Paasikha ookiserya Yesu aamwiirale awe aari a vameekhaaya. Maana aanisuwela wira moohipisa aarowa okhwa, nto ahiilokiherya wira omulye Paasikha vamosa ni awiixutti awe nave aahipaceriha niira nsya, eyo piiyo, Yoolya ya Ohiyu ya Apwiya. Yesu aahimuruma Pedru ni Yohani wira yalokiherye opuro yaarowa aya omulya Paasikha. (Luk 22:7-13; nwehe elatarato eri vakaapani.) Eyo enniixuttiha wira nave hiyo nihaana wiilokiherya wira Nuupuwelele okhwa wa Yesu, ninrowa wiiraneya nihiku 27 a Março. Moohaanyiherya, miloko soothanla opuro, mulipa oolavula mwaha, anna anrowa olokiherya ithoonyeryo ni itthu sikina. Masi exeeni mukhanle anyu oopaka wira mwiilokiherye?

Mulokiherye murima anyu. Musomeke soolepa sa okathi owo ni muupuweleleke. Nyuwo munoophwanya eprokrama eyo elivirinyu Ovarerya Soolempwa Khuta Nihiku. Wala mwaaphavelaka soohimmwa sikina, munwehe Apêndice B12 a Biibiliya Tradução do Novo Mundo da Bíblia Sagrada. (nave nwehe ekadernu Okumi ni Orummwa Ahu Ekaderno Enirumeeliwa Omuthukumanoni ya Abril a 2020.) Wira mphwanye myaha sikina voohimya sa mureerelo nimphwanya ahu mwaha wa Yesu okhwa wira onoopole, murumeeleke okathi woomulompa Muluku vatthokoni, munwehe Índice das Publicações da Torre de Vigia wala Eliivuru Enaakhaliherya Anamoona a Yehova Otokosa Myaha Sikumiheriwe.

Mwaalattule atthu akina wira arwe Wuupuwelela. Mwiimananihe waalattula atthu anceene. Nwuupuweleke atthu munireerela anyu waalattula. Mwa ntakiheryo, atthu munaaxukurya anyu okathi woolaleerya, mutonko anyu waasomiha Biibiliya, munaasuwela anyu ni amusi anyu. Axitokweene ahaana waalattula nave ale ahiyale olaleerya. Masi vakhala wira mutthu owo khonikhala muttetthe anyu, nyuwo pooti orumeela esaiti ahu jw.org, murowe opuro oni: ONISUWELA, nuumala-vo muttapunye mpantta oni: “Wuupuwelela”.

Etthu xeeni ekina nikhanle ahu oopaka wira niilokiherye nihiku na Wuupuwelela?