Nuumala mahiku manli ori ene oSamariya, Yesu aahirowa elapo awe. Owo aahilaleerya vanceene muttetthe wa oYudeya, nto khaatthikenle oGalileya wira amumule. Masi, aahipacerya muteko muulupale woolaleerya, opuro yoole annuwenle awe. Yesu khoona wira aamwaakheliwa saana, maana aahimmye so: “Profeta khanakheliwa orattene mulaponi mwawe”. (Yohani 4:44) Ohiya okhala ni Yesu, awiixutti awe yaahirowa mmawannyeya ovara miteko saya.

Yesu aalaleya muhupi xeeni? Owo aalaleya Omwene oriki: “Omwene wa Muluku ori vakhiviru. Murukunuxe mirima sanyu, mwamini ehapari yorera”. (Marko 1:15) Atthu yoonela sai? Tthiri, atthu anceene a oGalileya yaahimwaakhela saana ni omuttittimiha vanceene Yesu. Khahiyo wira yaapanke eyo mwaha wa muhupi awe. Okhala wira atthu akina yaahikhala okathi wa Paasikha oYerusalemu myeeri vakhaani saavinre, nto yaahoona miiriirya sinceene Yesu aapanke awe.​—Yohani 2:23.

Opuro xeeni Yesu aapacenrye awe muteko awe woolaleerya oGalileya? Woonasa wene waari oKanani, weiwe aatatunxe awe maasi khula eviinyu, efesta ya ekasamento. Ekwaha ya nenli Yesu aari awe oKanani, aahisuwela wira aahikhala mmiravo ahaareere owereiwa, onahala okhwa. Owo aari mwaana a mukhulupale a Herodi Antipa, mwene yoowo muhoolo mwaya iikitthale exiko ya Yohani Mbatiza. Mukhulupale ole aahiiwa wira Yesu aakhuma oYudeya orowaka oKanani. Tivonto, mulopwana ole aahikhuma oKafarnawu orowaka okumana Yesu oKanani. Oriipiwe ene murima vanceene, mukhulupale ole aahimuleela Yesu wira: “Pwiya, nkarwani, mwan’aka ahinatthi okhwa!”​—Yohani 4:49.

Woonasa wene, waakhula wa Yesu waahimuhakalaliha vanceene mulopwana ole. Yesu aamwaakhunle so: “Murowé: mwan’inyu mukumí!” (Yohani 4:50) Mukhulupale ole a Herodi aahimukupali Yesu, nto aahitthikela owannyawe. Eettaka mphironi aahimphwanya murumeyi awe, yoowo aaphavela omuleela wira mwanawe mukumi! Ophavelaka osuwela okathi mwanawe aavonihiwa awe, mukhulupale ole aahimukoha wira: “Ovonné okathi xeni?”

Owo aakhunle so: “Nsana, ovinrene othana eriyari, eretta ti yamuhiyalyaya”.​—Yohani 4:52.

Mukhulupale ole aahoona wira waari okathi yoole Yesu aahimmye awe wira: “Mwan’inyu mukumí!” Nuumala-vo, mukhulupale ole, murumeyi awe ni atthu otheene a vatthokoni vawe yaahikhala atthareli a Kristu.

Muttetthe wa oKanani, Yesu aahipaka miiriirya miili. Mmosa aatatunxe maasi khukhala eviinyu. Mukina, ori ene ikiloomo 26, Yesu aahimpenuxa mwaana aawereiwa. Tthiri, Yesu khahiyo aapanke miiriirya seiya paahi. Masi mwiiriirya ola atthu a oGalileya khiyaarowa oliyala. Mwekeekhai Yesu profeta eemereriwe ni Muluku. Niireke ‘profeta ola onimwakheliwa orattene mulaponi mwawe’?

Eyo yaarowa wooneya nuumala Yesu ophiya elapo awe oNazarethi. Exeeni yaarowa omwiiraneela?