ANE ha misiliyan deˈiya saˈaa xeella! Ubbabay ayba loˈˈii! Maataa, mittaa, ciishshaa, ubba mehiyaanne doˈaa xeella. Danggarssaanne gaammota bessana danddayay?

Ha loˈˈiya ataakiltte sohoy waanidi deˈana danddayidee? Ane Xoossay saˈaa nuussi waati giigissidaakko beˈoos.

Xoossay koyro maatay biittaa maayanaadan oottiis. Qassi i ubba qommo ataakiltteta, daraanne mittata medhdhiis. Ha dicciyaabati saˈay loˈˈiyaagaa gidanaadan oottoosona. SHin hegaappekka aadhdhiyaabaa oottoosona. Etappe daroti qassi keehippe malˈˈiya qumaa nuuni demmiyoobata.

Hegaappe guyyiyan, Xoossay haattan wadhdhiya moletanne bollaara paalliya kafota medhdhiis. Guuttanne gita mehetanne doˈata, hegeetuppekka kanata, gawaratanne parata medhdhiis. Intte heeran ayba doˈatinne meheti deˈiyoonaa? Ha ubbabaa Xoossay nuussi medhdhido gishshau, ufayttana koshshennee?

Wurssettan, Xoossay saˈan issi baggaara keehi dumma sohuwaa giigissiis. I he sohuwaa Edene ataakiltte sohuwaa giidi xeegiis. He sohoy aybinne paci baynna soho. He sohuwan deˈiya ubbabay loˈˈiyaba. Xoossay kumetta saˈay i giigissido loˈˈiya ataakiltte soho mala gidanaadan koyiis.

SHin ha misiliyan deˈiya ataakiltte sohuwaa ane zaaretta xeella. Xoossay xeelliyo wode paccidabay aybakko eray? Ane beˈoos.