Geeshsha Maxaafay Asay Laamettanaadan Oottees

ISSI Rasteferiyan giyoogeeta kaalliyaagee phuphurettida ba adussa huuphiyaa qanxxanaadaaninne paranjjata ixxiyoogaa agganaadan oottidabay aybee?

“Taani asa coo ixxiyoogaa aggaas.”​—HAFENE DAMA

LAYTTAY: 34

YELETTIDO BIITTAA: ZAMIBBIYA

KASE TAARIKIYAA: RASTAFERIYAN

KASE DEˈUWAA: Taani yelettidoy Zambbiya biittan betetu kambbiyaana. Ta aayyiyaa olaa wode Namibiyaappe baqatada, Tohossa Arggo Afirkkaa Asaa Dirijjitiyan (SIWAPO) gelaasu. Ha dirijjite he wode Namibbiya haariya Tohossa Afirkkaa kawotettaara olettees.

Tawu layttay 15 gakkanaashin dumma dumma betetu kambbiyan deˈaas. SIWAPO kambbetun deˈiya yelaga naati laˈˈatettaa baaxiyaabaa haratussi yootanaadan tamaaroosona. Polotikaabaa loytti eranaadaaninne paranjjata ixxanaadan nuna tamaarissidosona.

Tawu layttay 11 gidido wode, Rooma Kaatolikiyaappe, Luturaaniyaappe, Angilikaaniyaappenne hara haymaanootetuppe shiishshi essido, kambbiyan deˈiya issi woosa keettan Kiristtaane gidanawu koyaas. Taani haasayssido issi qeesee ta kiristtaane gidennaadan hidootaa qanxxissiyaabaa yootiis. He wodeppe doommada Xoossi baawa gaada ammaniyaagaa gidaas. SHin, ta reege muuziqaa dosiyoogeenne karetta gidida Afirkkaa asaa bolli gakkiya pirdda pacaappenne qohuwaappe amaridabaa giigissanawu koyiyoogee, tawu layttay 15 gidido wode Rasteferiyan baaxiyan gelanaadan oottiis. PHuphurettida huuphiyaa dichchaas, maariwaana giyo jallissiyaaba goˈettiyoogaa doommaas, asho miyoogaa aggaas, qassi karetta asay laˈa gidanaadan denttettaas. Gidoppe attin, shori baynna ta duussaa laammabeykke woy danobaa bessiya pilimiyaa beˈiyoogaa aggabeykke. Hegaadan, shori baynna haasayaakka aggabeykke.

TAANI LAAMETTANAADAN GEESHSHA MAXAAFAY MAADDIIS: Tawu layttay 20 heera gidido wode, 1995n, ta deˈuwan oottanawu koyiyoobaa mintta qoppiyoogaa doommaas. Ta demmiyo Rasteferiyan xuufiyaa ubbaa xannaˈaas. He xuufetuppe issotun issotun Geeshsha Maxaafaa qofay deˈees, shin eti qonccissiyoobay tawu mule gelenna. Yaatiyo gishshawu, Geeshsha Maxaafaa tarkka nabbabanawu murttaas.

Guyyeppe, Rasteferiyan gidida issi laggee Yihoowa Markkati attamissido, Geeshsha Maxaafaa xannaˈanawu maaddiya issi xuufiyaa tawu immiis. He xuufiyaa Geeshsha Maxaafaara geeddarssaydda tarkka xannaˈaas. Guyyeppe, Yihoowa Markkatuura gayttada Geeshsha Maxaafaa xannaˈiyoogaa doommaas.

Jallissiyaabaa goˈettiyoogaanne daro ushshaa uyiyoogaa wolqqaama baaxiyan aggaas. (2 Qoronttoosa 7:1) Taani asatettaaban geeshsha gidaas, phuphurettida ta huuphiyaa qanxxaas, pornograafiyaanne danobaa bessiya pilimiyaa beˈiyoogaa, qassi shori baynna haasayaakka aggaas. (Efisoona 5:3, 4) Guyyeppe, paranjjata ixxiyoogaakka aggaas. (Oosuwaa 10:34, 35) Hegaadan laamettanawu issi zare ixxanaadan denttettiya muuziqaa xayssana koshshiis, qassi ta kase duussawu simmanaadan minttettiya ta laggeta aggana koshshiis.

Hegaadan laametta simmada, Yihoowa Markkatu SHiiquwaa Addaraashaa koyada he haymaanootiyaa kaallanawu oychchaas. Geeshsha maxaafaa xinaatiyaa doommaas. Taani Yihoowa Markka gidada xammaqettanawu koyido wode, nu soo asay ufayttibeenna. Yihoowa Markkata aggada haraa “Kiristtaane” haymaanootiyaa dooranaadan ta aayyiyaa tawu yootaasu. Kawotettan xoqqa sunttay deˈiyo ta aayye dabbotuppe issoy, taani Yihoowa Markka gidanawu koyidoogan ubbatoo tana borees.

Gidoppe attin, Yesuusi asaa oyqqido ogiyaabaa tamaariyoogeenne a zoriya oosuwan peeshshiyoogee yedetaanne boriya genccanaadan tana maaddiis. Yihoowa Markkati tamaarissiyooba Geeshsha Maxaafay giyoobaara gatta xeelliyo wode, taani tumu haymaanootiyaa demmidoogaa ammanettaas. Leemisuwawu, haratussi sabbakanaadan yootiya Geeshsha Maxaafaa azazuwaa eti kaalloosona. (Maatiyoosa 28:19, 20; Oosuwaa 15:14) Qassi eti polotikan gelokkona.—Mazamure 146:3, 4; Yohaannisa 15:17, 18.

TAANI GOˈETTIDO HANOTAA: Geeshsha Maxaafaa maaraadan deˈanawu tamaaridoogee tana dumma dummaban maaddiis. Leemisuwawu, jallissiyaabaa aggidoogee taani aginan aginan daro shaˈan qoodettiya miishshaa kessiyoogaappe tana shemppissiis. Elunchcha deˈo deˈiyoogaa aggaas, qassi ta qofaynne asatettay kaseegaappe ha loˈˈiis.

Taani naatettaappe doommada amottidoogaadan haˈˈi ta deˈoy halchchoy deˈiyoogaa. Qassi ubbabaappe aaruwan, haˈˈi taani Xoossaakko shiiqana danddayaas.—Yaaqooba 4:8.