Yu Es Senters for Diziiz Kontrol end Privenshin giyo dirijjitee yootidoogaadan, layttay 15ppe 19 gidido yelagata oychchin etappe bagga gidiyaageeti doonaara mattumaa gayttidoogaa yootidosona. Ooral Seks Iz Ze Gud Nayt Kis giyo maxaafaa giigissida SHarlin Azama hagaadan gaasu: “Yelagata [doonaara mattumaa gayttiyoogaabaa] oychchiyaakko aynne metoy baynnabadan yootoosona; ubba qassi hegaa mattumaa gaytettadankka qoppokkona.”

•  Ne qofay aybee?

•  Tumay awugee?

•  Xoossay hegaa waati xeelliyaakko erana koshshiyoy aybissee?

 Kaalliya oyshata ee woy chii gaada zaara.

1.   Issi maccaara doonaara mattumaa gayttidoogan shahaarana danddayay?

   1.   Ee

   2.   CHii

2.   Doonaara mattumaa gayttiyoogee payyatettaaban qohii?

   1.   Ee

   2.   CHii

3.   Doonaara mattumaa gayttiyoogee wodiraa laammiyoogaa mala wolqqaama nagaree?

   1.   Ee

   2.   CHii

 Ne zaaruwaa kaallidi deꞌiya qofaara geeddarssa.

1.   Issi maccaara doonaara mattumaa gayttidoogan shahaarana danddayay?

    Zaaruwaa: CHii, shahaarana danddayukku. Hegaappe denddidaagan, doonaara mattumaa gayttiyoogaa daro asay qohennabadan qoppikkonne, hegee tuma gidenna.

2.   Doonaara mattumaa gayttiyoogee payyatettaaban qohii?

    Zaaruwaa: Ee. Doonaara mattumaa gayttiya uri hepataytis (A woy B), attumatettaa woy maccatettaa bolli kiyiya masunttaa, gonnooriya, herpisiya, eedisiyaanne Sipilesiya mala harggiyan oyqettana danddayees.

3.   Doonaara mattumaa gayttiyoogee wodiraa laammiyoogaa mala wolqqaama nagaree?

    Zaaruwaa: Ee. Issi asi hara uraa attumatettaa woy maccatettaa goꞌettidi hegaadan oottiyaaba gidikko, hegee mattumaa gaytetta geetettana danddayees.

 Doonaara mattumaa gayttiyoogaa Xoossay waati xeelliyaakko nuuni akeekanaadan maaddiya Geeshsha Maxaafan deꞌiya amarida xiqiseta beꞌa.

 Geeshsha Maxaafay hagaadan gees: “Xoossai intteppe koyiyoogee aibee giikko. . . shaaramuxiyoogaa muleera agganaagaa koyees.”​—1 Tasalonqqe 4:​3.

 Geeshsha Maxaafan “shaaramuxiyoogaa” geetettida qaalay aqo lagge gidennaageeti poliyo ubba qommo mattumaa gaytettaa, doonaara woy dulliyaara mattumaa gayttiyoogaa, woy qaaqqatidi hara uraa attumatettaa woy maccatettaa sohiyoogaa qonccissees. SHaaramuxiya uri ba oottidobaa gaasuwan gakkiya metuwaa cakkees; qassi ubbaappe aaruwan ayyo Xoossaara dabbotido dabbotay moorettees.—1 PHeexiroosa 3:12.

 Geeshsha Maxaafay hagaadan gees: “SHaaramuxiyaagee ba bolli nagaraa oottees.”—1 Qoronttoosa 6:18.

 Doonaara mattumaa gayttiya uri sahettananne Xoossaa dabbotido A dabbotay moorettana danddayees. Qassi I unꞌꞌettanaadankka oottana danddayees. Toking Seks Wiz Yur Kids giyo maxaafay hagaadan gees: “Aqo oyqqanaappe kase mattumaa gayttiya uri zilꞌꞌetteesinne bana pattennabadan xeellees; qassi ay qommo mattumaa gaytettaykka hegaa mala qohuwaa gattana danddayees.”

 Geeshsha Maxaafay hagaadan gees: “Taani GODAI, ne Xoossai, nena maaddiyaabaa tamaarissiyaagaa.”​—Isiyaasa 48:​17.

 Xoossay mattumaa gaytettaa xeelliyaagan kessido maarati nena maaddiyaabadan qoppayiyye? Woy neeyyo laꞌatettaa diggiyaabadan qoppay? Ha oyshata zaaranawu, kaamee dariyo ogiyaa deꞌiya dumma dumma tiraafike malaatata qoppa. Neeni hegeeta nena qohuwaappe naagiyaabadan qoppayiyye, neeyyo laꞌatettaa diggiyaabadan qoppay? Neeninne kaamiyaa laaggiya harati ha higgiyawu azazettana xayikko aybi hananee?

 Xoossay kessido maaratikka hegaa mala. Neeni he maaratuyyo azazettana xayikko, ne zeridoogaa zaarettada cakkiyoogee qoncce. (Galaatiyaa 6:7) Seks Ismart giyo maxaafay hagaadan giis: “Neeni likke gaada ammaniyoobaanne qoppiyoobaa aggada likke gidennabaa oottikko nena pattennabadan xeellana.” SHin, Xoossay kessido maaraadan neeni deꞌikko, neeyyo loꞌꞌo kanddoy deꞌana. Ubbaappe aaruwan, neeyyo geeshsha kahay deꞌana.​—1 PHeexiroosa 3:16.