Okathi Yesu aavikaniha awe wiixuttiha oYudeya, aahilavula nlikanyiho na makampusi ni masisi, nenno naakhalihenrye ale yanwiriyana wiiwexexa saana. Woonasa wene, aYuda ale yaanuupuwela masu a Davidi ani: “Apwiya ti makampusi aka: khivo enikihalela. Awo annikiroiha mapuro òwatta yolya: annikihola omuró ori màsi òrirya, wira kamumuleke”. (Esalimo 23:1, 2) Esaalimo ekina, Davidi aahilattula nloko nne oriki: “Murwé, nakokhorele Apwiya vowalapela: nakokhorele Apwiya anipattunxe. Tthiri awo ti Muluku ahu, hiyo ná nloko naya: awo t’akhanle makampusi ahu”. (Esalimo 95:6, 7) Tthiri, aIsarayeli ale yeettela Nlamulo yaalikanyihiwa ni nikoto na ipwittipwitthi.

Nto “ipwittipwitthi” saanikhalana “nsisi” naya, mwaha woowi atthu ale yaayariwe yeettelaka nivarihano na Nlamulo na Moise. Nlamulo naari ntoko equintaali, yeeyo yaakhapelela wira ahihononiwe ni atthu yahaatthara Nlamulo na Moise. Masi aIsarayeli akina yaanihasula nikoto na Muluku. Yesu aahimmye wira: “Kinohimeryani ekhweli: ole onìra akelaka munsisini muri ipwittipwitthi, khuhiyàvira vamukhora, khíyatupha nipuro nikina, owo nawiye, mulavilavi. Vano, ole onvira vamukhora t’ukhanle makampusi a ipwittipwitthi”.​—Yohani 10:1, 2.

Woonasa wene, yaawuupuwela atthu yaale yaihimya okhala Mesiya aahiiso Kristu. Awo yaari ntoko anawiiye ni alavilavi. Nto atthu ale khiyaatthuneya waatthara alavilavi awo. Ohiya-vo, awo yaahaana omutthara “makampusi a ipwittipwitthi” yoowo Yesu aamuhimya awe.

Tthiri Yesu aahimmye so: “Mulipa a mukhora onimuhulela yola. Ipwittipwitthi sinnisuwela nsu nawe: tthiri makampusi onnìhana ipwittipwitthi siri sawawe, khula emosa nsina naya, khukumiherya vaté. Numalá okumiha ipwittipwitthi sawe sothene, onniholela, n’iyo sinnimutthara ottuli, okhala wira sinnisuwela nsu nawe. Vano khasinimutthara mutthu sinimutikhinaya: ohiya vo, sinomutthyawa, mana khasinsuwela nsu na mutthu mukina”.​—Yohani 10:3-5.

Wanipacerya, Yohani Mbatiza, aari ntoko mulipa-oohula mukhora, nto aahimuhiya Yesu okhala makampusi aatthuneya otthariwa ni ipwittipwitthi sa nthoonyeryo seiyo seettela Nlamulo. Ipwittipwitthi sikina sa oGalileya ni sa oYudeya saahisuwela nsu na Yesu. Nto Yesu aarowa oroiha woowi? Exeeni yaarowa okhumela mwaha wa omutthara Yesu? Atthu akina yaiwale nlikanyiho nle woonasa wene yaanikoha okhala wira “awo khiyàiwale etthu aphavelawe walèla”.​—Yohani 10:6.

Yesu aahaatthokiherya wira: “Kinolèlani ekhweli wira: miyo ka mukhora wa ipwittipwitthi. Othene ale arwiye miyo kihinatthi, anawiye n’alavilavi. Vano ipwittipwitthi kisawìwelenle. Miyo ka mukhora: ole onkela aviraka mwa miyo, onimopowa. Owo onokela, onokhuma, onophwanya yolya”.​—Yohani 10:7-9.

Mwekeekhai Yesu aahilavula etthu esya. Atthu ale yanwiriyana yaahisuwela wira owo khahiyo aari mukhora wa nivarihano na Nlamulo, nenno naakhanle iseekulu sinceene. Owo aahimya wira ipwittipwitthi aakunxe awe aaroiha nsisi nikina. Exeeni yaarowa okhumelela?

Yesu aahihimya muteko awe, oriki: “Miyo kirwiye wira atthu ekhalane ekumi, ekumi yomalela. Miyo ka makampusi òrera murima. Makampusi òrera murima onnileva ekumi awe mwaha wa ipwittipwitthi sawe”. (Yohani 10:10, 11) Yesu aahaamaaliha awiixutti awe, oriki: “Muhòvé, nyuwo nikoto namukhani, mana Atith’inyu ohasivela wovahani Omwene aya”. (Luka 12:32) Ale aniirela mpantta “nikoto namukhani”, ti yaawo Yesu aarowa awe waakeliha nsisi nsya, wira “ekhalane ekumi, ekumi yomalela”. Mwekeekhai, ela eparakha yuulupale wa ale aniirela mpantta nikoto naamukhaani!

Masi Yesu khaamalenle vaavale. Owo aahivikaniha oriki: “Kokhalana-tho ipwittipwitthi sikina  sihikhanle nikoto nenla: seiyo-tho kihana othukumanya. Iyo sinimwiwa nsu naka: siso ninrowa okhalaka nikoto nimosa ni makampusi aya mmosá”. (Yohani 10:16) “Ipwittipwitthi sikina” khahiyo saari sa ‘nikoto nle’. Tthiri saari sa nikoto nikina noovirikana ni “nikoto namukhani”, nenno naarowa ovahiwa Omwene. Makoto ala manli aahiiso masisi a ipwittipwitthi, aakhalana nlipelelo noovirikana. Masi nnaamwi vari siiso, ipwittipwitthi sa masisi oomanli saamuttottela mureerelo muteko wa Yesu. Yesu aahimmye so: “Atithi annikiphenta: tthiri miyo kinnileva ekumi aka”.​—Yohani 10:17.

Atthu anceene a muttitthi ole yaahaakhula wira: “Ola namukhwa anepa. Miruku sommalela”. Masi atthu akina yaahooniherya wira yaaniphavela onwiriyana ni omutthara Makampusi Ooloka. Nto awo yaahihimya wira: “Mutthu ori ni nlaikha notakhala khanlavula sisa. Khino nlaikha notakhala nnowerya watthukula maitho alipa-òhona?” (Yohani 10:20, 21) Woonasa wene yaahimya okathi yoole Yesu ampenunxa awe mulopwana ahoona.