AYBI haniiddi deˈiyakko xeella! Ba gatimaa Zoˈo Abbaa bolli miccidaagee Muusa. Aara abbaappe issi baggan saruwan pinnidi eqqidaageeti Israaˈeeleta. SHin Paarooninne a wotaaddarati ubbay abban muuhettiiddi deˈoosona. Hegee waanidi hanidaakko ane beˈoos.

Nuuni tamaaridoogaadan, Xoossay Gibxxetu bolli 10⁠tta boshaa yeddi simmin, Paarooni Israaˈeeleti Gibxxeppe kiyidi baanaadan yootiis. Daro maccaasay, naatinne 600,000 gidiya attuma asay kiyiis. Qassikka, Yihoowan ammanida cora qooday deˈiyo hara walaha asay, Israaˈeeletuura kiyiis. Hegeeti ubbay bantta dorssaa, deeshshaanne mehiyaa ekkidi kiyidosona.

Israaˈeeleti kiyanaappe kase, maayuwaanne birappenne worqqappe oosettidabaa banttau immanaadan Gibxxeta oychchidosona. Gebxxeti bantta bolli gakkida wurssetta boshaappe denddidaagan, keehippe yayyidosona. Hegaa gishshau, Israaˈeeleti eta oychchidoba ubbaa immidosona.

Guutta gallassay aadhdhi simmin, Israaˈeeleti Zoˈo Abbaa gakkidosona. Yaa gakkidi shemppidosona. Paarooninne a asati Israaˈeeleta yeddidi, gamˈˈennan yiillotiyoogaa doommidosona. Eti: ‘Nuuni nu aylleta yeddiichchida!’ yaagidosona.

Hegaa gishshau, Paarooni zaarettidikka ba qofaa laammiis. I eesuwaara ba ola para gaaretanne ba wotaaddarata shiishshiis. Hegaappe, 600⁠u dumma para gaaretanne Gibxxen deˈiya hara gaareta ubbaa ekkidi, Israaˈeeleta yedettiyoogaa doommiis.

Israaˈeeleti Paarooninne a wotaaddarati bantta geeduwaa yiyaageeta beˈido wode, keehippe yayyidosona. Baqatidi biyo sohoy baawa. Etappe sinttaara Zoˈo Abbay deˈees; qassi guyyeera Gibxxeti yiiddi deˈoosona. SHin Yihooway ba asatuppenne Gibxxetuppe gidduwaa shaaraa mayssiis. Hegaa gishshau, Gibxxeti Israaˈeeleta qohanau beˈana danddayokkona.

Hegaappe Muusee ba gatimaa Zoˈo Abbaa bolli miccanaadan Yihooway yootiis. Hegaadan i oottin, Yihooway away kiyiyo baggappe wolqqaama carkkuwaa carkkissiis. Abbaa haattay naaˈˈau shaahettidi naaˈˈu baggaarakka sitti giidi eqqi bayiis.

Hegaappe, Israaˈeeleti abbaa giddon mela biittaara pinniyoogaa doommidosona. Miilooniyan qoodettiya asaynne eta meheti ubbay saruwan abbaa pinni kiyanau daro saatiyaa ekkiis. Wurssettan Gibxxeti Israaˈeeleta zaarettidi beˈana danddaydosona. Eta aylleti biichchoosona! Yaatiyo gishshau, eta kaallidi abbaa giddo eesoti gelidosona.

Eti gelin, Xoossay eta para gaaretu goomay kolettanaadan oottiis. Gibxxeti keehi yayyidi: ‘Yihooway Israaˈeeleta maaddidi nuna oliiddi deˈees. Haggaappe kiyoos’ yaagidi waassiyoogaa doommidosona. SHin hegau wodee aadhdhiichchiis.

Ne ha misiliyan beˈidoogaadan, Muusee ba gatimaa Zoˈo Abbaa bolli miccanaadan Yihooway yootidoy he wodiyaana. Muusee gatimaa miccin, godadan eqqida haattay guyye simmi goggidi, Gibxxetanne eta para gaareta ubbaa kammi bayiis. Olanchchati ubbay Israaˈeeleta kaallidi zoˈo abbaa giddo gelidosona. Yaatiyo gishshau, Gibxxetuppe issi asinne paxa attibeenna!

Xoossaa asati ubbay attidoogan ay keena ufayttidonaa! Attuma asay ubbay Yihoowa galatiiddi: ‘Yihooway wolqqaama xoonuwaa xooniis. Paraanne paraa toggidaageeta i abban oliis’ yaagidi yexxidosona. Muuse michchiya Miiriyaama ba karaabiyaa ekkin, maccaasati ubbay bantta karaabiyaa karaabiyaa ekkidi o kaallidosona. Eti ufaytti duriiddi: ‘Yihooway wolqqaama xoonuwaa xooniis. Paraanne paraa toggidaageeta i abban oliis’ yaagidi attumaasati yexxiyo yettaa yexxidosona.