1. Issi issi keettaa asau geemmi uttida ayba metoy deꞌii?

 KEETTAY xeelliyo wode minonne loꞌꞌiyaaba milatees. SHin keettaa godau biitta garssan deꞌiya baggay musiis. Issi issi so asaa hanotaykka hegaara issi mala. Kareera xeelliya urau ubbabay loꞌꞌo milatees; shin eta somꞌꞌoy pashkka gidiyo gishshau eta yashshaanne metuwaa hara asi erenna. Hara asau beettenna metoy so asaa sarotettay moorettanaadan oottees. Hegaadan oottana danddayiya naaꞌꞌu metoy, ushshay amale gidiyoogaanne son gakkiya qohuwaa.

2. (a) Ushshaa uyiyoogaa xeelliyaagan Geeshsha Maxaafay woygii? (b) Ushshaa amalee aybee?

² Geeshsha Maxaafay ushshaa likkiyan uyiyoogaa diggenna; shin mattottiyoogaa diggees. (Leemiso 23:20, 21; 1 Qoronttoosa 6:9, 10; 1 Ximootiyoosa 5:23; Tiita 2:2, 3) SHin ushshay amale gidiyoogee mattottiyoogaa xalla gidenna; ushshay amale gidido uri ushshau haaretteesinne yorattees. Gastta asau ushshay amale gidana danddayees. Yelagatussikka ushshay amale gidiyoogee azzanttiyaaba.

3, 4. Ushshay amale gidido uraa machee bollinne naatu bolli gakkiya metuwaa yoota.

³ Ushshaa bessenna ogiyan goꞌettiyoogee so asaa sarotettaa moorana danddayiyoogaa Geeshsha Maxaafay daro wodiyaappe kase yootiis. (Zaarettido Wogaa 21:18-21) Ushshay amale gidiyoogee kaalettiyo qohuwaa so asa ubbay akeekiyooba. Machiyaa ba azinay ushshaa  uyennaadan teqqanau woy a eeshshay laamettiyo hanotaa danddayanau baaxetawusu. a A ushshaa qottanau, gussanau, miishshaa qottanau malausu; qassi i ba soo asaa, ba deꞌuwaa, ubba qassi Xoossaa siiqanaadan minttettausu; shin yaatinkka i uyiyoogaa aggenna. I uyennaadan teqqanau baaxetidaba gidikkonne, danddayabeenna gishshau, hidootaa qanxxananne hegee ba abbiyaappe aadhiyaabadan qoppana danddayausu. A yayyana, yiillotana, bana mooranchadan xeellana, hirggananne unꞌꞌettana danddayausu; qassi banan ammanettennaaro gidana danddayausu.

⁴ Ushshay amale gidido aawaa woy aayee gaasuwan naati qohettoosona. Issi issi naata bukkoosona. Hara naatuura qassi wolqqan asho gaytotettaa poloosona. Bantta aaway woy aayyiyaa ushshancha gididoy nu gaasuwaana giidi naati qoppana danddayoosona. Ushshay amale gidido uraa eeshshay laamettiyoogee, darotoo naati hara asaa ammanennaadan oottees. Son deꞌiya hanotaa naati haasayanau yayyiyo gishshau, coꞌꞌu giyoogaa meezetoosona; hegee qassi darotoo wolqqaama metuwaa kaalettees. (Leemiso 17:22) Hegaa mala naati gitaa gididikka banttanan ammanettennaageeta gidana danddayoosona.

5. Ushshay amale gidido uray hegaa ayba ogiyan aggana danddayii, hegee metiyaaba gididoy aybissee?

⁵ Daro eranchati ushshay amale gidido uraa he amalee yeddenna giyaaba gidikkokka, ushshaa muleera aggiyoogan amarida ogiyan he amalee yeddana danddayiyoogaa etappe daroti maayoosona. (Maatiyoosa 5:29⁠ra gatta xeella.) SHin, ushshay amale gidido uri i hegaa mala asa gidiyoogaa darotoo ammanenna gishshau, a  maaddiyoogee metiyaaba. Gidikkokka, so asay ushshay amale gidido uri gattiyo qohuwaa xeelliyaagan issi issi tangguwaa ekkiyo wode, he uri moorancha gidiyoogaa akeekana danddayees. Ushshay amale gididoogeetanne eta soo asaa daro wodiyau maaddida issi dottoree hagaadan giis: “So asay galla galla oottiyoobaa banttau danddayettida keenan keehi goꞌꞌiya ogiyan oottiyoogee loꞌꞌo gaada qoppays. Ushshay amale gidido uri a hanotay son deꞌiya hara asaagaappe keehi dummatiyoogaa takkidi akeekees.”

6. Ushshay amale gidido uri son deꞌiyo keettaa asay keehi loꞌꞌo zoriyaa awuppe demmii?

⁶ Ushshay amale gidido uri intte son deꞌiyaaba gidikko, intteyyo danddayettida keenan keehi goꞌꞌiya ogiyan deꞌanaadan, Geeshsha Maxaafaa zoree inttena maaddana danddayees. (Isiyaasa 48:17; 2 Ximootiyoosa 3:16, 17) Ushshay amale gidido uri deꞌiyo keettaa asay giiga gidanaadan maaddida amarida baaso siraatata ane beꞌoos.

7. Ushshay amale gidido uri son deꞌiyaaba gidikko, oyshettiyay oonee?

⁷ Inttena ubba metuwau gaasodan qoppoppite. Geeshsha Maxaafay, “Asai ubbai huuphiyan huuphiyan ba toohuwaa tookkanau bessees”; qassi “nuuni huuphiyan huuphiyan nubaa Xoossau yootana” yaagees. (Galaatiyaa 6:5; Roome 14:12) Ushshay amale gidido uri ba hanotaa so asaa bolli gaasoyana danddayees. Leemisuwau i, “Intte tana yiilloyiyaabaa oottennaakko, taani uyikke” gaana danddayees. Harati i giyoobaa maayiyaaba gidikko, uyiyoogaa aggennaadan minttettoosona. SHin nuuni issi issi hanotan qohettidaba woy hara asan qohettidaba gidikkokka, ushshay amale gidido uraa gujjin, ubbaykka nuuni oottiyooban oyshettoos.—Piliphphisiyuusa 2:12⁠ra gatta xeella.

8. Ushshay amale gidido uri hegaa gaasuwan gakkiya metuwaappe kiyanaadan waati maaddana danddayettii?

⁸ Ushshay amale gidido uraa hegaa gaasuwan gakkiya metuwaappe ubbatoo teqqana koshshees giidi qoppoppite.  Geeshsha Maxaafay hanqquwaa suulliya uraara gayttidaagan, “Neeni a ashshiyaabaa gidikko, haranttuwaakka neeni a hegaadan oottanaagee attenna” yaagiyoogee ushshaa uyiyoogee amale gidido uraukka hanana danddayees. (Leemiso 19:19) Ushshay amale gidido uri hegaa gaasuwan gakkiya metuwaappe ba huuphe kiyo. Mooridobaa ba huuphe giigisso.

9, 10. Ushshay amale gidido uri deꞌiyo keettaa asay maaduwaa demmana koshshiyoy aybissee, eti keehi goꞌꞌiya maaduwaa ooppe demmana koshshii?

⁹ Haratuppe maaduwaa demmite. Leemiso 17:17y, “Laggee mule wodekka siiqees; ishaikka metuwaa wode maaddanaassi yelettees” yaagees. Ushshay amale gidido uri intte son deꞌikko, hegee metiyaaba. Intteyyo maaduwaa koshshees. Tumu ‘laggeti’ inttena maaddanaadan etan ammanettanau mammottoppite. (Leemiso 18:24) He hanotaa akeekiya asatuura woy hegaa mala hanotay gakkido asatuura haasayiyoogee intte ay oottana bessiyaakko, qassi ay oottana bessennaakko goꞌꞌiya zoriyaa demmanaadan maaddana danddayees. SHin akeekancha gidite. Intte “xuuraa” genttiya, intte ammanettiyo uraara haasayite.—Leemiso 11:13.

¹⁰ Gubaaꞌiyaa cimatun ammanettite. Kiristtaane gubaaꞌiyan deꞌiya cimati inttena keehippe maaddana danddayoosona. Gubaaꞌiyaa cimati Xoossaa Qaalaa loytti tamaarida kayma attuma asata; qassi Geeshsha Maxaafay yootiyoobaa darotoo oosuwan peeshshidaageeta. Eti “carkkuwaappe geemmiyo soho, gotiyaappe baqatiyo soho gidana; mela sohuwan goggiya haattanne booddila biittan de7iya gita zaallaa kuwaa mala gidana.” (Isiyaasa 32:2) Gubaaꞌiyaa cimati kumetta gubaaꞌiyaa qohiyaabaappe naagiyoogaa xalla gidennan, metoy gakkidoogeeta huuphiyan huuphiyan minttettoosonanne eti woppu gaanaadan maaddoosona. Eta maaduwaa loytti goꞌettite.

11, 12. Ushshay amale gidido uri deꞌiyo keettaa asaa ubbaappe aaruwan maaddiyay oonee, eti he maaduwaa ayba ogiyan demmiyoonaa?

¹¹ Ubbaappe aaruwan Yihoowappe minttettuwaa  demmite. Geeshsha Maxaafay, “GODAI wozanai me77idoogeetussi mataana; qassi bantta ayyaanan liiqidaageeta ashshees” yaagidi yootees. (Mazamure 34:18) Ushshay amale gidido uri son deꞌiyo gishshau, intte wozanay meqqidaba woy intte ayyaanan liiqidaba gidikko, ‘Yihooway ashshiyoogaa’ akeekite. Intte so asaa metoy ay keenakko i akeekees.—1 PHeexiroosa 5:6, 7.

¹² Yihooway ba Qaalan yootidobaa ammaniyoogee hirggissiyaabaa intte genccanaadan maaddana danddayees. (Mazamure 130:3, 4; Maatiyoosa 6:25-34; 1 Yohaannisa 3:19, 20) Xoossaa Qaalaa xannaꞌiyoogeenne Geeshsha Maxaafay yootiyoogaadan deꞌiyoogee galla galla gakkiya metuwaa genccanau maaddana danddayiya ‘ubbaappe aadhiya wolqqaa,’ Xoossaa ayyaanaa intte demmanaadan maaddees.—2 Qoronttoosa 4:7. b

13. Daro keettaa asaa bolli gakkiya hara metoy aybee?

 ¹³ Likkiyaappe aattidi uyiyoogee daro keettaa asaa bolli hara metuwaa kaalettees; hegee son gakkiya qohuwaa.

14. Son gakkiya qohoy doommidoy awudee, ha wodiyan deꞌiya hanotay ay malee?

¹⁴ Asaa naatu taarikiyan, son qohiyaabay koyro merettidoy naaꞌꞌu ishanttu giddoona, giishin Qaayeelanne Aabeela giddoona. (Doomettaabaa 4:8) He wodeppe doommidi, asaa naatu bolli son qohiya darobay gakkees. Azinati bantta macca asata bukkoosona, macca asati bantta azinata qohiyaabaa oottoosona, yelidaageeti bantta naata qareti baynna ogiyan shocoosona, qassi gita naati cimida bantta aawaa woy aayyiyo qohiyaabaa oottoosona.

15. Son gakkiya qohuwan so asay ayba ogiyan qohettii?

¹⁵ Son gakkiya qohoy xamꞌꞌaa masunttaappe aadhiyaaba. Azinay darotoo bukkido issi maccaasiyaa hagaadan gaasu: “Intte mooranchadan qoppanaadaaninne yeellatanaadan oottiya darobay gakkees. Yashshiya aymo aymottiyaaba milatiyo gishshau, darotoo guuran hiixaappe denddanau koyekketa.” Son gakkiya qohuwaa beꞌida woy he hanotan qohettida naati gitatidi aqo oyqqiyo wode, etikka qohiyaageeta gidana danddayoosona.

16, 17. Doonan qohiyoogee aybee, so asay hegan qohettiyoy ayba ogiyaanee?

¹⁶ Son gakkiya qohoy bolla xallan gakkiyaagaa gidenna. Hegee darotoo doonan qohiyoogaa gujjees. Leemiso 12:18y, “Akeekennan haasayiyo haasayai cu[b]edan caddees” yaagees. ‘Cubedan’ caddiya son gakkiya qohoy cayiyoogaa, kacciyoogaa, ubbatoo hooshiyoogaa, kawushshiyoogaanne shociyoogaa gujjees. Doonaa masunttay beettennabanne darotoo hara asay akeekennaba.

¹⁷ Naata ubbatoo cayiyoogee, eti oottiyoobaanne eta  hanotaa kariyoogee keehi qohiyaabanne azzanttiyaaba. Hegaadan naata doonan qohiyoogee eti banttanan ammanettennaadan oottana danddayees. Ubba naatussi seeray koshshiyoogee tuma. SHin Geeshsha Maxaafay, “Aawatoo, intte naati wozanaa bayenna mala, eta yiilloyoppite” yaagees.—Qolasiyaasa 3:21.

18. Son gakkiya qohoy doommiyoy awaanee, hegaa teqqanau Geeshsha Maxaafay ay yootii?

¹⁸ Son gakkiya qohoy wozanaaninne qofan doommees; nuuni qoppiyoobaa oottoos. (Yaaqooba 1:14, 15) Issi uri qohiyoogaa agganau ba qofaa laammana koshshees. (Roome 12:2) Hegee danddayettiyaabee? Ee. Xoossaa Qaalau asaa laammiyo wolqqay deꞌees. Xoossaa Qaalay mino ‘qato’ mala gidida iita qofaa laalana danddayees. (2 Qoronttoosa 10:4; Ibraawe 4:12) Geeshsha Maxaafaa tumu eray asay muleera laamettanaadan maaddana danddayiyo gishshau, asay ooratta asatettaa maayees geetettiis.—Efisoona 4:22-24; Qolasiyaasa 3:8-10.

19. Kiristtaaneti bantta aqo laggeta waati xeellananne oyqqana koshshii?

¹⁹ Aqo laggiyaa xeelliyo ogiyaa. Xoossaa Qaalay, “Azinai ba maccaasiyo ba bollaadan siiqanau bessees; ba machchiyo siiqiyaagee bana siiqees” yaagees. (Efisoona 5:28) Qassikka, “daafuranchcha mereta gidiyoogaa eridi,” azinay ba maccaasiyo bonchana koshshiyoogaa Geeshsha Maxaafay yootees. (1 PHeexiroosa 3:7) Maccaasati bantta ‘keettaawata siiqanaadaaninne’ wozanappe ‘bonchanaadan’ zoree imettiis. (Tiitu 2:4; Efisoona 5:33) Xoossau yayyiya azinay ba maccaasiyo shociyaabanne doonan qohiyaaba gidikko, o bonchays gaana danddayenna. Ba azinaa bolli kacciya, a boriya woy ubbatoo a cayiya maccaasiyaa ba azinaa wozanappe siiqaysinne bonchays gaana danddayukku.

20. Yelidaageeti bantta naata loytti oyqqanaadan koyiyay oonee, naati bantta wolqqaappe aadhiyaabaa oottanaadan yelidaageeti naagana koshshennay aybissee?

 ²⁰ Naata bessiyaagaadan xeelliyoogaa. Yelidaageeti naata siiqananne etau qoppana koshshees. Xoossaa Qaalay naati “GODAAPPE imettiya imota,” qassi “woito” gidiyoogaa yootees. (Mazamure 127:3) Yelidaageeti he imotaa loytti oyqqanaadan Yihooway koyees. Geeshsha Maxaafay “naatetta hanuwaa” nne ‘naatu azallatettaa’ xeelliyaagankka yootees. (1 Qoronttoosa 13:11; Leemiso 22:15) Yelidaageeti bantta naati azalliyo wode, garamettana koshshenna. Naati gastta asa mala gidokkona. Yelidaageeti naatu hanotaappe, bantta soo hanotaappenne eta abbiyaappe aadhiyaabaa naati oottanaadan naagana koshshenna.—Doomettaabaa 33:12-14 xeella.

21. Cimida aawaanne aayyiyo ayba ogiyan xeellanaadaaninne oyqqanaadan Xoossay koyii?

²¹ Cimida aawaanne aayyiyo xeelliyo ogiyaa. Wogaabaa 19:32y, “Puulummida asanne cimida asa be7iyo wode uttidosaappe dendda eqqa; eta bonchcha” yaagees. Hegaadan giyoogan, Xoossaa Higgee cimida asata bonchanaadaaninne xoqqu ootti xeellanaadan minttettees. Cimida aaway woy aayyiyaa naatuppe darobaa koyiyo wode woy harggiyo wode, qassi hemettanau danddayenna woy eesuwaara qoppana danddayenna wode, intte hegaadan oottiyoogee metana danddayees. SHin naati “banttana yelidaageetuyyo kushe zaariyoogaa” tamaarana mala zoree imettiis. (1 Ximootiyoosa 5:4) Hegee eta xoqqu ootti xeelliyoogaanne bonchiyoogaa, ubba qassi miishshan maaddiyoogaa gidana danddayees. Cimida aawaanne aayyiyo bessenna ogiyan oyqqiyoogee nuuni oottanaadan Geeshsha Maxaafay yootiyoobaara mule moggennaba.

22. Son gakkiya qohuwaa teqqanau keehi maaddiyaabay aybee, hegaa waati bessana danddayettii?

²² Intte huuphiyaa naagite. Leemiso 29:11, “Eeyya asi ba hanqquwaa yeddi bessees; shin aadhdhida era  asi ba hanqquwaa mittees” yaagees. Intte hanqquwaa ayba ogiyan mittana danddayeetii? Lancciyaa uluwan oyqqiyoogaappe merettida metuwaa sohuwaara giigissite. (Efisoona 4:26, 27) Intte huuphiyaa naagana danddayennaba gidikko, he heeraappe kichiichite. Intte huuphiyaa naaganaadan geeshsha ayyaanaa immana mala Xoossaa woossite. (Galaatiyaa 5:22, 23) Issisaa biyoogee woy issibaa oottiyoogee intte huuphiyaa naagana mala maaddana danddayees. (Leemiso 17:14, 27) “Danddayanchcha” gidanau baaxetite.—Leemiso 14:29.

23. Kiristtaane gubaaꞌiyan deꞌiya uri darotoo hanqquwaa suulliyaaba gidikko, geella ba maccaasiyo woy ba naata bukkiyaabanne ba nagaraappe simmennaba gidikko, waanana danddayii?

²³ Xoossay ixxiyo oosotuppe amaridaageeti “morkketettaa, palamaa, . . . hanqquwaa” gidiyoogaanne “hageeta milatiyaageeta oottiyaageeti Xoossaa kawotettaa” laattennaagaa Geeshsha Maxaafay yootees. (Galaatiyaa 5:19-21) Hegaa gishshau, bana Kiristtaane giya uri darotoo hanqquwaa suulliyaaba gidikko, geella ba maccaasiyo woy ba naata bukkiyaabanne ba nagaraappe simmennaba gidikko, Kiristtaane gubaaꞌiyaappe bohettana danddayees. (2 Yohaannisa 9, 10⁠ra gatta xeella.) Yaatiyoogan, gubaaꞌee qohiya asatuppe geeyees.—1 Qoronttoosa 5:6, 7; Galaatiyaa 5:9.

24. (a) Qohoy gakkiyo aqo laggee waatanau koyana danddayii? (b) Loꞌꞌobaa qoppiya laggetinne gubaaꞌiyaa cimati qohoy gakkiyo aqo laggiyaa waatidi maaddana danddayiyoonaa, shin eti waatana koshshennee?

²⁴ Aynne laamettenna, qohiya aqo laggeti ubbatoo shociyo Kiristtaaneti shin waatana danddayiyoonaa? Issoti issoti dumma dumma gaasuwan he uraara deꞌanau koyana danddayoosona. Harati qassi bollan, qofaaninne ayyaanaaban keehi qohettiyo wode, geella bantta shemppuwau yayyidi shaahettanau koyana danddayoosona.  Son qohoy gakkiyo uri hegaara gayttidaagan Yihoowa xeelan suure gidida kuushshaa ba huuphe kuuyana bessees. (1 Qoronttoosa 7:10, 11) Loꞌꞌobaa qoppiya laggeti, dabboti woy gubaaꞌiyaa cimati maaddanau koyidi zorana danddayoosona; shin eti yaata yaatoppa gaana bessenna. Hegee he uri kuuyana bessiyooba.—Roome 14:4; Galaatiyaa 6:5.

25. Yihooway so asau halchidobay aybee?

²⁵ Yihooway Addaameenne Hewaana azinanne macho gididi deꞌanaadan oottido wode, he so asay ushshaa  amaliyan woy son gakkiya qohuwan metootanaadan mule halchibeenna. (Efisoona 3:14, 15) Keettay siiqoynne sarotettay deꞌiyo soho, qassi so asa ubbay qofaaninne ayyaanaaban koshshiyaabaa demmiyo soho gidana mala koyettiis. SHin asay nagaraa ootti simmin, so asaa hanotay sohuwaara moorettiyoogaa doommiis.—Eranchchaa 8:9⁠ra gatta xeella.

26. Yihoowa higgiyaara moggidi deꞌanau baaxetiya asay sinttappe ay demmanee?

²⁶ Yihooway so asaayyo halchidobaa aggibeennaagee ufayssiyaaba. “Aibinne daganttennan, eti saro de7ana” ooratta alamiyaa asaa naatuyyo ehaanau i qaalaa geliis. (Hizqqeela 34:28) He wode, ushshay amale gidiyoogee, son gakkiya qohoynne ha wodiyan so asaa bolli gakkiya meto ubbay xayana. Asaa somꞌꞌoy pashkkana; hegee eti “sarotettaaninne duretettaani ufaittidi” deꞌiyo gishshataassappe attin, banttana yashshiyaabaanne metiyaabaa genttanaassa gidenna.—Mazamure 37:11.