AAWITAARA gayttanau yiya ha loˈˈiya maccaasiyaa oonakko eray? I sunttay Abigaalo. A loˈˈo akeekay deˈiyo asa gidiyo gishshau, Daawiti issi iitabaa oottenna mala teqqaasu. SHin hegaa tamaaranaappe kase, Daawiti waaniiddi takkidaakko ane beˈoos.

Daawiti Saaˈoolappe baqatoogaappe guyyiyan, issi gonggolo giddon qosettiis. A ishanttinne a soo asati harati, he sohuwaa akko yiidosona. Muleera 400 gidiya attuma asay akko yin, Daawiti eta halaqa gidiis. Hegaappe Daawiti Mooˈaaba kawuwaakko biidi: ‘Taani waananaakko beˈana gakkanaashin ta aayyiyonne ta aawaa ne matan wottashsharkkii’ yaagiis. Hegaappe Daawitinne a asati deretiyasan qosettiyoogaa doommidosona.

Daawiti Abigaaliira gayttidoy hegaappe simmiina. I azinaa Naabaali daro gadee deˈiyo dure asa. Ayyo 3,000u dorssaynne 1,000u deeshshay deˈees. Naabaali meqeti baynna iita asa. SHin a machchiyaa Abigaala loˈˈobaa oottiyo ogiyaa eriya asanne keehippe mera loˈˈiya asa. Issi gallassi ubba, ba soo asaa hayquwaappe ashshaasu. Ane a waatada hegaadan oottidaakko beˈoos.

Daawitinne a asati Naabaalassi kehabaa oottidosona. Eti a dorssata qohuwaappe naagidosona. Yaatiyo gishshau, issi gallassi Daawiti, Naabaali baassi kehanaadan oychchanau ba asatuppe amaridaageeta akko kiittiis. Daawita asati Naabaalakko yi gakkiyo wode, inne a oosanchchati dorssaa ikisiyaa meedoosona. Hegee bullachcha gallassa mala gidiyo gishshau, Naabaalassi miyo daro loˈˈobay deˈees. Yaatiyo gishshau, Daawita asati: ‘Nuuni neessi kehabaa oottida. Ne dorssatuppekka aybanne wuuqqibookko, ubba eta naagiyoogan maaddida. Hayyana haˈˈi nuussi miyo amaridabaa immarkkii’ yaagidosona.

Naabaali: ‘Taani intte mala asau ta qumaa immikke’ yaagiis. I keehi iita hanotan haasayiis; qassi Daawitakka cayiis. Asati Daawitakko simmi biidi hanidabaa assi yootin, Daawiti keehi yiillotiis. I ba asata ‘Intte bisuwaa bisuwaa gixxite!’ yaagiis. Eti Naabaalanne a son deˈiya attuma asaa woranau denddidi biidosona.

Naabaali haasayido iitabaa siyida a asatuppe issoy, hanettidabaa Abigaalissi yootiis. Abigaala sohuwaara amarida qumaa giigissaasu. Hegaa amarida haretun caanada biyoogaa doommaasu. Daawita beˈanne ba hariyaappe wodhdhada a sinttan ziggada: ‘Hay ta godau, ta azinay Naabaali giidobaa siyopparkkii. I eeyya; qaassi i oottiyoobikka eeyyabaa. Taani ehiido imotaa hayyanaa ekkada, hanida ubbabaa nuussi atto yaagarkkii’ yaagasu.

Daawiti: ‘Neeni loˈˈo qofaara deˈiya maccaasa. Taani Naabaala worada a iitatettau ta haluwaa kiyennaadan ne teqqadassa. Haˈˈi ne soo saro simma’ yaagiis. Guyyeppe Naabaali hayqqin, Abigaala Daawita machchotuppe issinno gidaasu.