave sinnooniherya wira Yesu tothanliwe ni Muluku wira owoopole apinaatamu. Nave-tho oomukhaliha Mwene a Omwene awe wira aavahe mareeliho ahinimala atthu otheene animwaamini.​—Marko 10:17, 30; 13:13.

Xeeni Muluku ohalaka waarumeela atthu axexe wira alepe sowiixuttiha ni sowiiraneya sa okumi wa Yesu?

Ninniphwanya mareeliho mwaha woorumeeliwa atthu awo wira alepe, ele Yesu aahimmye awe ni aapanke awe. Nilikanyihe so: Nwuupuwele atthu axexe anwiriyanaka mwiixuttihi oovuwa. Mulopwana okilanthe ohoolo, mulipa-ooliviha mpoosito. Okilanthe moono woolopwana, meediku. Mulopwana oninwiriyana ori ene moono woothiyana, mulipa-oototha ihopa ni mpatthani awe. Nto mulopwana a neexexe, mmiravo waavikana othene ni oninwiriyana mwiixuttihi ori ene ottuli. Otheene aya toororomeleya ni khula mutthu oninwiriyana moovarihana ni makhalelo awe. Akhala wira alopwana ala annilepa itthu Yesu aahimmye awe ni opaka, anootthokiherya itthu iyo moovarihana ni makhalelo aya. Vaavo ninthokorerya ahu sowiiraneya iyo xexe, moovarihana ni makhalelo ni soolakela sa khula mmosa, nnoowerya woona itthu sotheene mwiixuttihi aahimmye awe ni aapanke awe. Nlikanyiho nla, ninnooniherya mareeliho nimphwanya ahu mwaha woolempwa ivangelyo xexe sinimuhimya Yesu, Mwiixuttihi Muulupale.

Nlikanyiho nna, mulipa-ooliviha mpoosito oniphavela wira evangelyo awe yaasiveleke aYuda. Nto aahilepa soowiixuttiha ni sowiiraneya iyo wira  aakhaliherye aYuda. Vano, meediku onnilavula vanceene sa openuxiwa wa aretta ni atthu oorakala. Nto khonlavula itthu sikina mulipa-ooliviha mpoosito onihimya awe aahiiso onilavula mwa enamuna ekina. Mpatthani awe mwiixuttihi onnilepa moonelo ni mikhalelo sa mwiixuttihi. Vano, mmiravo onnihimya mwa enamuna yowaakuveya ni mookwasa. Masi, othene aya anihimya itthu seekeekhai. Eyo ennooniherya wira ivangelyo iya xexe, sinninikhaliherya wunnuuherya wiiwexexa wahu miteko, soowiixuttiha ni mikhalelo sa Yesu.

Woonasa wene, atthu akina pooti ohimya ‘Evangelyo ya Matheyo’ aahiiso ‘Evangelyo ya Yohani’. Eyo khahiyo yootthekeya, okhala wira khula evangelyo yookhalana ‘ehapari yorera ya Yesu Kristu’. (Marko 1:1) Masi nnaamwi sikhanle ene ivangelyo xexe, eri evangelyo emosa paahi aahiiso ihapari sooreera voohimya sa Yesu.

Atthu anceene ansoma Nuulumo na Muluku, annilikanyiha itthu siniphwanyaneya evangelyo ya Matheyo, Marko, Luka ni Yohani. Mwaakha wa 170 EC, mulipa-oolepa oniihaniwa Taciano, a wAsiria aahiimananiha opaka eyo. Owo aahoona wira iliivuru iya ti sekeekhai ni suupuxeriwe ni Muluku. Nto aahilepa eliivuru awe eniihaniwa Diatessaron, olavulaka sowiiraneya sa okumi ni muteko woolaleerya wa Yesu.

Eliivuru ela, Yesu ti Ephiro, Ekeekhai ni Ekumi enipaka etthu emosaru, masi mwa enamuna yoomalela ni yekeekhai. Eyo yooweryaneya, okhala wira mahiku ala ninniiwexexa saana wiiraneya wa iprofesia ni malikanyiho a Yesu. Wiiwexexa iwo, onninikhaliherya osuwela itthu Yesu aahimmye awe ni aapanke awe ni woona moota siiraneyale aya. Atthu anithipa mapuro yaakhaliwa khalai, anninikhaliherya osuwelexa itthu sikina silempwale ivangelyo iya xexe. Tthiri, khuuvo mutthu onitthuneya ovarexexa muupuwelo awe, voohimya sa moota itthu iyo siiraneyale aya. Tivonto, eliivuru ela Yesu ti Ephiro, Ekeekhai ni Ekumi ennitthokiherya mwa enamuna yooloka ni yekeekhai.

Vaavo munisoma anyu eliivuru ela, mmananihe woona ele eniixutta anyu ni moota enrowa aya waakhaliherya ale munaaphenta anyu. Muupuweleke wira Yesu Kristu aahimuleela Tome wira: “Miyo k’ephiró. Miyo k’ekekhaí. Miyo k’ekumí. Khavo onwerya orowa w’Atithi, ahivinre mwa miyo”.​—Yohani 14:6.

Eliivuru ela, Yesu ti Ephiro, Ekeekhai ni Ekumi enimookhaliheryani woona wira Yesu tthiri ti ‘ephiro’. Maana owo paahi tonnikhaliherya omwaattamela Yehova Muluku, nirumeelaka nivekelo. Nave Yesu ti ephiro, okhala wira onninikhaliherya otthikela wataana ni Muluku. (Yohani 16:23; aRoma 5:8) Tivonto, Yesu paahi tonnikhaliherya wataana ni Muluku.

Yesu ti ‘ekekhai’, maana ele Yesu aalavula awe ni aapaka awe yaanivarihana ni ekeekhai. Tthiri Yesu aaneettela ekeekhai. Iprofesia sinceene sahiiraneya mwa yoowo, maana “sothene . . . sihakhuleliwa ni Yesu wira ‘Ayo’”. (2 aKorinto 1:20; Yohani 1:14) Iprofesia iyo sinninikhaliherya woona muritti muulupale Yesu orina awe wira yiiraneye yoolakela ya Muluku.​—Wisupulula 19:10.

Nave-tho, Yesu ti ‘ekumi’, maana mukuttho ni okumi awe woomalela, onninikhaliherya ophwanya “ekumi yekekhai”, eyo piiyo, “ekumi yohimala”. (1 Timótheyo 6:12, 19; aÉfeso 1:7; 1 Yohani 1:7) Nave, Yesu ohooniherya wira ti ‘ekumi’ wa atthu imilyau sinceene akhwiiye yaawo anlipelela ohihimuxiwa wira yakhaleke mahiku otheene mParayiisu.​—Yohani 5:28, 29.

Otheene ahu, nihaana oxukhurela ele Yesu opanke awe wira yiiraneye yoolakela ya Muluku. Tivonto, muttottele mureerelo wiixutta voohimya sa Yesu, yoowo ori ‘ephiró, ekekhaí ni ekumí’.