Zaaretti oychchiyo wode woy Geeshsha Maxaafaa xannaꞌissiyo wode, ezggiyaageeti waanna qofaa akeekanaadan nuuni maaddana koshshees. He qofata leemisuwan qonccissiyoogan, nuuni eta wozanaa denttettananne tamaariyoobaa metootennan hassayanaadan oottana danddayoos.

Intte zaaretti oychchanawu woy Geeshsha Maxaafaa xannaꞌissanawu giigettiyo wode, ubba qofaa gidennan, leemisuwan intte qonccissanawu koyiyo waanna qofaa doorite. Yaatidi galla galla deꞌuwaara gayttida metenna leemisota goꞌettite. (Maa 5:14-16; Mar 2:21; Luq 14:7-11) Intte haasayissiyo uray diccido hanotaabaanne A oosuwaabaa qoppite. (Luq 5:2-11; Yoh 4:7-15) Ezggiya uri issi qofaa akeekido gishshawu ufayttiyoogaa beꞌiyo wode, inttekka ufayttana.

ERISSIYO ASHKKARA OOTTIYOOGAN UFAYTTITE—KASEPPE QARA GIDITE—AYFETTIYA QOFATA LEEMISUWAN QONCCISSITE, GIYO BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Geeshsha Maxaafaa xiqiseta tamaareti akeekanaadan maaddana bessiyoy aybissee?

• Niita Roome 5:12n deꞌiya tumaa leemisuwan waata qonccissadee?

• Loꞌꞌo leemisoy ezggiyaageetu wozanaa waati denttettana danddayii?

• Yihoowa dirijjitee giigissido biidotanne tamaarissanawu goꞌettiyo hara miishshata haggaazuwan goꞌettana bessiyoy aybissee?