Ee, Xoossay deꞌiyoogaa bessiya mino naqaashay Geeshsha Maxaafan deꞌees. Nuuni Xoossay deꞌiyoogaa ammaniyoy naqaashi baynnan woy nu haymaanootee hegaadan giidi tamaarissido gishshawu gidana bessenna; Geeshsha Maxaafay nuuni ‘ubbabaakka paaccidi’ ‘akeekidi’ ammananaadan minttettees. (1 Tasalonqqe 5:21; 1 Yohaannisa 5:20) Geeshsha Maxaafay yootiyo kaallidi deꞌiya ammanttiyaabata beꞌa:

•   Maaraa mankkaa naagida salo gufanttuwan deꞌuwan deꞌiyaabay Xoossay deꞌiyoogaa qonccissees. Geeshsha Maxaafay hagaadan gees: “Aissi giikko, keetta ubbaa keexxidaagee issi asa; shin ubbabaa keexxidaagee Xoossaa.” (Ibraawe 3:4) Tamaarida daro asay, akeekanawu waayissenna he qofay ammanttiyaagaa gidiyoogaa akeekidosona. a

•   Nuuni asa gidiyo gishshawu, nu deꞌuwaa halchchoy aybakko eranawu koyiyoogee wottin deꞌiyaaba. Deꞌuwan deꞌanawu nuussi koshshiyaabay deꞌikkonne, deꞌuwaa halchchuwaa akeekana xayikko ufayttokko. Geeshsha Maxaafay yootiyoy qumaa namisettiyoogaa gidennan ayyaanaabaa namisaa hegeekka, Xoossaa eranawunne awu goynnanawu koyiyoogaa bessees. (Maatiyoosa 4:4; Ajjuutaa 4:11) Xoossay nuuni A eranaadaaninne awu goynnanaadan oottidi nuna medhdhidoogee I deꞌiyoogaa xalla gidennan, I nuna siiqiyoogaanne nuuni aara dabbotanaadan koyiyoogaa bessees.

•   Geeshsha Maxaafan deꞌiya hiraagati daro layttappe simmin suure polettidosona. He hiraagati tuma gidiyoogee, eta yootida Xoossay asaappe eran keehi aadhdhiyoogaa bessees.—2 PHeexiroosa 1:21.

•   Geeshsha Maxaafaa xaafidaageeti eti deꞌido wodiyan asay akeekibeenna saynisee yootiyo tumubaa akeekidosona. Leemisuwawu, beni wode daro asay saꞌaa danggarssay, gudunttay woy booray tookki uttiis giidi ammanees. SHin Xoossay ‘saꞌaa aybikka baynnasan kaqqidoogaa’ Geeshsha Maxaafay yootees. (Iyyooba 26:7) Qassi saꞌay ‘irzzo’ mala giidi yootiyoogan saꞌaa qottaa Geeshsha Maxaafay suure yootees. (Isiyaasa 40:22) Daro asay Geeshsha Maxaafaa xaafidaageeti hegaa akeekidoy etawu Xoossay yootido gishshataassa giidi qoppees.

•   Geeshsha Maxaafay deexo gidida daro oyshata zaarees. Hegaa mala oyshatu zaaruwaa issi uri erennaba gidikko, Xoossi baawa giidi qoppana danddayees. Leemisuwawu, Xoossay asaa siiqiyaabanne ubbabaa danddayiyaagaa gidikko, waayeenne iitabay alamiyan daridoy aybissee? Asay loꞌꞌobaa aggidi iitabaa oottanaadan haymaanooteti eta darotoo denttettiyoy aybissee?—Tiitu 1:16.