ISRAAˈEELETI Gibxxeppe kiyoosappe naaˈˈu agina gidiya wodeppe guyyiyan, Korebe woykko Siina geetetti xeegettiya Deriyaa gakkidosona. He sohoy Yihooway eexxiyaa buuraa giddoppe Muusa haasayissido sohuwaa. Asay he sohuwan dunkkaanidi guutta wodiyau uttiis.

Asay deriyaa matan naagishin, Muusee deriyaa kiyiis. Hegan deriyaa huuphiyan Muusee deˈishin, Israaˈeeleti Baayyo dumma dere gididi azazettanaadan koyiyoogaa Yihooway Muusessi yootiis. Muusee deriyaappe wodhdhidi, Yihooway giidobaa Israaˈeeletussi yootiis. Asaykka Yihoowa asa gidana koyido gishshau, assi azazettana yaagidosona.

He wode Yihooway oorattabaa oottiis. Deriyaa huuphee cuwattanaadaaninne wolqqaama gunttay guummanaadan oottiis. I asaayyo qassi: ‘Inttena Gibxxepe kessida intte Xoossaa Yihooway tana’ yaagiis. Hegaappe: ‘Taappe hara xoossatussi intte goynnana bessenna’ yaagidi azaziis.

Xoossay Israaˈeeletussi hara uddufun azazota, woykko higgeta immiis. Asay keehi yayyiis. Eti Muuseessi: ‘Xoossay nuussi haasayikko nuuni hayqqanaakkonne yayyiyo gishshau, ne nuuyyo haasaya’ yaagidi yootidosona.

Simmidi Yihooway Muuseyyo: ‘Taakko deriyaa kiya. Asay naaganaadan taani koyiyo higgeta xaafido naaˈˈu masettida shuchchata neessi immana’ yaagiis. Hegaa gishshau, Muusee zaarettidikka deriyaa kiyiis. He sohuwan 40⁠u gallassaa takkiis.

Xoossay keehippe daro higgiyaa ba asau immanau deˈees. Muusee ha higgeta xaafiis. Qassi Xoossay Muusessi masettida naaˈˈu shuchchata immiis. Xoossay he shuchchatu bolli, ubba asau i yootido 10⁠u higgeta xaafidi immiis. He higgeti Tammu Azazota geetettoosona.

Tammu Azazoti keehi koshshiya higgeta. Gidoppe attin, Xoossay Israaˈeeletussi immido hara daro higgetikka hegeetu mala. He higgetuppe issoy: ‘Neeni Yihoowa ne Xoossaa ne kumetta wozanaappe, ne kumetta qofaappe, ne kumetta shemppuwaappenne ne kumetta wolqqaappe siiqa’ yaagiyaagaa. Haray qassi: ‘Ne shooruwaa ne huuphedan siiqa’ yaagiyaagaa. Xoossaa Naˈay Yesuus Kiristtoosi giidoogaadan, ha higgeti Yihooway Israaˈeeletussi immido higgetu ubbaappe aadhdhiya higgeta. Takkidi, Xoossaa Naˈaabaanne i tamaarissidobatubaa darobaa tamaarana.