Sean Gladwell/Moment via Getty Images
NAAGI UTTITE!
Kumetta Saꞌan Olaara Gayttidabawu 2 Triiloone Amarkkaa Doolaariyapppe Dariyagee Kiyiis—Geeshsha Maxaafay Woygii?
Kumetta saꞌan 2022n, awudeegaappe aaruwan 2.24 triiloone Amarkkaa doolaaree olaara gayttidabawu kiyiis; hegaappe dariya baggay kiyidoy Raashee Yukireene woraajjidoogaa gaasuwana. Istokholm Internashinal Piis Riserch Institiyutee (SIPRI) Hosppune 2023n kessido irpporttee, 2022n hanidabaa hagaadan gees:
Awurooppan olaara gayttidabawu kessido miishshay “issi layttaa giddon xeetaappe 13 kushe gujjiis; hagee 1991ppe simmin hanno gakkanawu Awurooppaa kawotettati issi layttaa giddon kessido daro miishsha.”
“Raashee … kessido miishshay xeetaappe 9.2 kushe dariis; hegee olaara gayttidabawu daro miishshaa kessiyogan he biittay alamiyan ichchashantta xekkaappe heezzantta xekkan uttanaadan oottiis.”
“Alamiyan olaara gayttidabawu kiyiya miishshaappe 39 kushiya kessiyogan” Amarkkay daro miishshaa kessiyageetuppe koyro xekkan deꞌees.
SIPRI irppottiya xaafiyogan maaddiya Dottoree Nan Tiyani, “mata wode alamiyan olaara gayttidabawu kessiyo miishshay gujji gujjidi biyogee, nuuni deꞌiyoy sarotettay xayi xayi biyo alamiyana gidiyogaa bessiyaba” yaagiis.
Ha wodiyan alamiya wolqqaama kawotettati issoy issuwara ooyettanaagaanne maayettennan ixxanaagaa, qassi tumu sarotettaa ehaana danddayiyabay aybakko Geeshsha Maxaafay kasetidi yootiis.
Olay daranaagee kasetidi odettiis
Geeshsha Maxaafay nuuni deꞌiyo wodiya, ‘wurssettaa wodiya’ yaagees.—Daaneela 8:19
Ha wodiyan issoy issuwara keesettiya alamiya wolqqaama kawotettati deꞌanaagaa Daaneela maxaafay kasetidi yootiis. Ha alamiya wolqqaama kawotettati issoy issuwappe aadhdhanawu issoy issuwa sugana. Hegaappe denddidaagan eti daro “duretettaa” woy miishshaa wurssana.—Daaneela 11:40, 42, 43.
Ha maalaaliya Geeshsha Maxaafaa hiraagaabaa gujjada eranawu, Polettida Hiraagaa—Daaneela SHemppo 11 giya biiduwa beꞌa.
Tumu sarotettaa waati demmanee?
Asaa kawotettaa sohuwan Xoossay ba Kawotettaa essanaagaa Geeshsha Maxaafay yootees. I, “mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.”—Daaneela 2:44.
Xoossaa Yihooway a mata wode, asay oottana danddayibeenna merinawu xayenna tumu sarotettay deꞌanaadan oottana. Waatidi? Saluwan eqqida A Kawotettay ola miishsha ubbaanne dano ubbaa xayssana.—Mazamure 46:8, 9.
Xoossaa Kawotettay oottanabaa gujjada eranawu, “Xoossaa Kawotettan ‘Sarotettay Darana’” giya huuphe yohuwa nabbaba.
a Yihoowa giyoogee Xoossaa buzo sunttaa.—Mazamure 83:18, NW.