Xoossay siyenna issi issi woosati deꞌoosona. Issi uraa woosaa Xoossay siyennaadan oottiya naaꞌꞌu gaasota akeeka.

1. Issi uraa woosay Xoossaa sheniyaara maayettennabaa gidikko

 Geeshsha Maxaafan deꞌiya A sheniyaara woy I koyiyoobaara maayettenna woosaa Xoossay siyenna. (1 Yohaannisa 5:14) Leemisuwawu, Geeshsha Maxaafay nuuni yaariyaappe naagettanaadan yootees. Ceeriyaa kaaꞌiyoogee issi uri yaaretanaadan oottees. (1 Qoronttoosa 6:9, 10) Yaatiyo gishshawu, neessi lotoree kiyanaadan maaddana mala Xoossaa woossikko I siyenna. ‘Taani koyiyooba ta koyiyo wodiyan Xoossay polana’ gaada ne qoppana bessenna. Hegaadan hanibeenna gishshawu neeni galatana bessees. Ayssi giikko, haraati Xoossaa ay oychchaneeshsha gaada hirggana danddayaasa.—Yaaqooba 4:3.

2. Makkalaabaa oottiya asi woossiyo woossa

 Bantta oosuwan Xoossawu azazettennaagaa bessiyaageetu woosaa I siyenna. Leemisuwawu, awu haggaaziyaabadan yootiiddi makkalabaa oottiya asata Xoossay hagaadan giis: “Intte daro woosaa woossikkokka, taani siyikke; aissi giikko, intte kushee suuttan munaqettiis.” (Isiyaasa 1:15) SHin eti bantta ogiyaa laammikkonne Xoossaara ‘zorettikko’ eti woossiyo wode I siyana.—Isiyaasa 1:18.