Ohiyu wookiserya ori ene ni arummwa awe, Yesu aahaaleela wira: “Kahihimuwá mokhwani, kinoholela orowa oGalileya”. (Matheyo 26:32; 28:7, 10) Vano awiixutti awe anceene yaahirowa oGalileya. Masi yaarowa opaka exeeni?

Pedru aahaaleela arummwa 6 wira: “Miyo kinrowa ototha ihopa”. Otheene aya yaahaakhula wira: “Ni hiyano nnimottharani”. (Yohani 21:3) Yaahitotha ohiyu wotheene, khuhivara etthu. Varowaka oxa, Yesu aahaakhumelela ophareya, masi awo khiyaamusuwenle. Yesu aahiwiitthana oriki: “Amiravo, khamurina etthu enlyiwa?” Awo yaahaakhula wira: “Nnari! Khanrina!” Nto Yesu aahaaleela wira: “Murihele ntthavi mono wolopwana w’ekalawa: munophwanya”. (Yohani 21:5, 6) Awo yaahivara ihopa sinceene ahinawerya opurula ntthavi naya.

Yohani aahimuleela Pedru wira: “T’Apwiya!” (Yohani 21:7) Moohipisa, Pedru aahiwara ikuwo aarunle awe okathi aatotha awe. Pedru aahikhupwela mmaasini okata imeeturu 90. Arummwa akina, yaanimutthara vakhaani-vakhaani, apurulaka ntthavi naasanre ihopa.

Nuumala ophiya ota, awo yaahiweha “makhala a moro n’ihopa vasulu vaya, yahona-tho iphau”. Yesu aahaaleela wira: “Muruhe ihopa sìvalyanyu nanano”. Pedru aahipurula ntthavi naarina ihopa 153, suulupale! Nto Yesu aahimmye wira: “Rwani, mulyeke!” Khuvo aawenrye omukoha Yesu wira: “Nyuwo mwá pani?” Okhala wira yaahimusuwela. (Yohani 21:9-12) Ela yaari ekwaha ya neeraru Yesu aakhumelenle awe awiixutti awe ari ene anceene.

Yesu aahinvaha khula mmosa ephaawu ni ehopa. Nuumala-vo, owehaka ihopa iye, Yesu aahimukoha Pedru wira: “Nyuwo Simoni, mwana a Yohani! Munnikiphenta”, ovikana iya? Vano exeeni Pedru aaphenta awe vanceene? Niireke waari ototha ihopa aahiiso muteko aavahiwa awe ni Yesu? Pedru aahimwaakhula wira: “Ayo, Pwiya! Nyuwo mosuwela wira kinnophentani!” Nto Yesu aahimutumererya wira: “Mwalyiheke amwapwittipwitthi aka”.—Yohani 21:15.

Yesu aahimukoha ekwaha ya nenli: “Nyuwo Simoni, mwana a Yohani! Nyuwo munnikiphenta?” Woonasa wene, otikinihiwe ene Pedru aahaakhula moolipiherya oriki: “Ayo, Pwiya! Nyuwo mosuwela wira kinnophentani!” Yesu aahilavula-tho masu aamulenle awe, oriki: “Mulyiheke ipwittipwitthi saka”.​—Yohani 21:16.

Yesu aahimukoha Pedru ekwaha ya neeraru: “Nyuwo Simoni, mwana a Yohani! Nyuwo munnikiphenta?” Pooti wira Pedru aaniikoha etthu yaamwiiriha Yesu ohimukupali. Pedru aahimwaakhula wira: “Pwiya, nyuwo mosuwela sothene! Nyuwo mosuwela wira kinnophentani!” Yesu aahitthikela ottittimiherya etthu aaphavela awe wira Pedru opakeke, oriki: “Mulyiheke ipwittipwitthi saka”. (Yohani 21:17) Tthiri ale anihoolela ahaana okhapelela ipwittipwitthi sa Muluku.

Yesu aahitthukiwa ni wiiviwa mwaha woovara muteko aarummwale awe ni Muluku. Vano Yesu aahimooniherya Pedru wira aarowa olupatthiwaka. Yesu aahimmye wira: “Mwaryanyu mmiravo, nyuwo mwanìwara mmansinyu khíyarowa watthunanyu. Vano okathi onùluvalanyu, munimòkola matat’anyu, mukina òwariheni, òroiheni ohintthunanyu-wo”. Tthiri Yesu aahimutumererya wira: “Kitthareni!”​—Yohani 21:18, 19.

Pedru aahinweha murummwa Yohani khumukoha Yesu wira: “Pwiya, ankhi ula entthuna omukhumelela exeni?” Exeeni yaarowa omwiiraneya murummwa yoowo Yesu amphenta awe vanceene? Yesu aahimwaakhula wira: “Miyo katthuná wira owo akhale mpakha vanrwaka, erivo yawinyu exeni?” (Yohani 21:21-23) Nto Pedru aahaana omutthara Yesu ohiwehaka ele atthu akina yaarowa aya opaka. Vano Yesu aahooniherya wira Yohani aamukhala mukumi nuumala arummwa akina okhwa. Ni wira aamoonihiwa Yesu opaceryaka olamulela Moomweneni.

Okhala wira saahikhala itthu sikina Yesu aapanke awe, olepa itthu iyo, khisaarowa ophiyerya murooluni.