HANIDABAY aybakko beˈay? Naˈay ha guutta dorssa mariyoo beere giyo doˈaappe wotti ekkiis. Beeree dorssa mariyoo oyqqidi ekki efiis. SHin naˈay a geeduwaa woxxi biidi, maana haniya beeriyaa doonaappe dorssa mariyoo wotti ekkiis. Beere pude denddi eqqin, naˈay a oyqqidi shocciyoorin beere hayqqi bayiis! Hara wode issi dorssaa gaammuwaappe ashshiis. Hegee xala naˈa gidenee? I oonakko eray?

Hegee yelaga naˈaa Daawita. I Beetaliheeme kataman deˈees. A aawaa aaway Urutinne Booˈeeza naˈaa Yoobeeda. Ne eta hassayay? Daawita aaway qassi Isseya. Daawiti ba aawaa dorssaa heemmees. Daawiti yelettidoy Saaˈooli kawo gidanaadan Yihooway doori simmin, 10⁠u layttappe guyyiyaana.

Yihooway Sameelayyo: ‘Dumma zaytiyaappe amaridaagaa ekkada Isseye so Beeteliheema ba. A naatuppe issuwaa kawo gidanaadan dooraas’ yaagiyo wodee gakkiis. Sameeli Isseya bayra naˈaa Eliˈaaba beˈidi ba wozanan: ‘Tumuppe Yihooway dooridoy hagaa’ yaagidi qoppiis. SHin Yihooway ayyo: ‘A geesaa adussatettaanne a meraa loˈˈotettaa xeelloppa. I kawo gidanaadan taani a doorabeykke’ yaagiis.

Yaatin Isseyi ba naˈaa Abinadaaba xeesidi Sameelakko ehiis. SHin Sameeli: ‘CHii, Yihooway hagaakka dooribeenna’ yaagiis. Kaallidi Isseyi ba naˈaa SHaama ehiis. Sameeli: ‘Yihooway hagaakka dooribeenna’ yaagiis. Isseyi ba naatuppe laappunaa ehiis shin, Yihooway etappe oonanne dooribeenna. Sameeli: ‘Ne naati hageetu xalleeyye?’ yaagidi oychchiis.

Isseyi: ‘Ubbaappe kaalo naˈay deˈees; shin i dorssaa heemmiiddi deˈees’ yaagiis. Daawiti yin, Sameeli i mera loˈˈiya naˈa gidiyoogaa beˈiis. Yihooway: ‘Hagee a; zaytiyaa a bolli tiga’ yaagiis. Sameeli oottidoykka hegaadaana. Daawiti Israaˈeele kawo gidiyo wodee yaana.