LAYTTAAPPE layttay giishin, 10⁠u layttay, 20⁠u layttay, 30⁠u layttay, 39n layttay aadhdhiis! Israaˈeeleti haˈˈikka bazzuwan deˈoosona. SHin he ubba wodetun Yihooway ba asaa naagiis. I eta mannaa miziis. I eta gallassi shaaraa tuussan, qammi qassi tamaa tuussan kaalettiis. He layttatu ubban, eta maayoy wuribeennanne eta gedeekka kixxibeenna.

Haˈˈi Gibxxeppe kiyoosappe 40ntta layttau koyro agina. Israaˈeeleti zaarettidikka Qaadeesan dunkkaanidosona. Xomoosanau kiitettida 12⁠u asati Kanaane biido wode 40 gidiya layttappe kase Israaˈeeleti shemppidoy ha sohuwaana. Muuse michchiyaa Miiriyaama Qaadeesan hayqqaasu. Kaseegaadankka ha sohuwan metoy merettiis.

Asay ayba haattanne demmana danddayibeenna. Yaatiyo gishshau, eti Muuse bolli: ‘Nuuni hayqqidabaa gidiyaakko loˈˈo shin. Nuna Gibxxeppe kessada aybinne mokkenna ha metoy kummido sohuwaa ayssi ehaadii? Ayba kattinne baawa; ayba balaseenne baawa; ayba roomaaneenne baawa. Haatta addinikka uyanau baawa’ yaagidi zuuzummidosona.

Muuseenne Aarooni dunkkaane giddo woossanau bin, Yihooway Muuseyyo: ‘Asaa issippe shiishsha. Hegaappe eti ubbay beˈishin he hinin deˈiya zaallaassi yoota. Zaallaappe asaunne eta mehiyau ubbau gidiya haattay goggana’ yaagiis.

Yaatiyo gishshau, Muusee asaa shiishshidi: ‘Xoossan ammanettenna asatoo, siyite! Aarooninne taani ha zaallaappe intteyyo haattaa tumu kessanee?’ yaagiis. Hegaappe Muusee zaallaa naaˈˈutoo gatiman shocin, haattay zaallaappe xuuqqidi kiyiis. Asaynne mehee ubbay uyanau gidiya haattay kiyiis.

SHin Yihooway Muusenne Aaroona bolli yiillotiis. Aybissakko eray? Muuseenne Aarooni zaallaappe haattaa eti kessana haniyaabadan haasayido gishshataassa. SHin hegaa oottiday tumuppe Yihoowa. Muuseenne Aarooni hegaabaa tumaa haasayibeenna gishshau, Yihooway eta qaxxayana haniyoogaa yootiis. I eta: ‘Ta asaa kaalettidi Kanaane gelissekketa’ yaagiis.

Israaˈeeleti gamˈˈennan Qaadeesappe denddidosona. Guutta wodiyappe guyyiyan Hoora Deriyaa gakkidosona. He deriyaa huuphiyan Aarooni hayqqiis. I hayqqiyo wode ayyo layttay 123. Israaˈeeleti keehippe azzanido gishshau, asay ubbay Aaroonassi 30⁠u gallassaa yeekkiis. A naˈay Elˈˈaazari a sohuwan Israaˈeele asaassi qeese halaqa gidiis.