Yesu iira omanle ene owiixuttiha arummwa awe axexe Omwaako Olivera. Nave aahaakhula nikoho naya na okhala-vo ni omala wa olumwenku.

Tthiri Yesu aahiluttuweliwa ovara muteko nihiku 11 na Nisani! Woonasa wene nihiku atthikenle awe oBethania wira arupe weiwo, Yesu aahaaleela awiixutti awe wira: “Mosuwela wira ahanle mahiku manli ophiya Pásikha: vanonto Mwana a mutthu onrowa ovahereriwa, wira akhomeliwe” vamwirini va nihaaxeryo.—Matheyo 26:2.

Woonasa wene, Yesu aahiviriha nihiku naattharelana, eyo piiyo, Namararu ori ene ni arummwa awe. Nihiku naavinre, niire so, Namanli, Yesu aahaapwapwela ahooleli a itiini ni aahaahimya okhala anawoothe. Nto awo yaaniphavela omwiiva. Vano nihiku 12 na Nisani, Yesu khaaronwe opuro wowaatta atthu. Maana aaphavela wira ehikhale etthu yaarowa omukhoottiherya omwiira Paasikha ni arummwa awe, nuumala okela nsuwa nihiku naattharelana 14 a Nisani.

Ohinatthi Paasikha, makhulupale a anamukuttho ni makhulupale makina, yaahixankiheya. Nto yaahithukumana etthoko ya mukhulupale a anamukuttho, Kaifa. Nthowa xeeni? Awo yaahinanariwa, okhala wira Yesu aahaahimya okhala anawoothe. Nto vano awo yaahivaanela onvara Yesu “n’ulavilavi aya, wira emwive”. Moota xeeni ni okathi xeeni yaarowa aya opaka eyo? Awo yaahimmye wira: “Nihinvare nihiku na nìra, wira ohikhumelelé onyakulihana w’atthu”. (Matheyo 26:4, 5) Awo yaanoova okhala wira atthu anceene yaanisiveliwa ni Yesu.

Moohipisa, akhulupale ale a itiini yaahixukuriwa ni mulopwana mmosa. Owo aari Yuda Isikaryoti murummwa a Yesu. Satana aahimwiiriha waavya enamuna yonvariha Pwiyawe! Vano, Yuda Isikaryoti aahaakoha wira: “Muntthuna  okivaha exeni, kòvahereryani Yesu?” (Matheyo 26:15) Awo yaahitteeliwa murima “khuvarihana onvaha musurukhu”. (Luka 22:5) Musurukhu ene kavi? Awo yaahiiwanana onvaha musurukhu 30 wa maluku wa eparatha. Okathi ole, epottha yaatumihiwa ixeekeli 30. (Okhuma 21:32) Ahooleli a itiini yaahihakalala vanceene, maana yoona wira Yesu aahikhweya epereso. Nto vano Yuda “aniphavela okathi w’onvahereya Yesu, atthu ehisuwelaka”.​—Luka 22:6.

Nihiku 13 na Nisani, naapacerya nuumala okela nsuwa Namararu ni naari nihiku nookiserya wa mahiku 6 Yesu aavirinhe awe ori ene oBethania. Olokiheriwa wookiserya wa Paasikha waarowa okhala nihiku naattharelana. Yaahaana okhalana mwaapwittipwitthi wira iiviwe ni wooxiwa otheene nuumala opacerya nihiku 14 na Nisani. Yaarowa omulya woowi Paasikha ni tani yaarowa omulokiherya? Yesu khahimmye etthu? Tivonto, Yuda khaarina etthu yoowaaleela akhulupale a anamukuttho.

Woonasa wene makaaripi a Namaxexe, ori ene oBethania, Yesu aahimuruma Pedru ni Yohani orowa oYerusalemu, oriki: “Murowé mwanetetele hiyo othene yolya ya Pásikha”. Awo yaahaakhula wira: “Muntthuna wira netetele vai yoly’eyo?” Yesu aahaatthokiherya wira: “Mukelakaru mmuttettheni, munokumana ni mulopwana mmosá ireiye munó wa màsi. Mwamutthare mpakha empa enrowawe okela, mwamuhimerye mwanene etthoko wira: ‘Mwixuttihi onnokohani wira: Nri vai nipuro ninrowaka olya-mo nìra na Pásikha vamosá n’awixutti aka?’ Mwanene owo onimothonyeryani mpani mwawe mosulu esàla yulupale ereheriwene: memmo mwetetele yoly’ahu”.​—Luka 22:8-12.

Moohaanyiherya mwaneene etthoko ole aari mwiixutti a Yesu. Woonasa wene, owo aanilipelela wira Yesu aamunvekela orumeela empa awe wira ompake Paasikha. Vaavo arummwa anli yaaphiyale aya oYerusalemu, yaahiphwanya itthu sotheene silokiheriwe ene, ntoko Yesu aahimmye awe. Tivonto, awo yaahoona wira mwaapwittipwitthi aahilikana. Nave yaahipaka mareheryo wira itthu sotheene sa Paasikha sikhale soolikana ene, wira Yesu ni arummwa awe 12 amwiire Paasikha.